1, 2. Songon dia do apostel Paulus patuduhon hamauliateon alani asi ni roha ni Debata?

APOSTEL Paulus mandok, ”Ndang na magopo asi ni rohana [Debata] na tu ahu i.” (Jaha 1 Korint 15:9, 10.) Diboto si Paulus do ndang tarbalos asi ni roha ni Debata jala ndang patut ibana mandapot i. Alana, hea do ibana mangarehei jala mangalele halak Kristen.

² Disurat si Paulus do tu si Timoteus, ”Mauliate hudok di na margogoihon ahu, i ma Kristus Jesus, Tuhanta i; ai dietong do ahu haposan, umbahen na dipabangkit ahu gabe parhalado.” (1 Tim. 1:12-14) Aha do lapatanna? Dipaboa si Paulus tu angka sintua di Epesus, ”Alai ndang pola arga hurajumi hosangku, asal ma hupaujung langkangki dohot ulaon naung hujalo sian Tuhan Jesus, i ma na mangkatindangkon barita na uli taringot tu asi ni roha ni Debata.”​—Ul. 20:24.

3. Tu ise do si Paulus marbarita na uli? (Ida gombar di mula ni parsiajaran.)

 ³ Aha do ”barita na uli” na dipasahat si Paulus, jala songon dia do i patuduhon asi ni roha ni Jahowa? Didok si Paulus tu halak Kristen di Epesus, ”Molo tung dibege hamu tohonan mangaradoti asi ni roha ni Debata, na pinasahatna i tu ahu, patureturehon hamu” do i. (Eps. 3:1, 2) Didok Jesus do asa marbarita si Paulus tu na so halak Jahudi. Songon i nang saonari, sude bangso boi parsidohot gabe rakyat ni Harajaon ni Debata na diparenta Messias. (Jaha Epesus 3:5-8.) Si Paulus ma sitiruon na denggan tu halak Kristen, alana ndang ”magopo” asi ni roha ni Debata dibahen ibana.

4, 5. Boasa boi tadok ”barita na uli on na taringot tu Harajaon” sarupa dohot ”barita na uli taringot tu asi ni roha ni Debata”?

⁴ Saonari, naposo ni Jahowa pe ingkon mamaritahon ”barita na uli on na taringot tu Harajaon . . . laho mangkatindangkonsa tu saluhutna bangso”. (Mat. 24:14) Barita na uli taringot Harajaon didok do ”barita na uli taringot tu asi ni roha ni Debata”. Boasa? Alani asi ni roha ni Debata do umbahen tadapot pasupasu di HarajaonNa. (Eps. 1:3) Ringgas do si Paulus marbarita na uli patuduhon hamauliateonna. Olo do hita maniru si Paulus?​—Jaha Rom 1:14-16.

⁵ Di artikel na parjolo, nunga taparsiajari laba na tadapot sian marragam asi ni roha ni Debata nang pe mardosa hita. Ala tadapot godang laba, taajari ma na asing taringot holong ni Debata jala songon dia nasida boi mandapot laba sian i. Songon dia ma hita mangurupi nasida laho mandok mauliate di asi ni roha ni Debata?

6, 7. Boasa boi didok hita mamaritahon asi ni roha ni Debata tingki patorangkon tobusan?

⁶ Saonari, ndang mangkuling be panggora ni roha ni godang halak tingki mangulahon dosa. Alani i, didok nasida ma ndang ringkot tobusan i. Alai, diboto nasida do ndang martua parngoluon ni nasida. Dung jumpang dohot Sitindangi Ni Jahowa, pigapiga halak diajari taringot aha do dosa i, aha do pangkorhonna jala aha do ulahononta asa boi malua sian dosa dohot hamatean. Dung diantusi nasida i, mandok mauliate do nasida ala dilehon Jahowa AnakNa humongkop hita. Dilehon Jahowa AnakNa i, alani balga ni holongNa do tu hita.​—1 Joh. 4:9, 10.

⁷ Parrohahon ma na didok si Paulus taringot AnakNa na sasada i, ”Di bagasan Ibana dapot hita haluaon i, binahen ni mudarna i, i ma hasesaan ni angka pangalaosion, mangihuthon asi ni rohana na tarlobi i.” (Eps. 1:7) Pelean tobusan ni Kristus, i ma holong dohot asi ni roha na umbalga na dipatudu Jahowa tu hita. Las do  rohanta tingki taparsiajari na salpuhonon ni Debata do dosanta. Ias ma panggora ni rohanta molo tapatudu haporseaon tu tobusan ni Jesus! (Heb. 9:14) Barita na uli do on tu sude halak!

8. Boasa paralealeonta tu Debata porlu dipadenggan?

⁸ Musu ni Jahowa do halak na so olo patuduhon haporseaon tu tobusan ni Jesus. Alani i, ringkot tapaboa boi do nasida maraleale tu Debata. Si Johannes manurat, ”Naung dapotan hangoluan na salelenglelengna do na mangkaporseai Anak i; alai na so mangoloi Anak i, ndang idaon ni i hangoluan; sai na mian do tahe rimas ni Debata di ibana.” (Joh. 3:36) Las ma rohanta ala boi hita gabe aleale ni Debata marhite tobusan ni Jesus. Si Paulus patorangkon, ”Dohot do hamu, angka na holang najolo jala parroha musu marhitehite angka ulaon hajahaton, dipadenggan Ibana nuaeng marhitehite daging hajolmaonna i, di na mate i Ibana.”​—Kol. 1:21, 22.

9, 10. (a) Ulaon aha do dilehon Kristus tu na miniahan? (b) Songon dia do birubiru na asing mangurupi na miniahan?

⁹ Dilehon Jesus do na miniahan laho mangurupi halak gabe aleale ni Debata. Didok si Paulus, ”Sudena i sian Debata do; ai Ibana do padengganhon hita tu dirina marhite Kristus, jala dilehon do tu hami tohonan pardengganan i. Ai di bagasan Kristus do Debata, gabe dipadenggan do portibi on tu dirina, ai ndang dijujur tu nasida dosanasida, jala dipajongjong do di tongatonganami hata pardengganan i. Onpe, partonaan ni Kristus do hami, ai na mangapoi do Debata marhite sian hami. Singkat ni Kristus do hami mangelehelek: Sai olo ma hamu padengganon tu Debata!”​—2 Kor. 5:18-20.

¹⁰ Hak na sumurung do di birubiru na asing mangurupi na miniahan marbarita na uli. (Joh. 10:16) Ala nasida ”suruan” ni Kristus, gumodang do ulaon ni birubiru na asing di ulaon marbarita, mangurupi halak mananda hasintongan jala maraleale tu Debata. Ulaon na ringkot do mamaritahon asi ni roha ni Debata.

11, 12. Boasa didok sada barita na uli do mangajari halak martangiang tu Jahowa?

¹¹ Pigapiga halak mandok, martangiang mambahen nasida tarapul, nang pe ndang diboto nasida na ditangihon Debata do tangiang i manang na ndang. Ringkot do  botoon ni nasida Jahowa, ”sitangihon tangiang”. Disurat si Daud do, ”Ale sitangihon tangiang! Tu Ho do ro nasa sibuk. Gumogo do angka alualu ni hajahaton asa ahu, sai Ho ma manesa angka pangalaosionnami.”​—Ps. 65:3, 4.

¹² Jesus mandok, ”Molo dipangido hamu manang aha” marhitehite goarhu, sai na oloanku do. (Joh. 14:14) Boi do tapangido ”manang aha” hombar tu lomo ni roha ni Jahowa. Si Johannes manurat, ”On do hiras ni rohanta maradophon Ibana: Molo tapangido manang aha marguru tu lomo ni rohana, tangihononna do hita.” (1 Joh. 5:14) Ulaon na denggan do mangurupi halak asa mangantusi tangiang mambahen hita tarapul, jala jonok tu ”habangsa parasiasian” ni Jahowa. (Heb. 4:16) Tingki tapaboa tu halak songon dia asa ditangihon Jahowa tangiang, na mangurupi nasida do hita gabe aleale ni Debata jala mandapot pangapulion tingki marsitaonon.​—Ps. 4:2; 145:18.

13, 14. (a) Aha do hak na sumurung na laho dilehon tu angka na miniahan? (b) Aha do na laho diulahon angka na miniahan tu angka jolma?

¹³ Dipatudu Jahowa do gumodang asi ni roha ”di angka tingki na naeng ro”. Boasa songon i? Dilehon Debata ma hak na sumurung tu 144.000 halak na laho mamarenta raphon Jesus di surgo. Dipatorang si Paulus do taringot on, ”Alai anggo Debata parasiroha bolon do jala parholongroha na balga maradophon hita. Jala raphon Kristus do dipangolu Ibana hita, angka naung mate di bagasan angka pangalaosion; na sian asi ni roha do, umbahen na malua hamu! Gabe rap dipangolu jala rap dipabangkit hita tu gomgoman banua ginjang, di bagasan Kristus Jesus. Laos patuduhononna do di angka tingki na naeng ro dope surung ni hamoraon ni asi ni rohana, di habasaonna i maradophon hita, di bagasan Kristus Jesus.”​—Eps. 2:4-7.

¹⁴ Ndang tarrimangan pasupasu na pinarade ni Jahowa tu halak Kristen na miniahan tingki mamarenta nasida raphon Jesus. (Luk. 22:28-30; Plp. 3:20, 21; 1 Joh. 3:2) Dipatudu Jahowa do ”surung ni hamoraon ni asi ni rohana” tu angka na miniahan. Gabe ”Jerusalem na imbaru” ma nasida, ”oroan” ni Jesus Kristus. (Pgk. 3:12; 17:14; 21:2, 9, 10) Rap ma nasida dohot Jesus  mangalehon ”hahisaron [hahipason] ni angka bangso”. Diurupi nasida ma angka jolma malua sian dosa, hamatean, jala gabe sempurna.​—Jaha Pangungkapon 22:1, 2, 17.

15, 16. Songon dia do Jahowa patuduhon asi ni roha tu angka jolma di ari na naeng ro?

¹⁵ Dipaboa di Epesus 2:7, dipatudu Jahowa do asi ni rohaNa ”di angka tingki na naeng ro”. Di tingki i, dihilala angka jolma ma ”surung ni hamoraon ni asi ni rohana”. (Luk. 18:29, 30) Dipatudu Jahowa do asi ni roha na umbalga tingki dipahehe Ibana halak naung mate sian kuburan. (Job 14:13-15; Joh. 5:28, 29) Ise do na dipahehe? Angka halak naung mate andorang so mate Jesus, jala angka halak na mate na marsihohot tu Jahowa di ari parpudi. Dipahehe ma nasida sude asa manomba Jahowa.

¹⁶ Dipahehe do muse marjuta halak na mate na so hea mananda Debata. Si Johannes manurat, ”Dung i huida ma angka naung mate i, angka na metmet nang angka na balga, jongjong di jolo ni habangsa i; jadi diungkap ma angka buku. Dung i diungkap ma sada buku na asing, i ma buku hangoluan, gabe diuhumi ma angka na mate i marguru tu na tarsurat di bagasan  angka buku i, hombar tu na niulanasida be. Dung i dilehon laut i ma angka na mate na disini, dilehon nang hamatean dohot banua toru i ma angka na mate na tiniopna, gabe diuhumi ma ganup, marguru tu na niulana be.” (Pgk. 20:12, 13) Dilehon ma tingki tu nasida marsiajar taringot Jahowa jala unduk tu Jahowa. Diparsiajari jala diulahon nasida ma prinsip ni Bibel dohot tudutudu na baru na disurat di ”angka buku”. Tudutudu i, patuduhon asi ni roha ni Jahowa.

17. Aha do na ingkon taingot tingki marbarita na uli?

¹⁷ Saonari, lam ringkot do marbarita na uli ala nunga jonok ajal ni portibi on! (Mrk. 13:10) Taingot ma, na tatuju tingki marbarita, i ma pasangaphon Jahowa. Songon dia carana? Tapaboa ma tu angka jolma, pasupasu na laho tajalo di tano na imbaru adong alani asi ni roha ni Jahowa.

18, 19. Alani asi ni roha ni Jahowa, songon dia do hita pasangaphon Ibana?

¹⁸ Tingki marbarita, tapatorang ma dung mamarenta Jesus, tajalo ma pasupasu alani tobusan jala gabe sempurna. Bibel paboahon, ”Paluaonna ma nang na tinompa i sian pangadopan hamagoan, sahat tu haluaon hasangapon na di angka anak ni Debata.” (Rom 8:21) Pasupasu on adong alani asi ni roha ni Jahowa.

¹⁹ Hak na sumurung do paboahon tu angka jolma taringot janji di Pangungkapon 21:4, 5, ”Apusan ni Debata ma nasa iluilunasida sian matanasida: Ndang adong be hamatean nang arsak ni roha; nang angguhangguk, nang na hansit, ndang disi be; ai nunga salpu na parjolo i!” Didok Jahowa ma sian habangsaNa, ”Ida ma, saluhutna do hupaimbaru!” Didok muse, ”Surathon ma i, ai haposan do angka hata on jala na sintong!” Molo marhiras ni roha marbarita na uli, na pasangaphon Jahowa do hita alani asi ni rohaNa!