“Sran kunngba ti yɛ sa tɛ yolɛ’n bali mɛn’n nun- ɔn. Yɛ sa tɛ’n kusu ti yɛ wie’n bali-ɔ. Yɛ wie’n wo sran’m be kwlaa be su.”—​RƆMUNFUƐ MUN 5:12.

Kɛ Ɲanmiɛn yili Adan nin Ɛvu mɔ be ti klɔ sran klikli’n, fɔ nunman be nun. Ɔ fali be sieli i lika klanman kpa kun nun. Be flɛ lika sɔ’n kɛ Edɛnin fie’n. Ɔ seli be kɛ be kwla di waka’m be mma kwlaa nga be waan bé dí’n. Saan waka kunngba cɛ i su mma liɛ’n, yɛ ɔ seli be kɛ nán be di-ɔ. Sanngɛ Adan nin Ɛvu be dili waka mma sɔ’n. Ɔ maan be yoli sa tɛ. (Bo Bolɛ 2:15-17; 3:1-19) Kɛ mɔ be ɲin w’a yiman Ɲanmiɛn’n ti’n, ɔ kannin be bo fie’n nun. Ɔ maan be wa wunnin be ɲrun kpa. Kɛ ɔ́ kɔ́ i ɲrun’n, be wuli ba. Ba sɔ’m be wunnin be ɲrun wie. Kpɛkun i sin’n be yoli kpɛnngbɛn yɛ be wuli. (Bo Bolɛ 3:23; 5:5) E kwlakwla e ti Adan nin Ɛvu be mma mun. I sɔ’n ti yɛ e tɔ tukpacɛ, e yo kpɛnngbɛn kpɛkun e wu’n niɔn.

“Mɛn wunmuan’n wo klunwifuɛ’n i sa nun.”—​1 ZAN 5:19.

“Klunwifuɛ” sɔ’n yɛle Satan. Ɔ ti aolia nun sran yɛ ɔ yoli ɲin kekle Ɲanmiɛn su. (Zan 8:44; Sa Nglo Yilɛ 12:9) I sin’n, anzi uflɛ wie’m be suli Satan su. Be flɛ be kɛ mmusu mun. Mmusu sɔ’m be laka sran mun yɛ be su be bo naan be yo ɲin kekle Ɲanmiɛn m’ɔ ti  be Yifuɛ’n i su. Asa’n, be wlawla sran mun naan be yo ninnge tɛtɛ mun. (Jue Mun 106:35-38; 1 Timote 4:1) Satan nin i mmusu’m be klo sran’m be ɲrɛnnɛn klelɛ kpa.

“Like nga sran kun lua’n, yɛ ɔ́ tí-ɔ.”—​GALASIFUƐ MUN 6:7.

I yo, Adan nin Ɛvu nin Satan nin i mmusu’m be ti yɛ ɲrɛnnɛn o mɛn’n nun-ɔn. Sanngɛ ɔ ju wie’n, e bɔbɔ ti yɛ e fɛ-ɔ. Yɛle kɛ kɛ e fa ajalɛ tɛ annzɛ e yo ninnge tɛtɛ mun’n, e wun i su afɛ’n. Sanngɛ kɛ e yo ninnge kpakpa mun’n, i bo gua kpa man e kusu. Maan e fa sa kun e yiyi nun. Sɛ bian kun le bla nin ba naan i nzuɛn’n ti kpa naan ɔ tu i klun di junman yɛ ɔ nian be lika kpa’n, ɔ nin i awlofuɛ’m bé dí aklunjɔɛ. Sanngɛ sɛ ɔ fɛ i akatua’n to mma annzɛ ɔ nɔn nzan bo annzɛ ɔ ti fuɛnfuɛ’n, i bɔbɔ nin i awlofuɛ’m bé dí yalɛ. I sɔ’n kle kɛ sɛ e nanti afɔtuɛ nga e Yifuɛ’n man e’n su’n, é ɲán su ye. Afin ɔ kunndɛ kɛ e di aklunjuɛ naan e wun jɔ e kpa fɔuun.—​Jue Mun 119:165.

“Mɛn’n i awieliɛ blɛ nun’n, [...] sran’m bé bú be bɔbɔ be wun akunndan, bé yó sika klofuɛ, [...] be ɲin su yiman be si nin be nin mun, [...] be su siman be wun su nian, bé yó wlɛ, be su kloman like ng’ɔ ti kpa’n.”—​2 TIMOTE 3:1-5.

Andɛ’n, sran’m be ayeliɛ’n ti kɛ nga Ɲanmiɛn Ndɛ’n fa kannin’n sa cɛ. Be ayeliɛ’n kle weiin kɛ e o “mɛn’n i awieliɛ blɛ’n” nun sakpa. Ɲanmiɛn Ndɛ’n seli ekun kɛ mɛn’n i awieliɛ blɛ’n nun’n, sran’m bé dí alɛ, awe wá kpɛ́n, asiɛ’n wá kéje kpɛkun tukpacɛ’n wá sɔ́n. (Matie 24:3, 7, 8; Liki 21:10, 11) Ninnge kwlaa sɔ’m be ti’n, e wun e ɲrun kpɛkun e wu.