Kɛ Ikrɛnin lɔ alɛ’n boli i bo’n, afuɛ 2023 Fevrie i le 24 m’ɔ ti Ya cɛn’n, ɔ ti i afuɛ kun. Fluwa sifuɛ wie’m be waan Ikrɛnin nin Risi sonja kɔe 300.000 be wuli annzɛ like yaya yoli be. Asa ekun’n, be waan sran kɔe 30.000 mɔ be timan sonja’n be wuli alɛ sɔ’n nun. Sanngɛ kɛ e niɛn i sa’n, be nga be wuli’n be sɔnnin tra ngalɛ’n.

 Sanngɛ ng’ɔ yo ya’n yɛle kɛ sran fi siman blɛ nga alɛ sɔ’n wíe-ɔ.

•   Afuɛ 2023, Fevrie i le 19 su’n, be kɛnnin i aladio kun nun kɛ: “Kɛ Risi lɔ sonja’m be wluli Ikrɛnin nvle’n nun’n, i afuɛ kun yɛ. Sanngɛ lele nin andɛ’n, like fi kleman kɛ alɛ sɔ’n ɔ́ wíe. Be wunman be bue nɲɔn’n be nun kun ng’ɔ su kwla-ɔ. Yɛ kusu like fi kleman kɛ bé wá tí be wun aniɛn.”—NPR (National Public Radio).

 Dɔ nga su’n, sran kpanngban be wla bo be wun. Afin be wun kɛ alɛ sɔ’n nin alɛ uflɛ wie’m be ti’n, sran kaka mɔ b’a yoman like fi’n be su wun be ɲrun. ?Biblu’n nun ndɛ’n kwla fɔnvɔ e? ?Cɛn wie lele’n, sran’m be su kunman alɛ kun?

 Biblu’n kan alɛ kun i ndɛ. Alɛ sɔ’n su yoman sran’m be abɔlɛ, sanngɛ ɔ́ yó maan bé ɲán be ti. Be flɛ alɛ sɔ’n kɛ Aamagedɔn alɛ’n. Biblu’n se kɛ ɔ ti ‘Ɲanmiɛn m’ɔ Kwla Like Kwlaa Yo’n i cɛn dan’n nun alɛ.’ (Sa Nglo Yilɛ 16:14, 16) Alɛ sɔ’n nun’n, Ɲanmiɛn wá núnnún klɔ sran’m be awa mun. Afin alɛ fanunfanun nga be kpɛli be ba’n be ti’n, sran kpanngban be wun be ɲrun. Sɛ a kunndɛ kɛ á sí wafa nga Aamagedɔn alɛ’n wá yó maan fɔundi’n trán asiɛ’n su tititi’n, kanngan ndɛ nga’m be nun:

•   “?Ngue yɛle Aamagedɔn alɛ’n?”

•   “Aamagedɔn alɛ’n ti ndɛ fɛ”