Adong halak mangkilala ndang adong labana martangiang, ala ndang adong na manangihon. Na deba mandok ndang dialusi Debata tangiangna. Sahalak ateis mandok di tangiangna, ”Sai alusi ma pangidoankon.” Alai didok ibana, ”sai hohom” do Debata.

Dipaboa do di Bibel, adong do na manangihon tangiang. Ibana do hadirion na marhuaso di hasiangan on, i ma—Debata. Nunga leleng on dipaboa tu jolma, ”Asi ma rohana [Debata] di ho, disi begeonna soara ni angguhanggukmu, alusanna ma ho.” (Jesaya 30:19) Disurat do muse di ayat na asing, ”Tangiang ni halak partigor lomo ni rohana do i.”—Poda 15:8.

Adong do tangiang na dialusi jala disurat di Bibel. Songon Jesus, dipaboa do ”pangidoanna . . . tu na tuk paluahon Ibana sian hamatean” jala “ditangihon do Ibana”. (Heber 5:7) Na asing muse tajaha ma di Daniel 9:20, 21 dohot 2 Kronika 7:1.

Boasa adong na mandok ndang ditangihon tangiang ni nasida? Asa ditangihon tangiangta, ingkon tu Debata Jahowa do hita martangiang, * ndang tu debata na asing manang tu ompu sijolojolo tubu. Dihalomohon Debata do asa ”tapangido manang aha marguru tu lomo ni rohana”. Molo taulahon i, ”tangihononna do hita”. (1 Johannes 5:14) Asa ditangihon tangiangta, ingkon tatanda jala taparsiajari lomo ni roha ni Debata.

Ndang alani na maragama umbahen godang halak martangiang, alai pos do rohana ditangihon jala dialusi Debata tangiang ni nasida. Si Isak na sian Kenya mandok, ”Martangiang do ahu asa diurupi mangantusi Bibel. Dung i, adong ma na rade mangurupi ahu.” Si Hilda di Filipina, lomo rohana asa unang marisap. Alai ndang marhasil ibana. Didok tunggani dolina ma asa martangiang ibana manjalo pangurupion ni Debata. Diulahon ibana ma i, jala didok ma, ”Las do rohangku ala diurupi Debata ahu. Ndang marisap be ahu.”

Tutu do lomo roha ni Debata mangurupi halak na mangulahon lomo ni rohaNa?