ANDƐ’N, sran sunman be bu i kɛ be kpa tra be wiengu mun, naan ninnge wie’m be o lɛ’n, be yɛ ɔ fata kɛ be yo-ɔ. Annzɛ be bu i kɛ be le ɲrun dan, naan ɔ fata kɛ be wiengu’m be yo ninnge wie mun man be. Kannzɛ bɔbɔ be le sasu’n, sanngɛ be kunndɛ kɛ bé ɲán sasu kpa ekun trá laa’n. Be nga be yo sɔ’n, be bu be ngunmin be wun akunndan. Biblu’n se kɛ mɛn’n i awieliɛ blɛ’n nun’n, i sɔ akunndan liɛ’n yɛ sran’m bé bú-ɔ.​—2 Tim. 3:2.

Be ngunmin be wun akunndan bulɛ’n finman andɛ. I wie yɛle Adan nin Ɛvu be liɛ’n. Be kunndɛli kɛ be bɔbɔ bé klé like ng’ɔ ti kpa’n, ɔ nin ng’ɔ ti tɛ man be’n. Yɛ wafa nga i bo’n guali’n kusu w’a yoman kpa mlɔnmlɔn. Kɛ afuɛ kpanngban sinnin’n, Oziasi m’ɔ ti Zida famiɛn’n, ɔ buli i kɛ ɔ le atin yra ansan Ɲanmiɛn sua’n nun lɔ. Kusu nn ɔ leman atin yoman sɔ. (2 Ɲol. 26:18, 19) Farizifuɛ mun nin Sadisefuɛ’m be buli i kɛ be ti Abraamun i anunman mun ti’n, ɔ fata kɛ Ɲanmiɛn bu be sran kpa tra sran onga mun.​—Mat. 3:9.

Mɛn’n nunfuɛ mɔ e nin be e o’n, be bu be ngunmin be wun akunndan dan. Sɛ y’a nianman e wun su’n, be nzuɛn sɔ’n kwla sa e. (Gal. 5:26) Ɔ maan e kwla bu i kɛ junman wie’m be o lɛ’n, e yɛ ɔ fata kɛ e di-ɔ. Annzɛ e kwla bu i kɛ e le ɲrun dan, naan ɔ fata kɛ e wiengu’m be yo ninnge wie’m be man e. ?É yó sɛ naan y’a bumɛn i sɔ akunndan’n wie? Ɔ fata ka e wun wafa nga Zoova bu nzuɛn sɔ’n i wlɛ. I lɛ nun’n, é wá fá e ɲin é síe i ndɛ cinnjin nɲɔn be su.

 Like nga e le atin e ɲɛn i’n, Zoova kunngba cɛ yɛ ɔ fata kɛ ɔ kle e-ɔ. Maan e kan sa wie’m be ndɛ.

•  Zoova kunndɛ kɛ awlobo’n nun’n, yasua’n wun kɛ i yi’n i ɲin yi i, yɛ maan bla’n kusu wun kɛ i wun’n klo i. (Efɛ. 5:33) Ɔ kunndɛ kɛ ndalie tralɛ’n ka yasua kun nin i yi be afiɛn. (1 Kor. 7:3) Asa’n, kɛ siɛ nin niɛn’m be kunndɛ kɛ be mma’m be ɲin yi be’n, i sɔ’n ti su. Yɛ kɛ ba’m be kusu be kunndɛ kɛ be si nin be nin’m be klo be naan be nian be lika’n, i sɔ’n ti su.​—2 Kor. 12:14; Efɛ. 6:2.

•  Asɔnun’n nun kusu’n, ɔ fata kɛ e ɲin yi asɔnun kpɛnngbɛn mun, junman dan mɔ be di’n ti. (1 Tes. 5:12) Sanngɛ be leman atin be mianmianman be niaan mun.​—1 Piɛ. 5:2, 3.

•  Ɲanmiɛn man siefuɛ’m be atin kɛ be de sran’m be lapo, yɛ ɔ fata kɛ sran’m be ɲin yi be.​—Rɔm. 13:1, 6, 7.

Klolɛ mɔ Zoova klo e’n ti’n, like ng’ɔ man e’n ɔ tra ng’ɔ fata kɛ e ɲɛn i’n su. Fɔ m’ɔ o e nun’n ti’n, wulɛ yɛ ɔ fata kɛ e wu-ɔ. (Rɔm. 6:23) Sanngɛ klolɛ dan mɔ Zoova klo e’n ti’n, ɔ man e ninnge kpanngban. (Jue. 103:10, 11) I aklunye dan’n ti yɛ ɔ man e like annzɛ junman-ɔn, nán kɛ e nin i sɔ liɛ’n fata ti-ɔ.​—Rɔm. 12:6-8; Efɛ. 2:8.

Nán e bu akunndan kɛ mɛn’n nunfuɛ’m be sa. Sɛ y’a nianman e wun su’n, e kwla bu i kɛ ɔ fata kɛ like nga e ɲɛn i’n, ɔ tra e wiengu’m be liɛ’n. Zezi i ɲanndra kun m’ɔ buli’n ɔ kle sɔ. Ɲanndra sɔ’n nun’n, ɔ kannin junman difuɛ wie mɔ be ­tuali be denie kun’n be ndɛ. Junman difuɛ sɔ’m be dili junman nglɛmun ndɛ kpa’n lele nnɔsua. Sanngɛ junman difuɛ wie mɔ be bali kasiɛn su’n, be dili junman dɔ kun cɛ. I sɔ’n ti’n, junman difuɛ klikli’m be seli kɛ ɔ fata kɛ be akatua’n tra be nga be bali kasiɛn’n be liɛ’n. (Mat. 20:1-16) Zezi buli ɲanndra sɔ’n naan ɔ́ klé i sɔnnzɔnfuɛ’m be kɛ maan be ɲin yi like nga Ɲanmiɛn fa man be’n.

Maan e kle kɛ e si ye, yɛ nán e minndɛ kɛ e wiengu’m be man e like. (1 Tes. 5:18) I lɛ nun’n, akoto Pɔlu kle e ajalɛ kpa. Ɔ le atin se i niaan nga be o Korɛnti lɔ’n be kɛ be niɛn i lika. Sanngɛ w’a srɛman be like le. (1 Kor. 9:11-14) Like kwlaa nga e ɲɛn i’n, maan e ɲin yi i. Yɛ nán e yo sran m’ɔ jrɛn i wiengu’m be wun kɛ be mɛn i like-ɔ.

 Maan e yo wun ase kanfuɛ. Kɛ sran kun bu i ngunmin i wun akunndan dan’n, blɛ sunman’n i ɲin yiman like ng’ɔ le i’n. Like ng’ɔ kwla uka e naan y’a wla akunndan tɛ kɛ ngalɛ’n sa’n i ase’n, yɛle wun ase kanlɛ’n.

Wun ase kanlɛ’n nun’n, Ɲanmiɛn nuan ijɔfuɛ Daniɛli kle e ajalɛ kpa. Ɔ ti wlengbi ba. Ɔ ti gbanflɛn, ɔ si ngwlɛlɛ yɛ ɔ si ninnge sunman yo. Ɔ maan ɔ kwla se i wun kɛ aɲrunɲan nin junman nga be mɛnnin i’n, ɔ nin i sɔ’n fata. (Dan. 1:3, 4, 19, 20) Sanngɛ w’a yoman sɔ. Ɔ kɛnnin i wun ase titi. I sɔ’n ti’n, Zoova buli i sran kpa.​—Dan. 2:30; 10:11, 12.

Maan e nian e wun su naan y’a buman e ngunmin e wun akunndan kɛ sran’m be yo i andɛ’n sa. Sanngɛ like nga Zoova m’ɔ ti aklunyefuɛ dan’n man e’n, maan e klun jɔ su titi.