Dang songon i. Tutu do, marbarita hami sian jabu tu jabu. Alai, porsea do hami dang alani na marbarita gabe boi hami mandapot haluaon. (Epesus 2:8) Boasa boi songon i?

 Pikkiri ma on: Adong ma sahalak bawa na burju. Ibana marjanji lao mangalehon hadiah na arga tu sude halak na olo ro tu sada inganan naung ditottuhon. Molo porsea hamu tu bawa i, oloanmuna do ibana? Tottu oloanmuna do! Ra, togihononmuna do keluarga dohot akka dongan asa mandapot hadiah i. Alai, dang holan ala dioloi hamu bawa i, gabe boi hamu mandapot hadiah i. Ingot ma, silehon-lehon do hadiah i.

 Songon i ma nang Saksi Jahowa. Porsea do hami molo halak na mangoloi Debata mandapot hangoluan na salelengna. (Rom 6:23) Marsitutu do hami paboahon haporseaonnami tu na asing, asa boi nasida mandapot pasu-pasu sian Debata. Alai, pos do rohanami, dang alani na marbarita gabe boi hami mandapot haluaon. (Rom 1:17; 3:28) Sasittongna, aha pe na taulahon, dang tama hita mandapot pasu-pasu na arga sian Debata. “Ndada ala ni ulaonta hatigoran, umbahen na dipalua Ibana hita; tung sian asi ni rohana do.”—Titus 3:5