Sian Bibel do Boi Tadapot Informasi na Sittong
Saleleng marribu taon, godang do halak na porsea sian Bibel do boi dapot ni nasida hasittongan. Saonari, marjuta halak mangihutton ajaran ni Bibel. Alai piga-piga halak na asing mandok, molo Bibel i nungnga ketinggalan jaman jala holan cerita sambing do i. Boha do menurutmuna? Boi do dapotmuna hasittongan sian Bibel?
BOASA BOI POS ROHAMUNA TU BIBEL?
Sian dia diboto hamu na boi do Bibel i dihaporseai? Pikkirhon ma tudosan on: Molo adong donganmu sai paboahon na sittong tu hamu saleleng martaon-taon, tottu gabe pos do rohamu tu ibana. Songon dongan na boi dihaporseai i, sai sittong do hatorangan na dipaboa di Bibel? Parrohahon ma piga-piga contoh.
Kejujuran ni Panurat ni Bibel
Jujur do akka panurat ni Bibel. Jala jotjot do dipaboa nasida hasalaan ni nasida sandiri. Uppamana, disurat Panurirang Jona do na hea ibana dang mangoloi Debata. (Jona 1:1-3) Nang pe dang dipaboa si Jona songon dia ibana manguba cara marpikkirna, alai di ujung ni bukkuna, dipaboa do songon dia Debata mamissang ibana. (Jona 4:1, 4, 10, 11) Kejujuran ni sude panurat ni Bibel patuduhon na massai penting do di nasida paboahon hatorangan na sittong.
Poda tu Parngoluon Siganup Ari
Sai marlaba do poda ni Bibel tu parngoluotta siganup ari. Uppamana, pikkirhon ma na didok Bibel taringot songon dia carana patoguhon parale-aleon. Didok, “Sude na dihalomohon rohamuna bahenon ni halak tu hamu, ikkon songon i do bahenonmuna tu nasida.” (Mateus 7:12) “Hata na lambok padaohon rimas, alai mambahen muruk do hata na kasar.” (Poda 15:1) Takkas ma, toktong do marlaba poda ni Bibel sahat tu tikkitta saonari.
Sejarah na Boi Dihaporseai
Saleleng martaon-taon, godang penemuan arkeologi patuduhon na tutu do adong akka halak dohot inganan na disurat di Bibel. Jala tutu do hea masa akka peristiwa na disurat disi. Parrohahon ma sada contoh. Bibel mandok, di tikki ni si Nehemia, “mamboan dekke dohot akka barang” do halak Tirus (halak Penisia na sian Tirus) na tading di Jerusalem.—Nehemia 13:16.
Adong do bukti na patuduhon na sittong do na didok ayat on? Adong. Dapot ni akka arkeolog do akka barang sian Penisia di Israel. On patuduhon, na hea do dua bangso on martiga-tiga. Asing ni i, adong do muse dapot ni nasida holi-holi ni dekke sian Mediterania. Porsea do akka arkeolog molo dekke i diboan partiga-tiga sian luat na dao. Dung dipareso akka bukti on, adong sahalak pakar mandok, “Sittong do hatorangan na disurat di Neh[emia] 13:16 taringot halak Tirus na martiga-tiga dekke di Jerusalem.”
Ilmu Pengetahuan
Memang, taringot Debata dohot sejarah do na gumodang diulas di Bibel. Alai dang maralo isina tikki mangulas ilmu pengetahuan. Parrohahon ma sada contoh.
Hira-hira 3.500 taon naung salpu, didok di Bibel digattukkon do tano on “di na soada”. (Job 26:7) Massai imbar do on tu pandapot ni halak najolo, na mandok molo tano on mumbang di atas ni aek, manang dihutti kura-kura na balga. Hira-hira 1.100 taon dung disurat bukku Job, toktong dope halak porsea ikkon adong do na menopang tano on. Alai 300 taon naung salpu, i ma taon 1687, diriset si Isaac Newton ma taringot gravitasi. Jala dipatorang ibana do molo gravitasi i mangatur parputaran ni tano on. On patuduhon, na tutu do na didok Bibel lobi sian 3.000 taon naung salpu!
Surirang na Dipasaut
Boha do taringot akka surirang na disurat di Bibel? Pikkirhon ma sada contoh: Surirang ni si Jesaya taringot kehancuran ni Babel.
Surirang: Di abad paualuhon SM, nungnga dipaboa si Jesaya na lao ditaluhon do Babel, i ma ibukota ni pamarettaon na marhuaso di tikki i. Jala ujungna dang diingani be kota i. (Jesaya 13:17-20) Dipaboa si Jesaya do goar ni halak na manaluhon kota i, i ma si Sirus. Dipaboa ibana do songon dia cara ni si Sirus manaluhon kota i, i ma marhite pakorikkon sunge. Jala dipaboa ibana na lao tarbukka do akka gerbang ni kota i.—Jesaya 44:27–45:1.
Dipasaut: Hira-hira 200 taon dung disurat si Jesaya surirang i, ro ma raja ni Persia menyerang Babel. Ise do goarna? Si Sirus. Massai timbo do tembok ni kota Babel jala dihaliangi Sunge Euprat do kota i. Alani i, dipapinda si Sirus dohot akka tentarana ma dalan ni aek ni sunge i. Gabe marsik ma sunge i jala boi ma akka tentarana mardalan tu gerbang kota. Na mambahen longang muse, dipasombu halak Babel do tarbukka gerbang ni kota i! Gabe boi ma akka tentara ni si Sirus masuk jala manaluhon kota Babel i.
Alai, tutu do dang be diingani kota Babel i? Memang saleleng piga-piga abad, adong dope halak na tading disi. Alai, holan akka tembok na maruppak nama na taida disi saonari di jonok ni Baghdad, Irak. On patuduhon naung dipasaut do sude surirang ni si Jesaya. Takkas ma, tikki dipaboa Bibel aha na lao masa di ari na naeng ro, boi do i tahaporseai.
