YASUA NIN I YI BE LIƐ
3: An bu amun wiengu sran
?I BO’N YƐLE BENIN?
Yasua nin bla nga be bu be wiengu sran’n, kannzɛ bɔbɔ ndɛ tɔ be afiɛn’n, be kle kɛ be wiengu kun’n i ndɛ lo be. Fluwa kun se kɛ: “Be nun wie fi jrɛnmɛn i ndɛ liɛ’n su cinnjinnjin. Sanngɛ, be koko sa ng’ɔ juli’n i su yalɛ. Be sie be su be wiengu kun’n i nuan bo. Kpɛkun, like ng’ɔ kwla yo be nɲɔn’n be ye’n, be nuan sɛ su.”
NDƐ NGA BIBLU’N KAN’N: “Sran ng’ɔ klo sran’n, [...] ɔ bumɛn i ngunmin i wun akunndan.”—1 Korɛntifuɛ Mun 13:4, 5.
“N bu min yi’n i sran. Yɛ n yoman like ng’ɔ kwla saci e afiɛn’n. I sɔ mɔ n yo’n, ɔ kle kɛ min ɲin yi i.”—Mika.
?NGUE TI YƐ I SƆ’N TI CINNJIN-ƆN?
Sɛ yasua nin bla kun be ɲin yiman be wiengu’n, kɛ bé kókó yalɛ wie’n, be kwla kan be wiengu kun’n i ndɛ tɛ, annzɛ be kwla yo i finfin. Fluwa sifuɛ wie’m be waan sɛ yasua kun nin i yi’n be yo sɔ’n, ɔ cɛman naan b’a yra.
“Sɛ a di ɔ yi’n i asanse, annzɛ a fɛ i yiyi ɔ ɲin su’n, ɔ su bumɛn i wun sran kun. Yɛ ɔ su lafiman ɔ su kun. Ɔ maan, amun afiɛn sáci.”—Brayanin.
LIKE NGA AMUN KWLA YO’N
AMUN BU KOSAN NGA’M BE AKUNNDAN
Lemɔcuɛ kwlaa nun’n, usa ɔ wun kɛ:
-
‘?N ijɔli min yi’n annzɛ min wun’n i kpɛ sunman, annzɛ kusu n yoli i mo?’
-
‘?Wafa sɛ yɛ n kleli min yi’n annzɛ min wun’n kɛ min ɲin yi i-ɔ?’
AMUN KOKO NDƐ NGA’M BE SU YALƐ
-
?Ngue yɛ amun klo kɛ amun wiengu kun’n yo-ɔ? ?Annzɛ ndɛ benin yɛ amun klo kɛ ɔ kan naan amun a wun kɛ i ɲin yi amun-ɔn?
-
?Ngue yɛ kɛ amun wiengu kun’n yo annzɛ ndɛ benin yɛ kɛ ɔ kan’n, amun bu i kɛ i ɲin yiman amun-ɔn?
LIKE NGA AMUN KWLA YO’N
-
Maan amun tinuntinun amun klɛ like nga amun kunndɛ kɛ amun wiengu kun’n yo naan amun a wun kɛ i ɲin yi amun’n fluwa su. Kpɛkun, amun fa mɛn i. Ndɛ nga amun wiengu kun’n klɛli’n, amun yo i nuan su like.
-
Amun klɛ amun wun’n annzɛ amun yi’n i nzuɛn nga amun klo i’n. Kpɛkun, amun kan kle i kɛ amun klo i nzuɛn sɔ’n.
“N yo ninnge wie mun n fa kle min wun’n kɛ n bu i sran, naan n klo kɛ i klun jɔ. Wie liɛ’n, ninnge kanngan wie mun yɛ n yo-ɔ. Sanngɛ, kɛ n yo sɔ’n, ɔ wun kɛ min ɲin yi i.”—Meganin.
I kwlaa yoli o, nán e bɔbɔ yɛ é sé kɛ e ɲin yi e wun’n annzɛ e yi’n niɔn. Ɔ fata kɛ i bɔbɔ wun i wlɛ kɛ e ɲin yi i.
NDƐ NGA BIBLU’N KAN’N: “Maan amun si sran aunnvɔɛ, amun yo sran ye, amun yo wun ase kanfuɛ, amun yo wɛtɛɛfuɛ, kpɛkun amun tra amun awlɛn.”—Kolɔsufuɛ Mun 3:12.
