Nga Zan klɛli’n 2:1-25
2 I cɛn nsan su’n, be dili aja kun i ti cɛn Kana m’ɔ o Galile mɛn’n nun lɔ’n su. Kɛ ɔ́ yó sɔ’n nn Zezi i nin’n o lɛ.
2 Be yiali Zezi nin i sɔnnzɔnfuɛ mun cɛn dilɛ sɔ’n i bo wie.
3 Kɛ be duvɛn’n wá wíe’n, Zezi i nin’n seli i kɛ: “Be leman duvɛn kun.”
4 Sanngɛ Zezi seli i kɛ: “?Mmo, e ndɛ o nun?* Min blɛ* liɛ’n nin-a juman.”
5 I nin’n seli be nga be man sran’m be aliɛ mɔ be su nzan’n be kɛ: “Like kwlaa ng’ɔ se amun kɛ amun yo’n, amun yo.”
6 Kɛ nga Zifu’m be wun sanwun yolɛ’n i su mmla’n se kɛ be yo’n sa’n,+ yɔbuɛ sɛ nsiɛn mɔ be gua be nun nzue’n, be takataka lɛ. Sɛ kun kwla ju litri ablanan-nin-nnan (44), annzɛ ablesiɛn-nin-nsiɛn (66).
7 Zezi seli be kɛ: “An gua sɛ’m be nun nzue.” Be guali be nun nzue lele be yili sɛsɛsɛ.
8 Yɛ ɔ seli be kɛ: “An sa wie ko man aja’n i sunianfuɛ’n.” Yɛ be sali be ɔli-ɔ.
9 Aja’n i sunianfuɛ’n wɔli nzue m’ɔ kacili duvɛn’n su. Ɔ siman lika ng’ɔ fin’n (sanngɛ be nga be sali nzue’n, be liɛ be si i). Yɛ ɔ flɛli bian ng’ɔ su ja bla’n niɔn.
10 Ɔ seli i kɛ: “Sran kwlaa dun mmua fa duvɛn’n i kpafuɛ’n man ka. Kpɛkun kɛ sran’m be ko bo’n, i sin yɛ ɔ fa ng’ɔ yoman fɛ’n man-ɔn. Ɔ liɛ’n, a fɛli i kpafuɛ’n sieli i siɛn lele dɔ nga su.”
11 Kana m’ɔ o Galile asa’n su lɔ’n i su yɛ Zezi yoli sa sɔ’n niɔn. Sa sɔ’n ti abonuan sa ng’ɔ yoli be’n, be nun klikli’n. Ɔ yili i aɲrunɲan’n i nglo.+ Ɔ maan i sɔnnzɔnfuɛ’m be lafili i su.
12 I sin’n, ɔ nin i nin, ɔ nin i niaan mun+ nin i sɔnnzɔnfuɛ’m be ɔli Kapɛɛnaɔmun.+ Sanngɛ b’a cɛman lɔ.
13 Kɛ Zifu’m be Delɛ Cɛn’n+ mantannin koko’n, Zezi ɔli Zerizalɛmun.
14 Ɔ wunnin be nga be su yo nannin nin bua nin auble+ atɛ’n, ɔ nin sika kacifuɛ mɔ be titi be bia’m be su’n Ɲanmiɛn sua’n nun lɔ’n.
15 Ɔ maan ɔ fali ɲanman wɔli ngble, yɛ ɔ fa fuannin bua nin nannin mun, ɔ nin be atɛ yofuɛ mun Ɲanmiɛn sua’n nun. Ɔ utuli sika kacifuɛ’m be sika mma mun, kpɛkun ɔ suli be tabli’m be bo guali.+
16 Kpɛkun ɔ seli auble atɛ yofuɛ’m be kɛ: “An isa ninnge nga mun fite lɔ! Nán amun fa min Si i sua’n kaci aata diwlɛ!”+
17 Yɛ i sɔnnzɔnfuɛ’m be wla kpɛnnin su kɛ be klɛli i kɛ: “Ɔ sua’n i klolɛ’n yráyrá min klun lɔ kɛ sin sa.”+
18 I sɔ’n ti’n, Zifu’m be seli i kɛ: “?Ngue yɛ a kwla yo fa kle e+ kɛ a le atin yo ninnge nga a yoli be lɛ mun-ɔn?”
19 Yɛ Zezi seli be kɛ: “An bubu Ɲanmiɛn sua nga. Ń fá cɛn ba nsan ń kplɛ́n i uflɛ.”+
20 Kpɛkun Zifu’m be seli i kɛ: “Ɲanmiɛn sua nga i kplanlɛ’n, ɔ dili afuɛ ablanan-nin-nsiɛn (46). ?Kpɛkun ɔ liɛ’n, cɛn nsan cɛ yɛ á fá kplán-ɔn?”
21 Sanngɛ Ɲanmiɛn sua’n i ndɛ ng’ɔ kɛnnin i lɛ’n, i bɔbɔ i wunnɛn’n i ndɛ yɛ ɔ su kan-ɔn.+
22 I sɔ’n ti’n, kɛ be cɛnnin i’n, i sɔnnzɔnfuɛ’m be wla kpɛnnin su kɛ ɔ kannin ndɛ sɔ’n titi.+ Ɔ maan be lafili Ɲanmiɛn ndɛ’n, ɔ nin Zezi i ndɛ ng’ɔ kannin’n be su.
23 Delɛ Cɛn’n nun mɔ Zezi o Zerizalɛmun lɔ’n, sran kpanngban be lafili i su.* Afin be wunnin abonuan sa ng’ɔ yoli be’n.
24 Sanngɛ Zezi w’a lafiman be su, afin ɔ si be kwlaa kpan.
25 Asa ekun’n, w’a mianman kɛ be kan akunndan nga klɔ sran bu’n i ndɛ be kle i. Afin i bɔbɔ si klɔ sran’n i klun akunndan’n.+
Ja ngua lɔ ndɛ mun
^ Glk., “?Mmo, ndɛ onin yɛ ɔ o e nin wɔ e afiɛn-ɔn?” Kɛ sran kun kan sɔ’n, ɔ su kle kɛ ndɛ’n timɛn i liɛ su. Kɛ ɔ se kɛ ‘mmo’n’ i sɔ’n kleman kɛ i ɲin yimɛn i.
^ Glk., “dɔ.”
^ Glk., “be lafili i dunman’n su.”
