Jue Mun 73:1-28
Azafu i jue-ɔ.+
73 Ɲanmiɛn ti kpa man Izraɛli, ɔ ti kpa man be nga be awlɛn’n nun ti sanwun’n.+
2 Min liɛ’n, ɔ ka kan naan min ja’m b’a fa atin tɛ su.
Ɔ ka kan naan min ja’m b’a seli.+
3 Afin kɛ n wun aunjɔɛ nga klunwifuɛ’m be di’n,+min ɲin bloli wun tufuɛ’m* be wun.
4 Afin kɛ bé wú’n be fɛman.
Be wunnɛn’n wo be wun.+
5 Be kokoman kɛ sran onga mun sa,+yɛ be fɛman kɛ sran onga mun sa.+
6 I sɔ’n ti’n, wun tulɛ’n ti be kɔmin ɲanman.+
Nzaje sa yolɛ’n wla be wun kɛ tralɛ sa.
7 Be aɲanbeun ninnge’m be ti’n be ɲinma’m b’a fite cɔlɔcɔlɔɔ.
Ninnge nga b’a ɲɛn i’n ɔ tra nga be sunnzunnin i be awlɛn’n nun lɔ’n lelele.
8 Be yo sran’m be finfin, yɛ be kan ndɛ tɛtɛ.+
Be yo be wun dandan, be se sran’m be kɛ bé klé be ɲrɛnnɛn.+
9 Bɛ ijɔ kɛ be ti’n to ɲanmiɛn’n sa.
Yɛ be taaman’n ɲinmɛnɲinmɛn i wun asiɛ’n su.
10 Ɔ maan Ɲanmiɛn i sran’m be kpɛli be ɲin be su lɔ,yɛ be nɔnnin be nzue kpanngban’n wie.
11 Be se kɛ: “?Ɲanmiɛn yo sɛ yɛ ɔ si nun-ɔn?+
?Ɲanmiɛn m’ɔ o Like Kwlaa Ti Su’n ɔ si nun?”
12 Nanwlɛ, kɛ klunwifuɛ mɔ like fi kleman be yalɛ’n be ti sɔ-ɔ.+
Yɛ be aɲanbeun’n yo dan kɔ i ɲrun titi.+
13 Kannzu min ɲin mɔ n miannin naan min awlɛn’n yo sanwun’n,ɔ nin min sa mɔ n wunnzinnin nun n fa kleli kɛ n yoman sa tɛ’n ɔ ti ngbɛn.+
14 Aliɛ ba kwlaa nun’n n koko.+
Nglɛmun kwlaa’n be tumin fɔ.+
15 Sanngɛ sɛ ɔ ti kɛ n kannin ndɛ sɔ mun’n,nn ɔ ti kɛ m’an kpɛ ɔ nvlefuɛ’m be bo waka sa.
16 Kɛ n kunndɛli kɛ ń wún sa sɔ’n i wlɛ’n,ɔ sanngannin min akunndan’n
17 lele saan kɛ n wluli Ɲanmiɛn i sua’n nun lɔ’n,yɛ n wunnin sa ng’ɔ́ wá jú be su’n niɔn.
18 Nanwlɛ, w’a fa be w’a sie i lika kun m’ɔ yo ndrɔn’n nun.+
A yo maan be liɛ wie mlɔnmlɔn.+
19 Bé ká lɛ bé núnnún kpɛ kunngba!+
Be su mantan be awieliɛ m’ɔ́ wíe be tɛ’n, m’ɔ́ ká lɛ tɔ́ be su kpɛ kunngba’n!
20 Ee Zoova, kɛ á wá tinnge’n, á kpálo be,*
kɛ sran kun w’a cɛn laliɛ w’a wie naan w’a tinnge sa.
21 Sanngɛ min awlɛn’n beli min klun,+yɛ min klun lɔ’n* yrali min sa fiaan.
22 N dili sinnzin, m’an yoman ngwlɛlɛfuɛ.
N yoli kɛ nnɛn mɔ be siman ngwlɛlɛ’n sa ɔ ɲrun.
23 Sanngɛ siɛn’n e nin wɔ e o nun titi,a trali min sa fama’n.+
24 A man min afɔtuɛ fa kle min atin,+Kpɛkun i sin’n, á wá yó maan ń ɲán ɲrun.+
25 ?Wan yɛ n le i ekun ɲanmiɛn su lɔ-ɔ?
Yɛ kɛ mɔ e nin wɔ e o nun’n ti’n, n kunndɛman like fi asiɛ’n su.+
26 Min wunnɛn’n nin min awlɛn’n be kwla fɛ,Sanngɛ Ɲanmiɛn ti min awlɛn’n i yɔbuɛ, i yɛ ɔ ti min like liɛ nga n le i’n tititi-ɔ.+
27 Nanwlɛ, be nga be nin wɔ be afiɛn ti nun’n, be liɛ wíe.
Be kwlaa nga be nin wɔ nantiman klanman’n,* á wá núnnún be.*+
28 Sanngɛ min liɛ’n, min wun mɔ n fa mantan Ɲanmiɛn’n ɔ ti kpa man min.+
N fali Zoova m’ɔ ti min Min m’ɔ Sie Like Kwlakwla’n n fa yoli min fiawlɛ,naan ń kán ninnge ng’ɔ yo be’n be ndɛ.+
Ja ngua lɔ ndɛ mun
^ Annzɛ “nuan difuɛ mun.”
^ Ebr., “á wá yó be wawɛ’n i finfin.”
^ Ebr., “min aklɛnzia’n nun lɔ’n.”
^ Annzɛ “be bo tekle’n.”
^ Ebr., “á wá káta be nuan’n su.”
