Saleleng marribu taon, dang adong na mamboto alus ni sukkun-sukkun on. Marjuta do halak mate alani sahit na menular. Ujungna, diparsiajari akka ilmuwan ma taringot i. Diboto nasida ma molo sahit na menular i adong alani kuman, songon bakteri manang virus. Ala nungnga diboto nasida i, gabe boi ma akka halak pasidikkon sahit na menular. Hasilna, lam ganjang ma umur ni jolma jala lam sehat ma nasida.

Songon dia taringot sukkun-sukkun na asing? Aha do pengaruhna tu hamu dung mamboto alus ni sukkun-sukkun on?

• Ise do Debata?

• Ise do Jesus Kristus?

• Aha do Harajaon ni Debata i?

• Aha do na lao masa di ari na naeng ro?

Marjuta halak nungnga mamboto alusna jala lam denggan do ngolu ni nasida. Hamu pe boi do mandapot laba sian alus ni sukkun-sukkun i.

Ra sukkun-sukkun do rohamuna, ‘Tutu do boi taboto informasi na sittong taringot saluhutna?’ Alana hira na lam maol do saonari mangalului informasi na sittong. Boasa?

Godang halak dang porsea be tu pamaretta, tu bisnis, manang tu media na paboahon informasi tu nasida. Maol do diboto nasida dia do hatorangan na sittong, na hurang sittong, manang na holan gabus. Ala dang masihaporseaan be akka jolma jala godang hatorangan na sala, gabe dang olo be nasida mangalului informasi na sittong nang pe marlaba i tu nasida.

Alai nang pe songon i, boi do tadapot alus na sittong taringot sukkun-sukkun na rikkot di parngoluon. Songon dia carana? Marhite cara na tapakke di ulaonta siganup ari.

Alani situasitta, ikkon talului do ra informasi na sittong ganup ari. Pikkirhon ma situasi ni si Jessica. Didok ibana, “Massai posi do alergi ni borukku tu kacang. Boi do mate ibana nang pe holan saotik kacang na diallang.” Alani i, ikkon dipastihon si Jessica do akka sipanganon na dituhor boi diallang boruna. Didok ibana muse, “Parjolo sahali, hujaha do hatorangan na disurat di bukkus ni sipanganon i lao mamboto aha do akka bahanna. Dung i, huriset jala husukkun ma pabrik na mambahen sipanganon i, lao mamboto na tutu do dang adong kacang na so sengaja dibahen tu sipanganon i. Asing ni i, hulului do muse hatorangan sian na asing lao mamastihon na boi do huhaporseai cara ni pabrik i paradehon sipanganon.”

Ra, dang songon si Jessica situasi na diadopi hamu ganup ari. Alai boi do dipakke hamu cara na sarupa lao mamboto alus ni sukkun-sukkun na rikkot:

• Lului ma hatorangan na sittong.

• Bahen ma riset.

• Pastihon ma na boi do dihaporseai hatorangan i.

Boi do dipakke hamu cara na sarupa lao mamboto alus na sittong taringot sukkun-sukkun na rikkot di parngoluon. Songon dia carana?

Tikki mangalului hasittongan sian Bibel, dipakke si Jessica do cara na sarupa tikki mangalului sipanganon na boi diallang boruna. Didok ibana, “Ala manat hujaha jala ringgas au mangariset, gabe boi ma huboto hasittongan sian Bibel.” Songon si Jessica, marjuta halak nungnga mamboto alus sian Bibel taringot akka sukkun-sukkun on:

• Boasa ditoppa Debata jolma?

• Aha do na masa tu halak naung mate?

• Boasa susa jolma?

• Aha do bahenon ni Debata lao manalpuhon sude hasusaan?

• Songon dia asa marlas ni roha keluargatta?

Boi do dapotmuna alus na sittong taringot sukkun-sukkun on dohot sukkun-sukkun na asing molo dijaha hamu Bibel jala dilului hamu hatorangan di www.isa4310.com.