SIULASON NI MAJALAH ON | OLO DO HAMU MANJALO SILEHONLEHON NI DEBATA?
Silehonlehon na Ummarga
SONGON na so mararga do rautan ni pitolot na ditiop si Jordan. Alai, i do sada sian arta na ummarga di ibana. Didok si Jordan, ”Aleale ni ompungku na margoar si Russell do na mangalehon i tingki dakdanak dope ahu.” Dung mate si Russell, diboto si Jordan ma godang do pangurupion ni si Russell tu ompungna dohot tu natuatuana, dipatogu ibana do nasida tingki susa. Didok si Jordan muse, ”Dung lam godang na huboto taringot si Russell, gabe lam arga ma silehonlehonna i di ahu.”
Songon pengalaman ni si Jordan, silehonlehon boi do ndang arga di pigapiga halak. Alai mararga do i tu na manjalo. Dipatorang Bibel do taringot silehonlehon na mansai arga, ”Songon on do holong ni roha ni Debata di portibi on, pola do Anakna na sasada i dilehon, asa unang mago ganup na porsea di Ibana, asa hangoluan na salelenglelengna di ibana.”
Silehonlehon i boi parohon hangoluan salelenglelengna! Adong dope silehonlehon na ummarga sian i? Ra, ndang mararga i di pigapiga halak, alai mansai arga do i di halak Kristen na sintong. (Psalmen 49:9; 1 Petrus 1:18, 19) Boasa olo Debata mangalehon ngolu ni AnakNa gabe silehonlehon tu portibi on?
Dipatorang apostel Paulus ma i marhite mandok, ”Songon na bongot dosa i tu portibi on marhite sian sada halak jala marhitehite dosa i ro hamatean, songon i sahat hamatean i tu saluhut jolma.” (Rom 5:12) Mardosa do jolma na parjolo, i ma si Adam ala ndang mangoloi Debata, ujungna gabe mate ma ibana suang songon i nang pinomparna.
’Upa tinuhor ni dosa do hamatean; alai basabasa ni Debata do hangoluan salelengna marhitehite Kristus Jesus Tuhanta i.’ (Rom 6:23) Asa boi jolma malua sian hamatean disuru Debata ma anakNa, i ma Jesus Kristus tuat tu tano on laho mamelehon dirina na so mardosa. Marhite tobusan i, saluhut na porsea tu Jesus boi mangolu salelengna.
Taringot tu pasupasu na dilehon Debata marhite Jesus Kristus, si Paulus mandok, ”Mauliate ma tu Debata ala ni silehonlehonna, na so tarhatahon i!” (2 Korint 9:15) Mansai arga do tobusan i, ndang tarpatudos tu manang aha. Alai sian sude silehonlehon ni Debata, boasa ma didok tobusan na ummarga? Songon dia i sumurung sian silehonlehon na asing? * Songon dia hita patuduhon pangargaion tu silehonlehon i? Hutogihon hami do hamu manjaha alusna sian Bibel marhite hatorangan di majalah on.
^ par. 8 Rade do Jesus Kristus ”mangalehon hosana humongkop hita”. (1 Johannes 3:16) Alai, ala sangkap ni Debata do tobusan i, taringot Debata Silehon tobusan i ma na gumodang diulas di majalah on.
