Binsar: Las roha bah boi pajuppang muse dohot lae. Lomo do rohakku marsiajar Bibel dohot lae. * Boha do kabar ni lae?

Jon: Sehat, mauliate lae.

Binsar: Denggan ma i. Tikki parpudi sahali au ro tuson, hita makkatai-hatai taringot boasa Saksi Jahowa porsea nungnga mamaretta Harajaon ni Debata i mulai taon 1914. * Songon naung tabahas, boi do tadapot buktina sian Daniel pasal 4. Diingot lae dope i tahe?

Jon: Oh, i ma nipi ni si Nebukadnesar taringot hau na balga i ate.

Binsar: Ya, pas. Di nipina i, diida si Nebukadnesar ma sada hau na balga jala timbona sahat tu langit. Dibege ibana ma suru-suruan ni Debata manuru asa ditaba hau i. Alai pakkal dohot uratna ikkon dipasombu di tano. Dung salpu ‘sipitu taon’ i, tubu ma muse hau i. * Jala tikki i nungnga tabahas boasa dua hali surirang i masa. Diingot lae dope tahe nandigan surirang i masa parjolo sahali?

Jon: Na parjolo sahali, tu si Nebukadnesar do masa kan? I ma tikki na rittik i ibana saleleng pitu taon.

Binsar: Tutu. Tikki rittik si Nebukadnesar, sanga ma so pamarettaonna. Alai surirang on masa ma muse tu pamarettaon na umbalga. I ma pamarettaon ni Debata, na sanga so saleleng pitu taon manang pitu masa. Nungnga taboto be molo sipitu taon i di mulai taon 607 SM, i ma tikki dihancurhon Jerusalem. Mulai sian i dang adong be akka raja di tano on na gabe wakil ni Debata lao mamaretta bangsona. Alai di ujung ni sipitu taon i, dilantik Debata ma sada raja na baru di surgo. Artina, dung marujung sipitu taon i, mulai ma jongjong Harajaon ni Debata di surgo. Saonari, nungnga taboto be andigan sipitu taon i dimulai. Molo taboto andigan marujung sipitu taon i, taboto ma andigan do Harajaon ni Debata i mulai mamaretta. Sahat dison, diingot lae dope kan?

Jon: Oke, nga mulai huingot be muse parsiajaratta i.

Binsar: Mantap. Saonari tabahas ma muse ate sadia leleng do sebenarna sipitu taon i. Baru dope nian hujaha-jaha hatorangan taringot on. Hucoba pe patorakkon tu lae da.

Jon: Oke.

Binsar: Tikki masa sipitu taon i tu si Nebukadnesar, toho do i masa saleleng pitu taon. Alai molo tu Harajaon ni Debata, dang pitu taon lelengna sipitu taon i. Alai ulleleng sian i.

Jon: Boasa didok lae songon i?

Binsar: Diingot lae dope kan, dimulai ma sipitu taon i tikki dihancurhon Jerusalem taon 607 SM. Molo taetong pitu taon dukkon i, i ma taon 600 SM. Hape di taon i dang adong manang aha na masa na berkaitan tu Harajaon ni Debata. Marratus taon dukkon i, tikki di tano on dope Jesus didok ibana do dang salpu dope sipitu taon i.

Jon: Oh... i do. Huingot do i.

Binsar: Jadi na pitu taon i artina dang pitu taon. Alai ulleleng sian i.

Jon: Jadi, sadia leleng ma i?

Binsar: Berkaitan do bukku Daniel on dohot bukku Pangungkapon. Alani i, sian buku Pangungkapon taboto ma sadia leleng do sasittongna pitu taon manang pitu masa i. Adong do dipaboa disi molo tolu satonga masa lelengna 1.260 ari. * Pitu taon manang pitu masa, i ma dua hali tolu satonga masa, i ma 2.520 ari. Boi dope dapot roha ni lae?

Jon: Boi lae. Alai boasa ma gabe didok Harajaon ni Debata mamaretta mulai taon 1914?

Binsar: Oke. Saonari taida ma kaitanna da. Tikki paboahon taringot surirang di Bibel, sadari i boi do artina sataon. * Jadi molo taetong sadari i sarupa tu sataon, berarti pitu masa sarupa ma i tu 2.520 taon. Molo taetong 2.520 taon sian taon 607 SM, i ma taon 1914. * Jadi boi ma tasimpulhon taon 1914 ma ujung ni sipitu taon i. Jala di taon i ma Jesus mulai gabe Raja ni Harajaon ni Debata. Jala molo taparrohahon, mulai sian taon 1914 godang do na masa di tano on. Sesuai ma i tu na didok Bibel taringot akka na lao masa di ari parpudi.

Jon: Akka aha ma haroa na lao masa?

Binsar: Di Mateus 24:7 dipaboa Jesus do akka aha na lao masa tikki dung gabe raja ibana di surgo. Didok ibana, “Marporang ma bangso tu bangso jala harajaon tu harajaon. Masa ma haraparon dohot gempa di godang inganan.” Jesus mandok, masa ma haraparon dohot gempa bumi tikki mulai gabe raja ibana. Molo taida akka na masa mulai taon 1914, sesuai do i tu na didok Jesus?

Jon: I do ate.

Binsar: Di ayat on didok Jesus do muse, masa ma porang tikki gabe raja ni Harajaon ni Debata ibana. Jala di buku Pangungkapon dipaboa, dang porang na biasa masa di sada inganan on. Alai porang na berpengaruh tu sude inganan di portibi on. * Diingot lae dope tahe taon sadia mulai porang dunia na parjolo?

Jon: Taon 1914, sarupa ate tu taon na didokmuna nakkaning, i ma mulai mamaretta Jesus! Adong do hape kaitan ni i ate.

Binsar: Jadi molo tapadomu sude surirang na adong di Bibel, i ma taringot sipitu taon i dohot surirang taringot ari parpudi, gabe boi ma taboto kaitanna. Alani i ma makana porsea Saksi Jahowa nungnga mulai Jesus mamaretta taon 1914. Jala mulai sian i ma masa ari parpudi. *

Jon: Oh... i do ate, ikkon huparsiajari do muse on asa lam huattusi.

Binsar: Dang pola boha i lae. Au pe songon i do najolo. Alai sian parsiajaratta on mudah-mudahan ma gabe diboto lae, nang pe dang langsung disurat di Bibel taon 1914, alai sesuai do na dihaporseai Saksi Jahowa tu na tarsurat di Bibel.

Jon: I do nian lae. I do na hupujihon sian hamu. Sude na dipaboa hamu dang sian pandapot pribadi alai sian Bibel do. Alai gabe bingung do au lae, boasa ma pola rumit hian dibahen Debata. Boasa dang langsung disurat di Bibel taon 1914 ma Jesus mulai mamaretta di surgo?

Binsar: Denggan do sukkun-sukkun ni lae i. Memang godang do hatorangan di Bibel na so langsung dipaboa artina. Ikkon berupaya do hita mamparsiajari i asa boi taattusi. Boasa dibahen Debata songon i? Boi ma tabahas on tikki ro au muse tuson.

Jon: Oke lae. Boi ma i.