MOLO mate halak na dihaholongi hamu, ra olo do gabe lungun-lungunan jala hira na so marlapatan be ngolumuna. Jala olo do ra gabe muruk, manolsoli manang mabiar hamu. Jala hira na so mararga be dihilala hamu.

Pos ma rohamuna, ndang sala marhabot ni roha. On patuduhon, na holong do rohamuna tu naung marujung ngolu i. Alai aha do na boi mangurupi hamu asa unang sai marhabot ni roha?

Molo sai marhabot ni roha dope hamu, adong piga-piga cara na boi mangurupi hamu:

UNANG MAILA TANGIS

Ndang sai sarupa sude pangkilalaan ni halak na marhabot ni roha. Alai molo tangis hamu, boi do gabe lumbang pangkilalaanmuna. Songon si Vanessa naung dipaboa nangkin mandok, “Molo tangis ahu, gabe lumbang do pangkilalaanku.” Si Sofia na tompu marujung ngolu adekna mandok, “Hansit do huhilala mamingkirhon angka naung masa. Dos do i songon paiashon luka na so koring dope. Mansai hansit do i nian, alai ingkon songon i do asa boi malum.”

PABOA MA AHA NA DI PINGKIRAN DOHOT ROHAMUNA

Tingki marhabot ni roha, sipata ndang lomo rohamuna didongani halak na asing. Alai molo  torus songon i, boi do gabe lam susa dihilala hamu. Tingki marumur 17 taon si Jared, mate ma bapakna. Didok ibana, “Hupaboa ma tu na asing songon dia pangkilalaanku. Ra hira na so masuk akal do na hudok, alai dungkon i gabe lumbang ma pangkilalaanku.” Si Janice na dipaboa di halaman tolu mandok, “Lumbang situtu ma huhilala dung hupaboa pangkilalaanku tu na asing. Adong do hape na boi mangantusi songon dia pangkilalaanku. Gabe ndang lungun-lungunan be huhilala.”

OLO MA HAMU DIURUPI NA ASING

Sahalak dokter mandok, “Boi do hatop tarapul roha ni halak na marhabot ni roha molo olo ibana diurupi.” Alani i, tingki marhabot ni roha, pangido ma tu dongan manang tu keluarga aha na boi diulahon nasida laho mangurupi hamu. Ra, lomo do roha ni nasida mangurupi, alai ndang diboto songon dia carana.​—Poda 17:17.

PAJONOK MA TU DEBATA

Si Tina mandok, “Tingki tompu mate suamikku alani kanker, didok rohangku ndang adong be na boi mangantusi ahu. Alani i, hupaboa ma sude na di rohangku tu Debata! Ganup ari, martangiang do ahu asa diurupi. Diurupi Debata do ahu lobi sian na hupangido.” Si Tarsha na marumur 22 taon dope tingki mate omakna mandok, “Tarapul do rohangku ala manjaha Bibel ganup ari. On mambahen tongtong togu roha dohot pingkiranku.”

INGOT MA NA ADONG DO HAHEHEON

Didok si Tina muse, “Di tingki i, huhilala ndang porlu di ahu pangkirimon taringot haheheon, suamikki do na porlu di ahu dohot di ianakhonku. Alai dung opat taon, huhilala ma arga hian do di ahu pangkirimon on jala on mambahen ahu togu. Hubayangkon ma pajumpang ahu haduan dohot ibana, on mambahen dame jala las rohangku!”

Ra, ndang boi hatop tarapul rohamuna. Alai pengalaman ni si Vanessa boi do mangurupi hamu. Didok ibana, “Ra didok rohamu, ndang laho boi be tarapul rohamuna, alai lam leleng boi do muse las rohamuna.”

Tontu masihol do hamu tu sisolhotmuna i. Alai ingot ma, arga dope ngolumuna. Molo diurupi Debata, boi do hamu tongtong marlas ni roha rap dohot angka dongan na mangkaholongi hamu. Satongkin nai, laho paheheon ni Debata do sude halak naung mate. Lomo do rohana asa pajumpang hamu muse tu halak na dihaholongi hamu. Di tingki i, ndang adong be na mambahen lungun rohamuna!