Saonari molo taida di barita, jotjot do dipaboa taringot akka halak na mandok hata na kejam jala mangulahon kekerasan alani prasangka. Godang do muse barita na paboahon taringot sada suku na menyerang suku na asing, dohot barita taringot porang.

•   “Alani konflik na terjadi antara Israel dohot Gaza jala ala adong akka provokator, gabe lam godang ma akka hata na kejam dibahen di media sosial.”​—The New York Times, 15 November 2023.

•   “Mulai tanggal 7 Oktober, lam godang do halak na so mabiar be mandok akka hata na kejam jala mangulahon kekerasan alani prasangka.”​—Dennis Francis, Presiden Majelis Umum Perserikatan Bangsa-Bangsa, 3 November 2023.

 Sebenarna dang holan saonari be adong porang, hajahaton, dohot akka halak na marsogo ni roha tu na asing. Alana didok di Bibel, najolo pe adong do akka halak na mandok “hata na kejam na dos songon anak panah” dohot akka halak na lomo rohana marporang dohot mangulahon hajahaton. (Psalmen 64:3; 120:7; 140:1) Alai akka hajahaton na terjadi di jamanta saonari, adong do bedana tu akka hajahaton na terjadi najolo.

 Adong dua alasan dipaboa di Bibel boasa godang halak saonari marsogo ni roha tu na asing.

1.  1. Nungnga dipaboa hian di Bibel molo di ari parpudi “lam ngali ma holong ni godang jolma”. (Mateus 24:12) Alani i do lam roa pangalaho ni akka jolma saonari jala mambahen nasida gabe jotjot marsogo ni roha tu na asing.​—2 Timoteus 3:1-5.

2.  2. Dipengaruhi Sibolis do jolma asa marsogo ni roha tu na asing jala mangulahon akka tindakan na kejam. Sesuai do i tu na didok Bibel “di bagasan huaso ni Sibolis do saluhut portibi on”.​—1 Johannes 5:19; Pangungkapon 12:9, 12.

 Alai pos ma rohatta, dang na lao pasombuon ni Debata torus adong sogo ni roha i dohot akka masalah na timbul ala marsogo ni roha jolma tu na asing. Didok di Bibel:

•   “Apusan ni Debata ma nasa ilu-ilu sian mata ni nasida. Dang adong be hamatean nang arsak ni roha, nang angguk-angguk, nang na haccit, dang disi be. Ai nungnga salpu na parjolo i.”​—Pangungkapon 21:4.