Maan e si e wiengu’m be aunnvuɛ
Like nga ti yɛ sran’m be kpli be di be wiengu’m be jɔlɛ’n
Sɛ e fa e ɲin e sie i ngbaciɛ ng’ɔ o wafa nga e wiengu’m be yo be ninnge mun’n nin e liɛ’n be afiɛn’n i su dan’n, ɔ cɛman naan y’a bu i kɛ be ninnge yolɛ liɛ’n timan kpa. Ɔ maan e kwla bu i kɛ e ti kpa tra be. Sɛ e bu sran’m be wun akunndan tɛ’n, é dí be jɔlɛ. Kpɛkun e su siman be aunnvuɛ.
Ndɛ nga Biblu’n kan’n
“Be nga be su di aklunjuɛ’n, maan amun nin be di aklunjuɛ. Be nga be su sun’n, maan amun nin be sun.”—RƆMUNFUƐ MUN 12:15.
?Ngue yɛ ndɛ sɔ’n kle e-ɔ? Biblu’n nun ndɛ mma sɔ’n kle kɛ ɔ fata kɛ e si e wiengu’m be aunnvuɛ. Kɛ be se kɛ sran kun si i wiengu i aunnvuɛ’n, yɛle kɛ sɛ sa wie o i su’n, ɔ yo kɛ i bɔbɔ yɛ sa sɔ’n wo i su sa. Kpɛkun ɔ wun wafa nga sa sɔ’n ti’n, i wiengu sɔ’n i wun yo i’n i wlɛ.
?Wafa sɛ yɛ e wiengu’m be aunnvuɛ silɛ’n kwla uka e-ɔ?
Sɛ e si e wiengu’m be aunnvuɛ’n, é wún i wlɛ kɛ e kwlakwla e ti kun. Asa ekun’n, é wún i wlɛ kɛ be kwla yo ninnge mun kɛ e sa annzɛ be wun kwla yo be kɛ e sa wie. Ɔ maan kannzɛ e ti fanunfanun’n, sanngɛ é wún i wlɛ kɛ e ti awlobo kunngba nunfuɛ. Sɛ e faman e ɲin e siemɛn i ngbaciɛ ng’ɔ o e nin e wiengu mun e afiɛn’n i su ngboko’n, é bú be wun akunndan kpa.
Sɛ e si e wiengu’m be aunnvuɛ’n, e ɲin yí be wie. Be flɛ bla kun kɛ Anin-Mari. Ɔ fin nvle nga be flɛ i kɛ Senegali’n, i nun. Blɛ wie nun’n, w’a buman be nga sran’m be buman be wie’n be wun akunndan kpa. Ɔ kannin wafa nga kɛ ɔ sili i wiengu’m be aunnvuɛ’n i sɔ’n ukɛli i’n, i ndɛ. Ɔ seli kɛ: “Kɛ n wunnin wafa nga sran sɔ’m be wun be ɲrun’n, n buli wafa nga sɛ ɔ ti kɛ min yɛ n wun min ɲrun sɔ’n, min wun yó min’n i akunndan. I sɔ’n yoli maan n wunnin i wlɛ kɛ n timan kpa n traman be. N wunman like nga ti yɛ n se min wun kɛ n ti kpa n tra sran sɔ mun bɔbɔ’n.” Sɛ e mian e ɲin naan e wun sa ng’ɔ o e wiengu’m be su’n i wlɛ’n, e su kanman be wun ndɛ tɛtɛ.
Like nga e kwla yo’n
Sɛ e bu sran akpasua kun wun akunndan tɛ’n, maan e fa e ɲin e sie i ninnge nga be kle kɛ e ti kun’n be su. I lɛ nun’n, maan e bu wafa nga kɛ bé yó ninnge nga mun’n be wun yo be’n, i akunndan.
Sɛ e si aunnvuɛ’n, é wún i wlɛ kɛ sran’m be kwlaa be ti awlobo kunngba nunfuɛ.
Kɛ be nin be awlofuɛ’m bé dí like’n.
Kɛ be ko di junman kekle mɔ be sa be sin awlo’n.
Kɛ be nin be janvuɛ’m bé yó ninnge wie mun likawlɛ’n.
Kɛ bé tíe miziki nga be klo i kpa’n.
Maan e yo e wun kɛ e bɔbɔ yɛ sa sɔ’n wo e su sa. Kpɛkun e usa e wun kɛ:
?Sɛ sran kun w’a buman min wie’n, wafa sɛ yɛ min wun yó min-ɔn?
?Sɛ sran’m be dun mmua di min jɔlɛ kwlaa naan b’a si min su ndɛ’n, wafa sɛ yɛ min wun yó min-ɔn?
?Sɛ n wo sran akpasua nga sran’m be kan be wun ndɛ tɛtɛ’n be nun wie’n, wafa sɛ yɛ ń kúnndɛ kɛ sran’m be nin min nanti-ɔ?
Ninnge wie mɔ be kwla yo ɔ fɛ ekun'n
SASAFUƐ TRANWLƐ'N
?Ɲanmiɛn si aunnvuɛ?
Biblu’n kle kɛ Ɲanmiɛn fɛ i ɲin sie e su, ɔ wun e su afɛ’n i wlɛ kpɛkun e ndɛ lo i
AN TINNGE!
Sɛ e fa afɔtuɛ nga Biblu’n man e be su’n, e nin e awlofuɛ nin e janvuɛ mun e afiɛn sɛ́ kpa.
Sɛ e kunndɛ kɛ e nin e wiengu mun e afiɛn mantan’n, ɔ fataman kɛ e fa e ɲin e sie i like nga be kwla yo be man e’n, i ngunmin su. Sanngɛ e fa e ɲin e sie i like nga e bɔbɔ e kwla yo man be’n i su wie.
