IZRAƐLIFUƐ’M be blɛ su’n, miziki’n ti be cinnjin kpa. Biblu’n nun’n, be kan sran wie mɔ be bo miziki annzɛ be to jue’n be ndɛ kpɛ sunman’n. Biblu’n i lika sunman ti jue. Be nun wie mun yɛle Jue Mun nin Ngɔjue fɛfɛ Kpa’n ɔ nin Ngwlɛ Yilɛ. Fluwa kun m’ɔ kan be nga Biblu’n kan be ndɛ’n be ayeliɛ’n i ndɛ’n ɔ seli kɛ: “Biblu’n kle weiin kɛ Izraɛlifuɛ’m be ninnge yolɛ wafawafa’m be nun’n, be bo miziki.”

Be klo miziki bolɛ. Izraɛlifuɛ’m be bo miziki yɛ be to jue be fa yi wafa nga be wun yo be’n i nglo. (Eza. 30:29) Kɛ bé síe famiɛn mun, annzɛ kɛ sonja’m be kwla be kpɔfuɛ mun, annzɛ kusu kɛ bé dí cɛn mun’n, bla’m be bo klɛn, be to aklunjɔɛ jue mun yɛ be si able. (Jɔl. 11:34; 1 Sam. 18:​6, 7; 1 Fam. 1:​39, 40) Asa’n, kɛ be sran wu mɔ bé sún’n, be yi ngwlɛ. (2 Ɲol. 35:25) I kwlaa sɔ’n kle kɛ miziki’n ti Izraɛlifuɛ’n be cinnjin laa.

Laa Izraɛli famiɛn’m be klo miziki kpa. I wie yɛle kɛ Famiɛn Saili flɛli Davidi i awlo lɔ naan ɔ wa bo jru mɛn i. (1 Sam. 16:​18, 23) Kɛ Davidi bɔbɔ kacili famiɛn’n, ɔ kpɛli miziki bolɛ ninnge wie’m be ba, ɔ kpɛli jue wie mun, kpɛkun ɔ siesieli be nga bé tó jue Zoova i sua’n nun lɔ’n. (2 Ɲol. 7:6; Amɔ. 6:5) Famiɛn Salomɔn kusu i awlo lɔ’n, ɔ le jue tofuɛ yasua nin bla mun.—Aku. 2:8.

Kɛ Izraɛlifuɛ’m bé sú Ɲanmiɛn’n be boli miziki. Be nga be bo miziki Ɲanmiɛn i sua ng’ɔ o Zerizalɛmun lɔ’n nun’n, be ti sran 4.000. (1 Ɲol. 23:5) Be bo sɛnbali, nin miziki bolɛ ninnge nga be le ɲanman’n, ɔ nin awɛ. (2 Ɲol. 5:12) Sanngɛ nán sran sɔ’m be ngunmin yɛ kɛ bé sú Zoova’n be bo miziki-ɔ. Kɛ Izraɛlifuɛ’m bé kɔ́ Zerizalɛmun bé kó dí be cɛn mun’n, be nun sunman be to jue. Be flɛ jue nga be to be’n be kɛ Be nga be su fu kɔ’n be jue. (Jue. 120–134) Zifu’m be fluwa wie’m be se kɛ kɛ Izraɛlifuɛ’m bé dí Delɛ cɛn’n, be to jue nga be flɛ be kɛ Alɛli jue mun’n mɔ be o Jue Mun fluwa’n nun’n. a

Andɛ’n jue tolɛ’n ti Ɲanmiɛn i sufuɛ’m be cinnjin wie. (Zak. 5:13) Kɛ é sú Ɲanmiɛn’n e to jue. (Efɛ. 5:19) Kɛ e to Zoova i manmanlɛ jue mun likawlɛ’n i sɔ’n yo maan e nin e niaan mun e afiɛn mantan. (Kol. 3:16) Asa’n kɛ sa wie o e su mɔ e to jue annzɛ e bo miziki’n, i sɔ’n wla e fanngan naan y’a jran kekle. (Yol. 16:25) Nanwlɛ, miziki’n kwla uka e naan y’a kle kɛ e lafi Zoova su naan e klo i.