Asa lam solhot paralealeon ni dua halak, ingkon jotjot do nasida mangkatai. Songon i ma nang hita tu Debata. Debata mandok, ”Jadi pajoujouonmuna ma ahu, huhut laho hamu martangiang tu ahu, gabe tangihononku ma hamu.” (Jeremia 29:12) Tingki mangkatai tu Debata, lam jonok ma hita tu Ibana ”dung i pajonohonna ma” tu hita. (Jakobus 4:8) Bibel paposhon rohanta, ”Donok do Jahowa di sude angka na manjou Ibana.” (Psalmen 145:18) Alani i, lam jotjot hita martangiang tu Debata, lam solhot ma paralealeonta tu Ibana.

Jesus mandok, ”Ai ise sian hamu jolma, na mangalehon batu tu anakna, molo indahan dipangido? Manang na olo mangalehon ulok, molo dengke dipangido? Gari hamu . . . umboto mangalehon basabasa na denggan tu anakkonmuna, lam Amamuna na di banua ginjang i ma so lehononna arta na denggan di na mangido tu Ibana?” (Mateus 7:9-11) Dipangido Debata do asa martangiang hita tu Ibana ala lomo rohaNa mangurupi jala ”disarihon” do hita. (1 Petrus 5:7) Tapasahat ma sude holso ni rohanta tu Ibana. Disurat di Bibel, ”Unang holsohon hamu agia aha; alai sandok pabotohon hamu ma tu Debata pangidoanmuna marhitehite tangiang dohot elehelek mardongan mauliate!”—Pilippi 4:6.

Marjuta halak mangkilala porlu do nasida martangiang. Songon i ma nang halak ateis dohot agnostik pe, mandok dihaporluhon nasida do tangiang. * On patuduhon sian mulana, nunga disuanhon hian tu jolma asa mangkaporluhon ulaon partondion. Jesus mandok, dihaporluhon jolma do panogunoguon ni Debata. Alani i, didok Jesus ma, ”Martua ma na pogos tondi.” (Mateus 5:3) Asa denggan partondionta ingkon jotjot ma hita mangkatai tu Debata.

Molo martangiang hita tu Debata, aha do labana tu hita?