Lomo do roha ni Saksi Jahowa asa martua keluarga, keluarga ni nasida manang keluarga ni na asing. Dipasangap hami do Debata, Sitompa keluarga. (1 Musa 2:21-24; Epesus 3:14, 15) Di Bibel, dilehon Ibana do akka prinsip na mangurupi sude keluarga asa martua.

 Marsitutu do hami mangihutton poda ni Bibel, na mangurupi hami asa lam denggan gabe tunggani doli, tunggani boru, dohot natuatua. (Poda 31:10-31; Epesus 5:22–6:4; 1 Timoteus 5:8) Poda ni Bibel pe boi mangurupi keluarga na so sahaporseaon asa martua. (1 Petrus 3:1, 2) Parrohahon ma hatorangan sian piga-piga halak na dongan saripena sahalak Saksi Jahowa:

•   “Saleleng onom taon hami marrumatangga, holan na marbadai do hami. On mambahen hami stres. Alai, dukkon si Ivete gabe Saksi Jahowa, gabe lam parholong ma ibana jala lambok. Hamubaon na binahenna on, patoguhon parsaripeonnami.”—Clauir, sian Brazil.

•   “Dang lomo rohakku tikki tunggani doliku, si Chansa, marsiajar Bibel dohot Saksi Jahowa, ala hurippu nasida mambahen sursar parumatanggaonnami. Hape, dang songon i. Diurupi Bibel do parsaripeonnami.”—Agness, sian Zambia.

 Tikki marbarita na uli, dipatorang hami do molo poda ni Bibel boi mangurupi asa

•   Marbisuk mamillit dongan saripe

•   Rade mangadopi na masa tikki baru marhasohotan

•   Denggan maradoppon simatua

•   Mangatur parhepengon

•   Unang sai marbadai

•   Rade manalpuhon hasalaan

•   Rade mangajar-ajari ianakkon

 Sipata, olo do songon i. Umpamana, mangihutton laporan taon 1998 sian lembaga riset Sofres, dipaboa molo 1 sian 20 rumatangga na so Saksi dongan saripena, sursar rumatanggana.

 Hea do Jesus mandok molo halak na mangihutton ibana ikkon mangadopi paraloan sian keluarga. (Mateus 10:32-36) Sahalak sejarawan, si Will Durant mandok, di tikki Kekaisaran Romawi “ajaran ni Kristen mambahen sursar keluarga”. a Saonari pe, didok do hata na sarupa tu Saksi Jahowa. Alai, tutu do alani Saksi gabe sursar keluarga?

 Tikki mambahen haputusan taringot kasus ni Saksi Jahowa na mambahen sursar keluarga, Mahkamah Eropa untuk Hak Asasi Manusia mandok, jotjot do anggota keluarga na so Saksi mambahen parbadaan di keluarga, ala so olo nasida “manjalo dohot mangargai haporseaon ni keluargana na Saksi”. Mahkamah i muse mandok, “Somal do on masa di keluarga na so sahaporseaon, dohot ma i Saksi Jahowa.” b Tikki adong na sogo rohana mangida haporseaon ni Saksi, marsitutu do Saksi Jahowa mangihutton poda ni Bibel, i ma, “Unang baloshon hamu na jat alo ni na jat. . . . Molo tarbahen, intap na tarpatupa hamu, tiop hamu ma dame maradophon halak saluhutna.”—Rom 12:17, 18.

 Akka Saksi mangoloi paretta ni Bibel na mandok, ikkon marhasohotan “marhitehite Tuhan i”, lapatanna, marhasohotan holan tu dongan sahaporseaon. (1 Korint 7:39) Paretta on dang holan hata-hata sambing, alai marlaba do tu hita. Umpamana, artikel taon 2010 di Journal of Marriage and Family patorakkon, molo “sahaporseaon sahalak tunggani doli dohot tunggani boruna”, somalna denggan do parumatanggaon ni nasida. c

 Alai, akka Saksi dang dijujui asa marsirang sian dongan saripena na so Saksi. Bibel mandok, “Molo so porsea (so Kristen) pardihuta ni sada dongan, unang ma dipaulak, anggo na lomo roha ni parompuan manginganhon ibana. Jala molo so porsea (so Kristen) hamulian ni sada boruboru, unang ma ditadikkon, anggo na lomo roha ni baoa i manginganhon ibana.” (1 Korint 7:12, 13) Unduk do Saksi Jahowa tu paretta on.