?A KWLA YO LIKE KUN NAAN CƐN WIE LELE’N, Ɔ LIƐ’N W’A YO YE? Sran wie’m be bu i kɛ sa nga be ju e su’n, ɔ nin nga bé jú e su e ɲrun lɔ’n, Ɲanmiɛn w’a dun mmua w’a siesie be, naan e kwlá yoman like fi kun. Sɛ be yo like wie naan i bo’n guaman kɛ be sunnzunnin’n sa’n, be se kɛ: “Ɲanmiɛn sa nun sa-ɔ.”

Sran wie’m be liɛ’n, kɛ be wun kɛ sran mianmianlɛ nin sran lufle bulɛ’n kwlá wieman’n, be sa sin bubu be. Sran sɔ’m be yo like kwlaa nga be kwla yo naan b’a di aklunjɔɛ titi’n. Sanngɛ, be wun kɛ alɛ’n, nin sran kunlɛ’n, nin sanvuɛsa mun, nin tukpacɛ ti’n, like nga be sunnzun’n i nuan yiaman. Ɔ maan, be se be wun kɛ: ‘?Ngue ti yɛ é kó klé e wun yalɛ ekun-ɔn?’

Wie liɛ’n, sa wie’m be ti’n, like nga e yo’n i bo guaman kɛ nga e fa sunnzunnin’n sa. (Akunndanfuɛ’n 9:11) Sanngɛ, sɛ e kunndɛ kɛ é ɲán ninnge nga cɛn wie lele Ɲanmiɛn waan ɔ́ yó mán sran mun’n, e kwla fa ajalɛ wie mun naan y’a kwla ɲan wie. Biblu’n kle sɔ weiin.

Kɛ Izraɛlifuɛ’m bé wá wlú mɛn nga Ɲanmiɛn seli kɛ ɔ́ fá mán be’n nun’n, Moizi m’ɔ din be ɲrun’n, ɔ seli be kɛ: “M’an fa nguan’n nin wie’n, yɛ muae nin ɲrɛnnɛn’n m’an sie amun ɲrun.[...] Amun nin amun osu’n nunfuɛ mun, amun fa nguan’n naan amun ka nguan nun. I lɛ nun’n, maan amun klo Zoova m’ɔ ti amun Ɲanmiɛn’n, amun fɛ i nuan ndɛ’n su, amun fa amun wun be mɛntɛn i.”—Mmla’n 30:15, 19, 20.

‘M’an fa nguan’n nin wie’n, yɛ muae nin ɲrɛnnɛn’n m’an sie amun ɲrun. Amun fa nguan’n.” —Mmla’n 30:19.

Kɛ Ɲanmiɛn deli Izraɛlifuɛ mun Eziptifuɛ’m be sa nun’n, ɔ seli be kɛ ɔ́ mán be mɛn klanman kun naan be klun jɔ. Sanngɛ, ɔ fata kɛ be yo like kun naan b’a kwla ɲɛn i kwlaa sɔ’n. Ɔ fata kɛ be “fa nguan’n.” Yɛle kɛ, maan be ‘klo Ɲanmiɛn’n, be fɛ i nuan ndɛ’n su, be fa be wun mɛntɛn i.’

Andɛ’n, ɔ fata kɛ e fa ajalɛ kɛ ngalɛ sa’n wie. Ajalɛ nga é fá’n, yɛ maan é ɲán nguan m’ɔ leman awieliɛ’n annzɛ e su ɲɛnmɛn i-ɔ. Sɛ e klo Ɲanmiɛn, e fɛ i nuan ndɛ’n su, naan e fa e wun e mɛntɛn i’n, yɛ é klé kɛ y’a fa nguan’n niɔn. Ɔ maan, cɛn wie lele’n, é ɲán nguan m’ɔ leman awieliɛ’n asiɛ’n su.

Ɲanmiɛn i nzuɛn’m be nun cinnjinfuɛ’n, yɛle sran klolɛ’n. Ɲanmiɛn maan akoto Zan klɛli kɛ: “Ɲanmiɛn ti klolɛ.” (1 Zan 4:8) I sɔ’n ti, kɛ be usali Zezi kɛ mmla’n i nun dan’n yɛle benin’n, ɔ tɛli su kɛ: “Fa ɔ awlɛn’n kwlaa, ɔ nin ɔ nguan’n kwlaa, ɔ nin ɔ akunndan’n kwlaa fa klo Zoova m’ɔ ti ɔ Ɲanmiɛn’n.” (Matie 22:37) Ɔ maan, nán srolɛ mɔ sran kun sro Ɲanmiɛn’n, i ti yɛ ɔ fata kɛ ɔ su i-ɔ. Asa kusu’n, ɔ fataman kɛ e su Ɲanmiɛn e ti ble nun. Sanngɛ ɔ fata kɛ klolɛ mɔ e klo i’n ti yɛ e su i-ɔ. ?Ngue ti yɛ ɔ fata kɛ e klo Ɲanmiɛn-ɔn?

Klolɛ nga Zoova fa klo klɔ sran mun’n, ɔ ti kɛ klolɛ nga siɛ kun fa klo i mma mun’n sa. Fɔ o siɛ’m be nun. Sanngɛ, siɛ nga be klo be mma mun’n, be kle be like, be wla be fanngan, be suan be bo, yɛ be kle be ngwlɛlɛ. Afin, be kunndɛ kɛ be mma’m be liɛ’n yo ye naan be klun jɔ. Siɛ’m be kusu, be kunndɛ kɛ be mma’m be klo be wie, yɛ be fa ndɛ nga be kan  kle be’n su. E Si Ɲanmiɛn yoli ninnge kpanngban mannin e. Ɔ kunndɛ kɛ e kle kɛ e si ye.

Sɛ e waan é fá Ɲanmiɛn i nuan ndɛ’n su’n, ɔ fata kɛ e si ndɛ ng’ɔ kan’n. Ɲanmiɛn kanman ndɛ kleman e trele. Ndɛ ng’ɔ kan’n, ɔ o Biblu’n nun. I sɔ’n ti, maan e kanngan nun, yɛ e nanti i nun ndɛ’n su.—1 Zan 5:3.

Cɛn kun’n, Zezi kannin ndɛ kun m’ɔ kle kɛ Ɲanmiɛn i ndɛ’n i su falɛ’n ti cinnjin-ɔn. Ɔ seli kɛ: “Nán aliɛ ngunmin yɛ ɔ kwla yo maan sran tran nguan nun-ɔn.” (Matie 4:4) Aliɛ ti cinnjin man e. Sanngɛ Ɲanmiɛn nuan ndɛ’n ti cinnjin tra aliɛ’n. Famiɛn Salomɔn seli kɛ: “Ngwlɛlɛ’n sasa sran, sika’n kusu sasa sran. Sanngɛ sa nga ti yɛ sa silɛ’n ti kpa’n yɛ: Ngwlɛlɛ’n sasa ngwlɛlɛfuɛ’n i nguan’n.” (Akunndanfuɛ’n 7:12) Sɛ e si Ɲanmiɛn naan e fa ngwlɛlɛ ng’ɔ kle e’n su’n, e kwla sasa e wun mɛn tɛ nga nun. Asa ekun’n, e kwla fa ajalɛ kpa naan cɛn wie lele y’a ɲan anannganman nguan.

Ndɛ akpasua ng’ɔ sinnin lɛ’n nun’n, e kannin atin fii nin atin tɛtrɛ’n be su sunnzun ase kun mɔ Zezi fali’n i ndɛ. Ɔ seli kɛ: “Anuan ng’ɔ ti fii’n nin akpɔ ng’ɔ ti kaan’n, be agualiɛ’n yɛle nguan’n. Yɛ be nga be wun i’n, b’a sɔnman.” (Matie 7:13, 14) Kɛ é sín atin fii nun’n, sɛ e kunndɛ kɛ é jú i agualiɛ mɔ yɛle nguan m’ɔ leman awieliɛ’n, ɔ fata kɛ e su sran ng’ɔ kle e atin’n su trele. Yɛ maan e mɛntɛn i koko. I sɔ’n kle kɛ ɔ ti cinnjin kɛ e fa e wun mantan Ɲanmiɛn kpa. (Jue Mun 16:8) ?Wafa sɛ yɛ e kwla yo sɔ-ɔ?

Cɛn kwlakwla’n, ninnnge wie’m be o lɛ’n, ɔ ti cinnjin kɛ e yo be. Yɛ ninnge kpanngban wie’m be o lɛ mɔ e bɔbɔ e klo kɛ é yó be-ɔ. Ninnge sɔ’m be yolɛ’n kwla fa e blɛ dan. Ɔ maan, sɛ y’a nianman e wun kpa’n, e su ɲanman blɛ e yoman ninnge nga Ɲanmiɛn waan e yo be’n. I sɔ’n ti, Biblu’n se e kɛ: “An nian wafa nga an fa nanti’n i su kpa titi, naan amun a nantiman kɛ sinnglinfuɛ mun sa. Sanngɛ an nanti kɛ ngwlɛlɛfuɛ mun sa. An fa amun blɛ’n fa yo ninnge nga be ti cinnjin’n, afin blɛ nga e o nun yɛ’n ti tɛ.” (Efɛzifuɛ Mun 5:15, 16) Sɛ Zoova i sulɛ’n ti e cinnjin tra like kwlaa’n, e nin i e afiɛn mántan.—Matie 6:33.

Sa nga be juli ɔ su laa’n, a leman be yowlɛ kun. Sanngɛ, a kwla fa ajalɛ wie mun naan cɛn wie lele’n a nin ɔ awlofuɛ mun amun liɛ’n w’a yo ye. Biblu’n kle kɛ e Si Ɲanmiɛn Zoova klo e dan. Yɛ ɔ kle e like ng’ɔ kunndɛ kɛ e yo’n. I nuan ijɔfuɛ Mise seli kɛ:

“Ee, klɔ sran, Zoova kannin sa ng’ɔ ti kpa’n i ndɛ kleli wɔ. ?Ngue yɛ ɔ kunndɛ kɛ a yo-ɔ? Like kunngba ng’ɔ kunndɛ’n yɛle kɛ a yo sa i nuan su sɛsɛ, a klo seiin nantilɛ’n, yɛ a kan ɔ wun ase naan a nin ɔ Ɲanmiɛn’n be nanti!”—Mise 6:8.

?Á fá atin nga Zoova kle wɔ’n su naan w’a ɲan like nga i waan ɔ́ fá mán be nga be fɛ i atin’n su’n wie? Ɔ fata kɛ a fa ajalɛ kun.