Ɲanndra Mun 7:1-27
7 Min wa, nanti min ndɛ’m be su,fa min mmla mun sie ɔ klun kpa.+
2 Nanti min mmla’m be su naan ɲan nguan.+Nian like nga n kle’n* su kpa kɛ nga a fa sasa ɔ ɲinma su sran’n sa.
3 Fa be cici ɔ sa mma’m be wun.Klɛ be ɔ awlɛn’n su kɛ be klɛ like yɔbuɛ su’n sa.+
4 Se ngwlɛlɛ’n kɛ: “A ti min niaan bla,”yɛ flɛ sa wlɛ wunlɛ’n kɛ: “Min osufuɛ.”
5 I sɔ’n dé wɔ bla ng’ɔ tranman diin’n*+ i sa nun,yɛ a su faman bla ng’ɔ ti bian kunndɛfuɛ’n* inuan nun ndɛnɛnkɛnnɛnkɛn’n* su.+
6 Kɛ n jin min sua’n i fenɛtri’n nun lɛ’n,mɔ ń níɛn i toklo’n nun’n,
7 kɛ ń nían sran nga be siman sa’n,*n wunnin kɛ gbanflɛn’m be nun kun o lɛ’n, ɔ siman ngwlɛlɛ.*+
8 Ɔ sinnin cɔnjɔ nga be bli naan b’a to mmuɛ ng’ɔ o kan bla’n tran lɛ’n, i wun koko lɛ,kpɛkun ɔ fali bla’n i awlo atin’n
9 nnɔsua nun, kɛ sɛnzɛ’n tɔ́’n.+Kɛ ɔ́ yó sɔ’n, nn lika’n su wa san, lika’n su wa lu tritritri.
10 Kpɛkun n wunnin kɛ bla kun bɛli i atin kpalɛ,ɔ wlɛwlɛli i wun kɛ tekle bla sa,*+ yɛ ɔ si sran lakalaka kpa.
11 I wlɛwlɛ liɛ’n be kanman, ɔ siman ɲannzuɛn.+Ɔ tranman* awlo mlɔnmlɔn.
12 Á nían-ɔn w’a fite, á nían ekun-ɔn, ɔ o klɔ’n i gua’m be su,ɔ sa cɔnjɔ’m be kwlaa be su lɛ sa cɛiin.+
13 Yɛ kplo, ɔ trali gbanflɛn’n niɔn, ɔ fɛli i nuan boli i fuka’n su.Ɔ tili i ɲin cuan seli gbanflɛn’n kɛ:
14 “Ɔ fata kɛ n yi bo kun yolɛ tɛ mun.+Andɛ’n, n yiali nda nga n tali’n i nuan.
15 I sɔ’n ti yɛ n bali ɔ atin kpalɛ-ɔ.N bali ɔ kunndɛlɛ, yɛ m’an wun ɔ kusu.
16 M’an sɛ min li’n su bɛ klanman kpa,lɛn ng’ɔ fin Ezipti mɔ i ɲin’n ti fanunfanun’n+ yɛ be fa yoli-ɔ.
17 N fali miri, nin aloɛsi, nin sinamɔmun n ɲrɛnɲrɛnnin i min bɛ’n su.+
18 Bla, maan e ko si sua lelele naan lika’n fa cɛn e.Maan e ko yo e wun yrɛyrɛ kpa liɛ su.
19 Afin min wun’n nunman awlo lɔ,ɔ tuli ajalɛ ɔli mmua kpa.
20 Ɔ fali sika bajɛ kun naan w’a wɔ,saan anglo ba’n w’a ta kpa yɛ ɔ́ sɛ́ i sin-ɔn.”
21 Bla’n lɛkɛlɛkɛli i lelele ɔ ɲɛnnin i.+Ɔ fɛli i nuan nun nɛnkɛnnɛnkɛn’n fa lɛkɛli i.
22 Be ja nun lɛ’n, gbanflɛn’n su su i su kɛ nannin tola wie mɔ be su kɔ i kunlɛ’n sa,kɛ sinnglinfuɛ wie mɔ b’a bo i kpanwun naan bé tú i fɔ’n sa.+
23 Ɔ suli i su lele cua kun fitili i buɛ’n.Kɛ anunman wie mɔ w’a tɔ aya nun sa’n, ɔ siman kɛ w’a fɛ i nguan’n w’a sie i wie nuan.+
24 I sɔ’n ti’n, min wa, sie ɔ su.Sie ɔ su tie ndɛ nga n kan’n i kpa.
25 Nán maan ɔ awlɛn’n kaci wɔ i sɔ bla liɛ’n su.Nán fɛ i atin liɛ’m be su.+
26 Afin be nga ɔ wiewieli be’n b’a sɔnman aɔwi,+be ng’ɔ kunnin be’n be diman be yalɛ.+
27 Sran ng’ɔ kɔ i sua’n nun lɔ’n, ɔ ti kɛ w’a jra Ndia’n* nun sa.Sran ng’ɔ kɔ lɔ’n, ɔ ti kɛ w’a fɛ i wun w’a man wie’n sa.
Ja ngua lɔ ndɛ mun
^ Annzɛ “mmla’n.”
^ Annzɛ “bian flɛlɛ ndɛ mun.”
^ Annzɛ “be fa ndɛ kwlaa su’n.”
^ Ebr., “ɔ leman awlɛn ba.”
^ Annzɛ “i wun tekle bla tralɛ.”
^ Ebr., “I ja’m be kaman.”
^ Annzɛ “Seɔlu’n.” Nian Ndɛ’m be bo tulɛ lika’n nun lɔ.
