Nga Pɔlu klɛli Efɛzifuɛ mun’n 2:1-22
2 Asa ekun’n, kannzɛ laa’n amun wuli amun sa tɛ’m be nun’n, siɛn’n, Ɲanmiɛn maan amun a ɲan nguan.+
2 Amun sa tɛ sɔ’m be nun yɛ laa’n, amun nanti kɛ mɛn* nunfuɛ’m be sa-ɔ.+ Ɔ maan aunmuan’n m’ɔ sie sran mun’n i min’n yɛ ɔ sie amun-ɔn.+ Aunmuan sɔ’n yɛle akunndan+ nga andɛ’n ɲin keklefuɛ’m be bu mɔ maan be yo sa mun’n.
3 Laa mɔ e o be nun’n, e yo kɛ be sa. Yɛle kɛ like nga e konvi sɔ be’n,+ ɔ nin e klunklo ninnge mun, yɛ ninnge nga e bu be akunndan’n+ yɛ e yo be-ɔ. I sɔ’n ti’n, kɛ ɔ fin cɛn nga be wuli e’n, Ɲanmiɛn fali e wun ya+ kɛ ng’ɔ fali be onga’m be wun ya’n sa.
4 Sanngɛ klolɛ dan mɔ Ɲanmiɛn m’ɔ si aunnvɔɛ dan’n,+ ɔ kloli e’n ti’n,+
5 ɔ yoli maan kannzɛ e sa tɛ’m be ti’n e wuli’n, sanngɛ e nin Klisi y’a ɲan nguan likawlɛ.+ Ɔ maan i aklunye dan’n ti yɛ amun fiteli nun-ɔn.
6 I kpa bɔbɔ’n, Ɲanmiɛn cɛnnin e, yɛ ɔ mannin e tranwlɛ ɲanmiɛn su lɔ. Afin Ɲanmiɛn maan e nin Klisi Zezi y’a kaci sran wunmuan.+
7 Ɔ yoli sɔ naan mɛn* ng’ɔ́ bá lɔ’n nun’n, w’a yi i klun ufue’n i nglo e mɔ e nin Klisi Zezi y’a kaci sran wunmuan’n e lika naan w’a kle kɛ i aklunye’n ti dan naan ɔ leman wunsu.
8 Ɲanmiɛn i aklunye dan’n ti’n, amun a ɲan amun ti, i su mɔ amun lafi’n ti.+ Amun ti ɲanlɛ sɔ’n, ɔ finman amun bɔbɔ. Sanngɛ Ɲanmiɛn yɛ ɔ fɛ i sɔ’n cɛli amun-ɔn.
9 Nán like nga amun yo’n ti-ɔ.+ Kɛ ɔ ko yo naan sran fi w’a jrɛnmɛn i sɔ’n su w’a dimɛn i nuan’n ti.
10 E ti Ɲanmiɛn i sa nuan like. Ɔ yili e+ naan e nin Klisi Zezi e yo sran wunmuan+ naan e yo sa kpa mɔ Ɲanmiɛn dun mmua fa sieli e kɛ e yo’n.
11 I sɔ’n ti’n, amun mɔ amun timan Zifu’n, maan amun wla kpɛn su kɛ blɛ kun nun’n, be nga sran yɛ ɔ wlali be klɛn’n, be flɛ amun kɛ be nga b’a wlaman be klɛn’n.
12 Blɛ sɔ’n nun’n, nn amun siman Klisi, amun nin Izraɛli nvle’n be nunman nun, yɛ amun nunman aenguɛ nga Ɲanmiɛn nin i nvle’n be trali’n nun wie.+ Kɛ amun o mɛn’n nun’n, amun leman like mɔ amún fá amun wla gúa su-ɔ, yɛ amun nin Ɲanmiɛn be nunman nun.+
13 Sanngɛ siɛn’n, amun nin Klisi Zezi b’a kaci sran wunmuan. Amun mɔ laa’n amun nin Ɲanmiɛn amun afiɛn ti nun’n, siɛn’n Klisi i mmoja’n ti’n, amun afiɛn w’a mantan.
14 I yɛ maan e di fɔundi-ɔ.+ Ɔ yoli maan sran akpasua nɲɔn sɔ mun b’a kaci akpasua kun.+ Yɛ ɔ bubuli talɛ ng’ɔ o be afiɛn’n.+
15 Like ng’ɔ kpɛ ndɛ ba’n mɔ yɛle Mmla’n ɔ sacili i. I wunnɛn m’ɔ fa mannin’n, i ti yɛ i sɔ liɛ’n kwla yoli ye-ɔ. Ɔ yoli sɔ naan be akpasua nɲɔn’n be nunfuɛ mɔ be nin i be ti sran wunmuan kun’n, be kaci nvle uflɛuflɛ kun*+ naan be afiɛn sɛ.
16 Ɔ yoli sɔ ekun naan ɲrɛnnɛn waka’n* ti’n,+ ɔ́ síesíe sran akpasua nɲɔn sɔ’m be afiɛn mán Ɲanmiɛn naan be yo sran wunmuan kun. Afin i wie’n ti’n, ndɛ nunman lɛ kun.+
17 Ɔ bali, yɛ ɔ boli fɔundi’n i su jasin fɛ’n kleli amun mɔ laa’n, amun nin Ɲanmiɛn amun afiɛn ti nun’n, ɔ nin be mɔ be nin i be afiɛn mantan’n.
18 Afin i dunman nun ti’n, e mɔ e ti sran akpasua nɲɔn sɔ’m be nunfuɛ’n e kwla fa e wun mantan Siɛ’n, i wawɛ kunngba’n i fanngan nun.
19 Ɔ maan amun timan aofuɛ annzɛ nvle uflɛ nunfuɛ kun.+ Sanngɛ amun nin Ɲanmiɛn i sran mun amun nvle’n w’a yo kun.+ Yɛ amun a yo Ɲanmiɛn i awlobo’n i nunfuɛ.+
20 Sɛ amun ti sua’n, nn ń sé kɛ be kplannin amun akoto mun nin Ɲanmiɛn nuan ijɔfuɛ’m be su.+ Be yɛ be ti sua’n i bo ase mɔ be wlali’n niɔn. Yɛ Klisi Zezi yɛ ɔ ti sua’n i bo ase mɔ be wlali’n i yɔbuɛ cinnjin kpafuɛ mɔ be fa tra sua sɔ’n i cɔnjɔ’n i ase’n niɔn.+
21 Sua sɔ mɔ be kplannin’n ɔ nin i wun ninnge’m be kwlaa be sasa su sɛsɛsɛ.+ Yɛ kɛ m’ɔ nin Klisi be o nun’n ti’n, blɛblɛblɛ ɔ kaci sua kun m’ɔ ti Zoova* liɛ klonglo’n.+
22 Amun kusu, kɛ mɔ amun nin Klisi be o nun’n ti’n, be su kplan amun likawlɛ kɛ sua kun mɔ Ɲanmiɛn wawɛ’n i fanngan nun’n Ɲanmiɛn tran nun’n sa.+
Ja ngua lɔ ndɛ mun
^ Nian Ndɛ’m be bo tulɛ lika’n nun lɔ.
^ Nian Ndɛ’m be bo tulɛ lika’n nun lɔ.
^ Glk., “sran uflɛuflɛ kun.”
^ Nian Ndɛ’m be bo tulɛ lika’n nun lɔ.
