Zɔbu 9:1-35
9 Zɔbu tɛli su kɛ:
2 “N si kɛ kɛ ɔ ti sɔ-ɔ.?Sanngɛ sɛ klɔ sran nin Ɲanmiɛn be ɲan ndɛ’n, sran’n i ndɛ kwla yo fɛ?+
3 Sɛ sran kun waan ɔ nin i bé sí akplowa’n,*+naan ɔ usa kosan akpi’n (1.000), sran’n su kwlá tɛman ba kun sa su.
4 Ɔ si ngwlɛlɛ,* yɛ i tinmin’n cɛnnin.+?Wan yɛ ɔ kwla jrɛn i ɲrun m’ɔ́ fíte nun-ɔn?+
5 Ɔ tu oka’m be bo sie be lika uflɛ,* sran fi siman nun.Kɛ ɔ ko fa ya’n, ɔ kaci be guɛ i lɔ.
6 Ɔ kejekeje asiɛ’n lele ɔ jaso i tranwlɛ’n nun,kpɛkun i ja’m be keje.+
7 Ɔ se wia’n kɛ nán maan ɔ kpaja,yɛ ɔ kata nzraama’m be kpajalɛ’n su.+
8 I ngunmin yɛ ɔ trɛ ɲanmiɛn ng’ɔ la nglo lɔ plaii’n nun-ɔn.+Kɛ jenvie’n man sukendengleiin’n, i suyɛ ɔ nanti-ɔ.+
9 Ɔ yi nzraama akpasua nga be flɛ be kɛ Asi,* nin Kesili,* nin Kima’n,*+ɔ nin nzraama akpasua nga be o ɲanmiɛn’n i ngua lɔ’n.*
10 Ninnge dandan ng’ɔ yo be’n, be tra klɔ sran kpɛn,+abonuan sa ng’ɔ yo be’n, be kwlá kaman be.+
11 Ɔ sin min wun lɛ, sanngɛ n kwlá wunmɛn i.Ɔ sin min ɲrun lɛ, sanngɛ n siman kɛ i-ɔ.
12 ?Kɛ ɔ tra like kun’n, wan yɛ ɔ kwla jrɛn i ɲrun-ɔn??Wan yɛ ɔ kwla se i kɛ: ‘Ngue yɛ a su yo-ɔ’?+
13 Ɲanmiɛn yí i ya’n i nglo.+Raabu* i ukafuɛ mun+ bɔbɔ bé kóto i bo.
14 ?Yɛ kɛ ń tɛ́ i su’n nin?Kɛ e nin i é sí akplowa’n, ɔ fata kɛ n bu min ndɛ’n i sin kpa naan m’an kan.
15 Sɛ min ndɛ yo fɛ bɔbɔ’n, n su tɛmɛn i su.+Srɛlɛ yɛ ń srɛ́ min jɔlɛ difuɛ’n* kɛ ɔ si min aunnvɔɛ-ɔ.
16 ?Sɛ n kpan flɛ i’n, ɔ́ tɛ́ min su li?N bumɛn i kɛ ɔ́ tí min nɛn’n.
17 Afin ɔ wɛtɛ min kɛ aunmuan dan wie sa,yɛ ɔ uka min ɲrɛnnɛn’n su lelele, kusu nn m’an yoman like fi.+
18 Ɔ yaciman min diin naan m’an lo wunmiɛn.Ɔ fa afɛ’n yi min su sa trilili.
19 Sɛ ɔ ti tinmin ndɛ’n, i yɛ ɔ le wunmiɛn-ɔn.+Sɛ ɔ ti jɔlɛ dilɛ ndɛ’n, ɔ se kɛ: ‘?Wan yɛ ɔ kwla usa min sa-ɔ?’*
20 Kannzɛ min ndɛ yo fɛ’n, min bɔbɔ min nuan’n bú min fɔ.Kannzɛ bɔbɔ n nanti seiin’n,* ɔ́ sé kɛ n fɔnnin.*
21 Kannzɛ bɔbɔ n nanti seiin’n,* n siman sa ng’ɔ kwla ju min su’n.Nguan nun tranlɛ’n w’a flan min.
22 Ngbaciɛ nunman be afiɛn. I ti yɛ n se kɛ:‘Be nga b’a yoman sa-o,* i klunwifuɛ-o, ɔ kun be.’
23 Sɛ nzue’n di lika’n naan ɔ fu sran’m be nun ɔ kun be’n,ɲrɛnnɛn ng’ɔ tɔ sran nga w’a yoman sa’n i su’n kle i srilɛ.
24 Be fali asiɛ’n wlali klunwifuɛ’m be sa nun.+Ɔ kata jɔlɛ difuɛ’m be ɲin.*?Sɛ nɛ́n i’n, nn wan-ɔn?
25 Siɛn’n, min cɛn’m be kɔ ndɛndɛ tra wanndifuɛ.+Be wunman like kpa, sanngɛ be wanndi.
26 Be kɔ piaa kɛ mmeli nga be fali ndɛma yoli’n sa,kɛ anunman ɲin mɔ be su jra nnɛn’m be su’n sa.
27 Sɛ n se kɛ: ‘Min wla fí min ngokɔɛ’n,ń yáci min ɲrun mlanlɛ naan ń srí’n,’
28 srɛ kún min titi ɲrɛnnɛn nga n wun i’n ti,+yɛ n si kɛ a su seman kɛ m’an yoman sa.
29 Bé sé kɛ n fɔnnin.*?Ɔ maan ngue ti yɛ ń kó klé min wun yalɛ-ɔ?+
30 Sɛ n fa laglasi m’ɔ fin nglo lɔ gua munkɛnmunkɛn mɔ w’a klo’n n wunnzin’n,naan n fa sanmlan* n wunnzin min sa nun naan ɔ yo yɛiin’n,+
31 á fá min jrá kunman kun nun.Ɔ maan min tralɛ mun bɔbɔ bé kpɔ́ min.
32 Afin ɔ timan sran kɛ min sa naan se kɛ ń tɛ́ i su,naan e nɲɔn’n y’a ɔ jɔlɛ difuɛ’m be ja su.+
33 Sran fi nunman lɛ naan w’a kpɛ e afiɛn ndɛ’n nun,*naan w’a yo e jɔlɛ difuɛ.*
34 Sɛ ɔ yaci min bolɛ’n,*naan ɔ fɛmɛn i ninnge sroesroe mun wlanwlanman min kun’n,+
35 i liɛ’n, ń kán ndɛ klé i-ɔ, srɛ su kunman min.Afin n wunman sa nga ti yɛ srɛ kó kún min naan m’an ijɔman’n.
Ja ngua lɔ ndɛ mun
^ Annzɛ “ɔ fɛ i kɔ jɔlɛ difuɛ’m be ja su’n.”
^ Ebr., “Ɔ si ngwlɛlɛ i awlɛn’n nun lɔ.”
^ Annzɛ “Ɔ yi oka mun.”
^ Atrɛkpa’n, nzraama akpasua nga be flɛ i kɛ Ursu Dan’n i ndɛ yɛ be kan-ɔn.
^ Atrɛkpa’n, nzraama akpasua nga be flɛ i kɛ Oriɔn’n i ndɛ yɛ be kan-ɔn.
^ Atrɛkpa’n, Akɔta nin i Mma mun-ɔn. Be o nzraama akpasua nga be flɛ i kɛ Toro’n nun.
^ Ebr., “ngua lɔ sua ba mun.”
^ Atrɛkpa’n, jenvie’n nun nnɛn sroesroe kun-ɔn.
^ Be kwla se ekun kɛ “min kpɔfuɛ nga e nin i e ɔli jɔlɛ difuɛ’m be ja su’n.”
^ Ebr., “sanman min-ɔn.”
^ Annzɛ “Kannzɛ m’an yoman sa’n.”
^ Ebr., “n ti gblɛfuɛ.”
^ Annzɛ “Kannzɛ m’an yoman sa’n.”
^ Annzɛ “Be nga be nanti seiin’n.”
^ Ebr., “be ɲrun’n.”
^ Ebr., “n ti klunwifuɛ.”
^ Annzɛ “blɔ.”
^ Annzɛ “naan w’a jran e afiɛn.”
^ Ebr., “w’a fɛ i sa’n w’a sie i e nɲɔn’n e su.”
^ Ebr., “ɔ yi i ɲantiaan’n ng’ɔ o min su’n.”
