Biblu’n uka e naan y’a si sa kpa’n nin sa tɛ’n

Sɛ akunndan nga e bɔbɔ e bu’n annzɛ ndɛ nga e wiengu’m be kan’n be ngunmin su yɛ e jran e fa ajalɛ’n, nán blɛ kwlaa nun yɛ i bo’n gúa kpa mán e-ɔ. Biblu’n kan sa nga ti yɛ ɔ ti sɔ’n i ndɛ. Asa’n ɔ man e afɔtuɛ kpakpa wie mun naan e liɛ w’a yo ye.

Ɔ TI CINNJIN KƐ ƝANMIƐN KLE E ATIN

Biblu’n se kɛ, Zoova a w’a yiman e kɛ e bɔbɔ e kle atin nga é fá’n. (Zeremin 10:23) I sɔ’n ti’n ɔ man e afɔtuɛ Biblu’n nun. Ɔ klo e, yɛ ɔ kunndɛman kɛ e ti ko si talɛ’n ka naan y’a si like ng’ɔ ti kpa’n annzɛ ɔ ti tɛ’n. (Mmla’n 5:29; 1 Zan 4:8) Kɛ mɔ i yɛ ɔ yili e’n ti’n ɔ si ngwlɛlɛ, yɛ ɔ si sa kwlakwla. Ɔ maan kɛ ɔ man afɔtuɛ mɔ e fa su’n, saan é ɲán su ye. (Jue Mun 100:3; 104:24) Sanngɛ Ɲanmiɛn mianman sran kɛ ɔ fa ndɛ ng’ɔ kan’n su.

Adan nin Ɛvu yɛ Zoova dun mmua yili be-ɔ. Ɔ mannin be like kwlaa nga be miɛn i wun naan b’a kwla di aklunjɔɛ’n. (Bo Bolɛ 1:28, 29; 2:8, 15) Asa’n ɔ mannin be mmla wie mɔ be su dilɛ timan kekle-ɔ. Sanngɛ w’a mianman be kɛ be nanti su. (Bo Bolɛ 2:9, 16, 17) Sanngɛ Adan nin Ɛvu b’a faman Ɲanmiɛn i mmla’m be su, like nga be bɔbɔ be waan bé yó’n yɛ be yoli-ɔ. (Bo Bolɛ 3:6) ?Kɛ be yoli sɔ’n, i bo’n guali sɛ? ?Kɛ klɔ sran’m be yo like nga be bɔbɔ be klo’n yɛ be di aklunjɔɛ-ɔ? Cɛcɛ, afin kɛ ɔ fɛ i laa lele andɛ’n sa nga be juli mɛn’n nun’n, be kle kɛ kɛ klɔ sran’m be faman Ɲanmiɛn ndɛ’n su’n, i bo’n guaman kpa manman be.—Akunndanfuɛ’n 8:9.

Biblu’n man e afɔtuɛ naan y’a fa ajalɛ kpa. Afɔtuɛ sɔ’m be ti sran kwlakwla liɛ. (2 Timote 3:16, 17; nian kuku nga be flɛ i kɛ “ Fluwa kun m’ɔ kwla uka sran kwlakwla’n” nun.) Maan e kan wafa nga Biblu’n nun ndɛ’n kwla uka sran mun’n i ndɛ.

?A kunndɛ kɛ á sí sa nga ti yɛ be flɛ Biblu’n kɛ ‘Ɲanmiɛn i ndɛ’n’?—1 Tesalonikifuɛ Mun 2:13. Nian video nga be flɛ i kɛ ?Biblu’n nun ndɛ’n fin wan? Ɔ o jw.org su.

?NGUE TI YƐ BIBLU’N NUN NDƐ’N TIMAN SRAN WIE’M BE CINNJIN-ƆN?

Sran wie’m be waan e kwlá lafiman Biblu’n nun ndɛ’n su naan y’a fa ajalɛ. Ndɛ nga be nun wie’m be kan’n yɛ.

Ndɛ nga be kan’n: “Ndɛ nga be o Biblu’n nun’n be sansan be wun.”

Ndɛ nanwlɛ’n: Kɛ e fa e ɲin e sie i Biblu’n nun ndɛ wie’m be su’n, ɔ kwla yo e kɛ be sansan be wun sa. Sanngɛ sɛ e fa e ɲin e sie i wafa nga be klɛli ndɛ’n, ɔ nin blɛ nga i nun yɛ be klɛli ndɛ’n, ɔ nin akunndan nga sran ng’ɔ klɛli’n ɔ bu’n, ɔ nin sa uflɛ wie mun ekun be su’n, é wún kɛ be sansanman be wun.

Sɛ a kunndɛ kɛ á sí Biblu’n nun ndɛ wie mɔ sran’m be bu i kɛ be sansan be wun’n, kanngan ndɛ akpasua nga be flɛ i kɛ “Y a-t-il des contradictions dans la Bible ?” nun. Ɔ o jw.org su.

Ndɛ nga be kan’n: “Be nga be waan be fa Biblu’n nun ndɛ’n su bɔbɔ’n be yo sa tɛtɛ mun. Ɔ maan i nun ndɛ’n timan kpa.”

Ndɛ nanwlɛ’n: Nán kɛ sran wie’m be nantiman Biblu’n nun ndɛ’n su’n i ti yɛ é sé kɛ Biblu’n nun ndɛ’n timan kpa-ɔ. Biblu’n bɔbɔ seli kɛ sran wie’m bé wá tɔ́n be wun suɛn kɛ be nanti Ɲanmiɛn ndɛ’n su, kusu nn be ayeliɛ’n kleman sɔ. I wie yɛle Ɲanmiɛn sulɛ wafa’m be su kpɛn’m be liɛ’n. Biblu’n se kɛ i kwlaa sɔ’n ti’n “sran’m bé kán nanwlɛ atin’n i wun ndɛ tɛ.”—2 Piɛli 2:1, 2.

Sɛ a kunndɛ kɛ á sí sa kun m’ɔ kle kɛ Ɲanmiɛn sulɛ wafa’m be su kpɛnngbɛn’m be nantiman Biblu’n nun ndɛ’n su’n, kanngan ndɛ akpasua nga be flɛ i kɛ “La religion n’est-elle qu’une entreprise commerciale de plus ?” nun. Ɔ o jw.org su.

Ndɛ nga be kan’n: “Biblu’n se kɛ nán e bu e wiengu’m be sran.”

Ndɛ nanwlɛ’n: Biblu’n se e kɛ e bu e wiengu’m be sran. Afɔtuɛ ng’ɔ man e’n be nun wie mun yɛ.

Nán e bu i kɛ e kpa tra e wiengu mun. —Filipufuɛ Mun 2:3
Be nga be yoman ninnge mun kɛ e sa’n, annzɛ Ɲanmiɛn sulɛ wafa nga be o nun’n ɔ nin e liɛ’n timan kun’n, nán e bu i kɛ e kpa tra be. —1 Piɛli 2:17.
Nán e mian sran mun kɛ be bu ninnge mun kɛ nga e fa bu be’n sa.—Matie 10:14.

Biblu’n se kɛ Ɲanmiɛn ɲrun’n sran kun i kpa traman sran uflɛ. I kunngba’n yɛ ɔ kunndɛ kɛ e kusu e yo-ɔ.—Rɔmunfuɛ Mun 9:14.

Sɛ a kunndɛ kɛ á sí nun kpa ekun’n, kanngan ndɛ akpasua nga be flɛ i kɛ “?Wafa sɛ yɛ Biblu’n kwla uka e naan y’a bu sran ngba sran-ɔn?” nun. Ɔ o jw.org su.

BIBLU’N KLE E LIKE NGA ƝANMIƐN KUNNDƐ KƐ E YO’N

Biblu’n kan wafa nga Ɲanmiɛn nin klɔ sran’m be fa trannin’n i ndɛ. Ndɛ ng’ɔ o Biblu’n nun’n uka e naan y’a si like nga Ɲanmiɛn se kɛ ɔ ti kpa annzɛ ɔ ti tɛ’n. Asa’n ɔ kle e ninnge nga Ɲanmiɛn waan be kwla yo e ye annzɛ be kwla yo e tɛ’n. (Jue Mun 19:7, 11) Afɔtuɛ nga be o nun’n be kwla yo e ye blɛ kwlaa nun. Yɛ be kwla uka e naan y’a fa ajalɛ kpa.

I wie yɛle afɔtuɛ ng’ɔ o Ɲanndra Mun 13:20 nun’n. Ɔ se kɛ: “Sran ng’ɔ nin ngwlɛlɛfuɛ’n be nanti’n, ɔ́ káci ngwlɛlɛfuɛ, sanngɛ sran ng’ɔ nin sinnglinfuɛ’n be san nun’n, ɔ́ ɲán ndɛ.” Ndɛ sɔ’n ukali sran mun laa yɛ ɔ te uka sran mun andɛ. Afɔtuɛ kpakpa kɛ ngalɛ’n sa’m be diman be yalɛ Biblu’n nun.—Nian kuku nga be flɛ i kɛ “ Biblu’n nun afɔtuɛ’m be blɛ’n sinman le” nun.

Sanngɛ a kwla usa ɔ wun kɛ: ‘?Ngue yɛ ɔ kle kɛ n kwla di Biblu’n nun ndɛ’n su andɛ-ɔ?’ Ndɛ akpasua ng’ɔ́ bá lɛ’n nun’n é wá kán sran wie mɔ Biblu’n nun ndɛ’n ukali be’n be ndɛ.

a Ɲanmiɛn i dunman bɔbɔ ba’n m’ɔ o Biblu’n nun’n yɛle Zoova. —Jue Mun 83:18.

BIBLU’N NUN AFƆTUƐ’M BE BLƐ’N SINMAN LE

Be wieli Biblu’n i klɛ i afuɛ 2.000 yɛ. Sanngɛ i nun ndɛ’n te yo e ye dɔ nga su. Kɛ ɔ fɛ i laa lele andɛ’n like nga klɔ sran’m be kunndɛ’n w’a kaciman. E kunndɛ kɛ é dí aklunjɔɛ, yɛ e kunndɛ kɛ e liɛ yo ye. (Akunndanfuɛ’n 1:9) Biblu’n nun afɔtuɛ’m be blɛ’n sinman le, yɛ be kwla uka e naan i sɔ liɛ’n w’a yo ye.

Nanwlɛ dilɛ’n

“Amun srɛ Ɲanmiɛn man e titi. Afin e si e klun lɔ weiin kɛ e ti nanwlɛfuɛ. Yɛ e klo kɛ é yó nanwlɛfuɛ sa kwlaa nun.”—Ebre Mun 13:18.
“Sran ng’ɔ wua’n, maan ɔ yaci wualɛ naan ɔ di junman kekle kpa.”—Efɛzifuɛ Mun 4:28.

Like nga é yó naan e nin e wiengu mun y’a tran klanman’n

“Nán maan sran fi bu i bɔbɔ i wun akunndan, sanngɛ maan ɔ bu i wiengu akunndan titi.”—1 Korɛntifuɛ Mun 10:24.
“Sɛ amun wiengu yo amun sa’n, maan ɔ sɔn amun nun. Asa ekun’n, kannzɛ be loli sran kun i ngasi’n, maan ɔ yaci sa nga be yoli i’n ɔ cɛ klun ufue su.”—Kolɔsufuɛ Mun 3:13.

Like nga é yó naan y’a fa ajalɛ kpa’n

“Sran ng’ɔ siman sa’n, ɔ fa ndɛ kwlaa su, sanngɛ ngwlɛlɛfuɛ’n i liɛ’n, ɔ niɛn i ja kwlaa ng’ɔ tu’n su.”—Ɲanndra Mun 14:15.
“Sran ng’ɔ sɛsɛ i wun’n, kɛ ɔ wun kɛ sa wie su ba’n, kpɛkun w’a fia, sanngɛ be nga be siman sa’n, be kuku be wun ko yi nun, kpɛkun be wun be ɲrun.”—Ɲanndra Mun 22:3.

SASAFUƐ TRANWLƐ'N