1. Boasa las roha ni si Paulus mambege barita ni akka dongan na di Korint?

TAON 55 M ma di tikki i. Di pelabuhan na di Troas ma apostel Paulus di tikki i, alai sai tu Korint do pikkiranna. Di awal ni taon i, lungun do rohana mambege marsalisi akka dongan disi. Jadi, dikirim ibana ma surat lao pasingotton nasida. Ai songon gellengna do nasida dianggap ibana. (1 Kor. 1:11; 4:15) Jadi disuru si Paulus ma si Titus tu Korint, lao mamboto boha do haroa sebenarna keadaan disi. Saonari lagi paimahon si Titus do si Paulus di Troas. Alai gabe tarpaima-ima do si Paulus ala dang marnaro si Titus on. Jadi aha ma na diulahon si Paulus? Lao ma ibana tu Makedonia, pajuppang ma nasida disi. Gabe las hian ma roha ni si Paulus. Dipaboa si Titus ma, las do roha ni akka dongan na di Korint manjalo surat ni si Paulus i. Jala dang sabar nasida naeng pajuppang dohot si Paulus. Tikki dibege si Paulus i, ‘tamba ma las ni rohana’.​—2 Kor. 2:12, 13; 7:5-9.

2. (a) Aha do na didok si Paulus tu akka dongan na di Korint taringot haporseaon dohot las ni roha? (b) Sukkun-sukkun aha do na lao tabahas?

² Dang leleng dukkon i, disurat si Paulus ma suratna na paduahon tu akka dongan na di Korint. Didok ibana, “Dang tuan na mangarajai haporseaonmuna hami, alai dongan sakarejomuna do hami na mambahen las rohamuna. Ai alani haporseaonmuna sandiri do umbahen na boi hamu togu.” (2 Kor. 1:24) Aha do lapatan ni hata ni si Paulus i? Aha do na boi diparsiajari akka sintua saonari sian hata ni si Paulus i?

3. (a) Aha do lapatan ni hata ni si Paulus na mandok, “alani haporseaonmuna sandiri do umbahen na boi hamu togu”? (b) Boha do cara ni akka sintua mangihutton teladan ni si Paulus?

³ Dipaboa si Paulus do dua sifat na penting lao manomba Debata, i ma haporseaon dohot las ni roha. Taringot haporseaon, didok si Paulus do, “Dang tuan na mangarajai haporseaonmuna hami. . . . Ai alani haporseaonmuna sandiri do umbahen na boi hamu togu.” Didok si Paulus, dang alani ibana manang alani dongan na asing makana boi togu haporseaon ni akka dongan na di Korint, alai alani haporseaon ni nasida sandiri do tu Debata. Jala dang olo si Paulus mambahen peraturan na mangatur akka dongan na disi. Alana pos do rohana akka halak Kristen na setia do nasida, na lomo rohana mangulahon na sittong. (2 Kor. 2:3) Diihutton akka sintua do saonari teladan ni si Paulus i. Pos do roha ni nasida na porsea do akka dongan tu Debata. Jala alani holong ni nasida do makana olo nasida manomba Debata. (2 Tes. 3:4) Alani i, dang olo akka sintua mamaksahon peraturan tu akka dongan di huria. Alai diihutton nasida do prinsip ni Bibel dohot petunjuk sian organisasi ni Jahowa. Jala na paling penting, dang olo nasida gabe tuan na mangarajai haporseaon ni akka dongan.​—1 Ptr. 5:2, 3.

4. (a) Aha do lapatan ni hata ni si Paulus na mandok, “dongan sakarejomuna do hami na mambahen las rohamuna”? (b) Songon dia do cara ni akka sintua saonari maniru si Paulus?

⁴ Didok si Paulus do muse, “Dongan sakarejomuna do hami na mambahen las rohamuna.” Tikki didok si Paulus dongan sakarejomuna, maksud ni ibana disi dirina sandiri do dohot akka donganna na asing. Sian dia taboto? Di suratna tu halak Korint i, dipaboa si Paulus do taringot dua dongan sakarejona. Didok ibana, “Jesus . . . na hubaritahon hami tu hamu rap dohot si Silwanus dohot si Timoteus.” (2 Kor. 1:19) Asing ni i molo didok si Paulus di suratna hata ‘dongan sakarejo’, na dimaksud si Paulus disi akka dongan kompakna do songon si Apolos, si Akuila, si Priska, si Timoteus, si Titus, dohot akka na asing. (Rom 16:3, 21; 1 Kor. 3:6-9; 2 Kor. 8:23) Jadi, tikki didok si Paulus “dongan sakarejomuna do hami na mambahen las rohamuna”, naeng paposson roha ni akka dongan na di Korint do si Paulus. Naeng dipatudu si Paulus do na berusaha do ibana dohot akka dongan na asing, mangulahon manang aha pe asa las roha ni akka dongan di huria. Songon i do tong na diulahon akka sintua saonari. Berusaha do nasida mangurupi akka dongan asa ‘marlas ni roha nasida manomba Jahowa’.​—Ps. 100:2; Plp. 1:25.

5. Sukkun-sukkun aha ma na dibahen tu akka donganta jala aha do na porlu tapikkirhon?

⁵ Baru-baru on dibahen ma sukkun-sukkun tu akka donganta na adong di marragam inganan. Disukkun do tu nasida, “Aha ma contohna na diulahon sintua na mambahen las rohamuna?” Sambil taida alus ni nasida, pikkirhon ma sarupa do na tahilala songon nasida jala taida ma aha na boi taulahon na boi mambahen las roha ni akka dongan di huriatta be. *

6, 7. (a) Boha do cara ni akka sintua maniru Jesus, si Paulus, dohot naposo ni Debata na asing? (b) Boasa las roha ni akka donganta molo taingot goar ni nasida?

⁶ Godang do akka donganta na mandok, las do roha ni nasida molo parduli akka sintua tu nasida. Sada cara akka sintua mangulahon i, i ma maniru teladan ni si Daud, si Elihu, dohot Jesus. (Jaha 2 Samuel 9:6; Job 33:1; Lukas 19:5.) Tikki makkatai naposo ni Jahowa on tu sasahalak, dijou nasida do goarna. Songon i do tong na diulahon si Paulus, diingot jala dijou ibana do goar ni dongan sahaporseaonna. Di ujung ni sada suratna, disurat ibana do goar ni lobi sian 25 donganna, termasuk ma si Persis. Didok si Paulus do di suratna, “Sahat ma tabe tu si Persis donganta borua na tahaholongi.”​—Rom 16:3-​15.

⁷ Adong do piga-piga sintua na maol mangingot goar ni akka donganta. Alai molo berusaha nasida mangingot i, hira na didok nasida ma, ‘Penting do hamu di au.’ (2 Mus. 33:17) Tarlumobi porlu do diingot akka sintua goar ni akka donganta tikki mangalean komentar nasida di pelajaran Joujou Paboahon manang di pelajaran na asing. Alana gabe las do annon roha ni akka donganta molo diingot sintua goar ni nasida.​—Bandingkon tu Johannes 10:3.

8. Songon dia do cara ni si Paulus maniru Jahowa dohot Jesus?

⁸ Cara na asing na diulahon si Paulus patuduhon na parduli ibana tu akka dongan, i ma dipuji ibana do nasida. Boi do on mambahen las roha ni akka dongan. Dung dipaboa ibana di suratna na lomo rohana mambahen las roha ni akka dongan, didok si Paulus do muse, “Las do rohakku mangida hamu.” (2 Kor. 7:4) Pasti las hian do roha ni akka dongan na di Korint mambege pujian ni si Paulus on. Jala songon i do tong na dibahen si Paulus tu akka dongan di huria na asing. (Rom 1:8; Plp. 1:3-5; 1 Tes. 1:8) Asing ni i, tikki ditaringoti si Paulus pe si Persis di suratna tu huria di Rom, didok si Paulus do muse, “Nungnga marsitutu ibana marhobas tu tuan i.” (Rom 16:12) Pasti las hian do roha ni si Persis mambege i. On ma buktina ditiru si Paulus do Jahowa dohot Jesus.​—Jaha Markus 1:9-11; Johannes 1:47; Pgk. 2:2, 13, 19.

9. Aha do gunana molo olo sintua dohot akka dongan mamuji na asing?

⁹ Diboto akka sintua do, porlu do dipuji nasida akka donganta. (Poda 3:27; 15:23) Tikki dipuji sintua akka dongan, hira na didok nasida ma, ‘Huida do na binahenmi, parduli do au tu ho.’ Jala memang porlu do akka sintua mamuji akka donganta di huria. Alana boi do on paposson roha ni nasida. Contohna sahalak saudari na marumur lobi sian 50 taon mandok, “Jarang do au dipuji di tempat karejokku. Cuek do akka halak disi jala lomo rohana bersaing. Jadi tikki adong sada sintua na mamuji au, las hian ma rohakku. Gabe semangat ma au, jala boi ma huhilala na dihaholongi Jahowa au.” Songon i do tong na dihilala donganta naung mabalu, na adong dua gellengna. Baru-baru on dipuji sintua do ibana. Boha ma perasaanna? Didok ibana, “Gabe lam margogo do huhilala mambege pujian ni sintua i.” Jadi molo tulus do akka sintua mamuji akka donganta, boi do on mambahen nasida semangat jala marlas ni roha. Gabe margogo ma nasida mardalan di dalan hangoluan jala “dang habis gogona”.​—Jes. 40:31.

10, 11. (a) Songon dia do akka sintua maniru teladan ni si Nehemia? (b) Asa boi patoguhon parale-aleon ni akka dongan tu Debata, aha do na porlu diulahon akka sintua sebelum penggembalaan?

¹⁰ Adong do muse cara na asing na boi diulahon akka sintua patuduhon na parduli nasida tu akka dongan di huria. Carana i ma pittor hatop mangurupi tikki adong dongan na porlu diurupi. (Jaha Ulaon ni Apostel 20:28.) Molo diulahon akka sintua on, na maniru akka parmahan ni halak Israel najolo do nasida. Contohna songon si Nehemia, sahalak pengawas na setia. Aha do na diulahon ibana tikki gale haporseaon ni dongan sabangsona? Didok di Bibel, pittor lao do ibana patoguhon nasida. (Neh. 4:14) Songon i do tong na diulahon akka sintua saonari. Pittor lao do nasida mangurupi akka dongan lao patoguhon haporseaon ni nasida. Molo cocok do situasina, olo do akka sintua ro tu jabu ni akka dongan lao ‘patoguhon parale-aleon ni nasida tu Debata’. (Rom 1:11) Asa boi mangulahon i, aha do na porlu diulahon akka sintua?

¹¹ Sebelum dibahen sintua penggembalaan, ikkon jolo persiapan do ibana, asa unang gabe holan na makkata-hatai annon nasida. Ikkon dipikkirhon akka sintua do, aha do masalah na dihadapi akka dongan? Aha do na boi mangurupi nasida? Ayat manang cerita na dia do di Bibel na cocok tu situasina? Jadi molo jolo dipikkirhon akka sintua i sebelumna, gabe boi ma akka sintua patoguhon nasida. Jala saleleng penggembalaan i, ikkon olo do tong akka sintua manangihon akka donganta marcerita. (Jak. 1:19) Sahalak saudari mandok, “Las hian do rohakku ala olo akka sintua manangihon au marcerita.”​—Lukas 8:18.

12. Akka ise do na porlu dipatogu, jala boasa nasida porlu dipatogu?

¹² Akka ise do na porlu dipatogu akka sintua? Didok si Paulus do tu akka sintua, “Parrohahon hamu ma . . . sude punguan i.” Jadi sude do akka dongan di huria porlu dipatogu, termasuk ma i akka dongan naung leleng gabe penyiar dohot perintis. Boasa nasida porlu dipatogu? Alana nang pe togu haporseaon ni nasida tu Debata, sipata marsak do nasida alani godang ni sitaonon di portibi on. Jadi naposo ni Debata na togu pe haporseaonna, porlu do dipatogu donganna. Taida ma pengalaman ni Raja Daud.

13. (a) Boasa boi hampir dipamate si Isbi-benob si Daud? (b) Boasa boi si Daud selamat dibahen si Abisai?

¹³ Dang leleng dung dipillit si Daud gabe raja, marporang ma ibana mangalo si Goliat, na sian suku Repaim, suku ni akka raksasa. Barani do si Daud pamatehon raksasa on. (1 Sam. 17:4, 48-​51; 1 Kron. 20:5, 8) Martaon-taon dukkon i, tikki marporang ibana mangalo halak Palistim, dialo si Daud ma muse sahalak raksasa na margoar si Isbi-benob, na tong sian suku Repaim. (2 Sam. 21:16) Alai hampir dipamate raksasa on do si Daud. Boasa? Dang ala na mabiar si Daud, alai ala naung loja do ibana. Bibel mandok, “Loja do si Daud di parporangan i.” Alani i, “naeng dipamate ibana ma si Daud”. Alai sebelum dipamate raksasa i si Daud, “pittor ro ma si Abisai anak ni si Seruya mangurupi si Daud jala dipamate ibana ma halak Palistim i”. (2 Sam. 21:15-​17) Jadi hampir mate do si Daud tikki i. Pasti mandok mauliate do si Daud tu si Abisai ala sai diparrohahon si Abisai do si Daud, jala pittor hatop do ro ibana mangurupi si Daud. Aha ma na boi taparsiajari sian cerita on?

14. (a) Songon dia do carana asa unang menyerah hita tikki adong tantangan na borat na dos songon raksasa? (b) Boha do cara ni akka sintua mangurupi akka donganta asa margogo jala marlas ni roha muse? Paboa ma sada contoh.

¹⁴ Di liat portibi on, torus do naposo ni Jahowa marbarita na uli, nang pe godang tantangan na dibahen Sibolis dohot akka suru-suruan na jahat. Adong do piga-piga sian hita na ikkon manaon tantangan na borat, na dos songon raksasa. Alai molo taasahon Jahowa, boi do hita marhasil manaon i jala toktong marlas ni roha. Sipata ala torus ro sitaonon, olo do gabe gale hita jala kecil hati. Molo songon i situasitta boi do gabe menyerah hita alani tantangan i, hape biasana boi do taatasi tantangan i. Di tikki sisongon i porlu do hita dipatogu akka sintua asa boi hita margogo jala marlas ni roha muse. Songon i ma na dihilala akka donganta. Contohna sahalak perintis na marumur 60 taon mandok, “Na masa i hea do au hurang sehat jala mura-mura loja sae mardinas. Jadi adong ma sahalak sintua na mamparrohahon na songon i keadaanku jala dipatogu ibana do au. Dipaboa ibana do akka nasehat sian Bibel na boi patoguhon rohakku. Dung huulahon akka nasehat i, marguna do i tu au.” Didok ibana muse, “Burju hian do sintua i, diparrohahon ibana do au jala diurupi ibana au.” Jadi las do rohatta ala taboto adong do akka sintua na songon si Abisai najolo, na sai mamparrohahon hita jala na ‘pittor hatop mangurupi hita’.

15, 16. (a) Boasa holong hian roha ni akka dongan tu si Paulus? (b) Boasa holong rohatta tu akka sintua di huria?

¹⁵ Godang do na diulahon akka sintua tu akka dongan di huria. Sipata gabe hurang modom do nasida ala mamikkirhon jala manangiakkon biru-biru ni Debata manang ala patoguhon roha ni akka dongan. (2 Kor. 11:27, 28) Alai las do roha ni akka sintua mangulahon tanggung jawabna i, songon si Paulus. Didok si Paulus do tu akka dongan di Korint, “Las do rohakku mangalehon ngolukku dohot sude na adong di au tu hamu.” (2 Kor. 12:15) Jadi ala holong roha ni si Paulus tu akka donganna, olo do ibana mangalean ngoluna lao patoguhon nasida. (Jaha 2 Korint 2:4; Plp. 2:17; 1 Tes. 2:8) Alani i, holong hian do tong roha ni akka dongan tu si Paulus.​—Ulaon ni Apostel 20:31-​38.

¹⁶ Pasti tahaholongi do akka sintua di huria. Alana parduli do nasida tu hita, diurupi nasida do asa las muse rohatta, jala olo do nasida mambahen penggembalaan tu hita lao patoguhon hita. Asing ni i tikki susa hita, pittor hatop do nasida mangurupi hita. Alani i, mandok mauliate ma hita tu Jahowa di tangiangta ala nungnga dilehon Ibana akka sintua tu hita. Toho ma akka sintua i ‘dongan sakarejo na mambahen las rohatta’.