SIƐ NIN NIƐN’M BE LIƐ
7: An kle be sa kpa
?I BO’N YƐLE BENIN?
Nzuɛn wie’m be o lɛ mɔ amun mian amun ɲin be fa be-ɔ. Atrɛkpa’n, amun mian amun ɲin di nanwlɛ sa kwlaa nun. Ɔ maan, amun kunndɛ kɛ amún úka amun mma mun naan be yo sɔ wie.
Annzɛ kusu’n amun kunndɛ kɛ be wun i wlɛ kɛ be klun mɔ be tu di junman’n, ɔ nin sa nuan su yolɛ’n, nin be wiengu sran bulɛ’n be ti cinnjin. Kɛ ba’m be te yo kaan’n, yɛ ɔ fata kɛ be kle be i sɔ yolɛ-ɔ.
NDƐ NGA BIBLU’N KAN’N: “Kle gbanflɛn kan’n i atin ng’ɔ fata kɛ ɔ fa su’n, i liɛ’n, kɛ ɔ́ wá yó oke bɔbɔ’n ɔ su jasoman su.”—Ɲanndra Mun 22:6.
?NGUE TI YƐ Ɔ TI CINNJIN-ƆN?
Ajulisu mannzin mɔ b’a sɔn’n ti’n, amun kle be sa kpa yolɛ. Be flɛ niɛn kun kɛ Karɛnin. Ɔ seli kɛ: “Ba’m be kwla fa ninnge tɛtɛ wie mun sie be pɔɔtablu’n annzɛ be tablɛti’n be nun. Kɛ be ti e wun koko lɛ bɔbɔ’n, be kwla niɛn i sɔ ninnge mun.”
NDƐ NGA BIBLU’N KAN’N: ‘Be nga b’a tin’n be bu sa sin yɛ be wun sa kpa nin sa tɛ’n be ngbaciɛ’n i wlɛ.’—Ebre Mun 5:14.
Ɔ ti cinnjin kɛ be wiengu’m be ndɛ lo be. Andɛ sran’m be buman be wiengu akunndan. Ajulisu mannzin mun yɛ ɔ ti be cinnjin-ɔn. I sɔ’n ti, amun kle be kɛ maan be yo aɲinyiɛfuɛ. Yɛ be yo sran kwla.
NDƐ NGA BIBLU’N KAN’N: “Like nga amun klo kɛ sran’m be yo be man amun’n, amun yo i kunngba’n man be.”—Liki 6:31.
LIKE NGA AMUN KWLA YO’N
An kan mmla nga amun di su’n, i ndɛ kle be. Sran’m be sieli i nzɔliɛ kɛ, kɛ be kle gbanflɛn nin talua mun kɛ bla nin bian kunndɛlɛ sukusuku’n ti tɛ’n, be kwla fa ajalɛ kɛ be yomɛn i sɔ sa’n wie.
AMUN YO NGA NIAN: Amun bo sa kun m’ɔ juli’n, i su kle amun wa’n naan amun koko su yalɛ. Wienun-ɔn, be su kan sran wie mɔ be kunnin i’n i ndɛ televiziɔn’n nun. Amun kwla usɛ i kɛ: ‘Wafa nga sran wie’m be kpɔ be wiengu mɔ be yo be tɛ’n, ɔ yo sro. ?Kɛ a niɛn sa’n, ngue ti yɛ be yo sɔ-ɔ?’
“Sɛ ba’m be siman sa ng’ɔ ti kpa’n nin sa ng’ɔ ti tɛ’n, be su kwlá faman ajalɛ ng’ɔ ti kpa’n.”—Brandɔnun.
An kle be kɛ maan be wiengu ndɛ lo be. Ba kanngan mun bɔbɔ’n, be kwla suan aɲinyiɛ nin sran i kwla yolɛ. Fluwa kun seli kɛ: “Sɛ ba’m be awlofuɛ mun, nin be wiengu suklu ba mun, ɔ nin be mantanfuɛ’m be ndɛ lo be’n, kɛ bé yó like’n, be su buman be ngunmin be wun akunndan. Sanngɛ, bé yó be wiengu’m be ye.”
AMUN YO NGA NIAN: Awlo lɔ’n, amun man ba’m be junman wie mɔ be kwla di mɔ be wiengu’m be kwla ɲan su ye’n.
“Sɛ dɔ nga su e kle ba mun awlo nun junman dilɛ’n, kɛ be ngunmin bé wá trán’n, i sɔ yolɛ su yoman kekle be sa nun.”—Tara.
