GANUP taon, lobi sian onom juta halak laho tu harangan di Semenanjung Shima, Jepang. Nasida ro tu Kuil Agung Ise, laho manomba dewi matahari Shinto, i ma Amaterasu Omikami. On nunga disomba hirahira dua ribu taon. Parjolo, nasida mamburi tangan dohot pamanganna. Dung i, jongjong ma nasida di jolo ni kuil, marsinggang, martopak, jala martangiang tu dewi i. * Ndang sala di agama Shinto molo adong ruasna mangihuthon agama na asing, jala pigapiga halak Buddha, Kristen, dohot na asing pe olo do mangihuthon panombaon ni agama Shinto di inganan i.

Godang do agama di portibi on marsomba di inganan na badia, * jala marjuta halak ro tusi. Di luat ni halak Kristen, godang do gereja dohot inganan na badia dipangke laho manomba Jesus, si Maria, dohot angka santo. Inganan na sarupa dipajongjong di inganan na disurat di Bibel, manang di inganan na hea masa ”tanda halongangan”. Adong muse na dipajongjong di inganan ni angka ugasan na dipabadia najolo. Godang halak laho tu inganan sisongon i, ala porsea nasida di inganan i ma Debata manangihon jala mangalusi tangiang. Na asing laho tu inganan sisongon i holan patuduhon na marsitutu do nasida mangihuthon agamana.

Tutu do Debata manangihon jala mangalusi tangiang holan di inganan na badia? Las do roha ni Debata tu halak na marsomba di inganan sisongon i? Jala, ingkon di inganan sisongon i do halak Kristen marsomba? Alus ni sungkunsungkun on ndang holan mangurupi hita marpangantusion taringot inganan sisongon i, alai diurupi do hita mangantusi panombaon na songon dia na palashon roha ni Debata.

Pangkataion ni Jesus dohot sahalak borua Samaria, patuduhon songon dia pangkilalaan ni Debata tu inganan na badia. Tingki i, Jesus ro tu Samaria jala maradi di sumur na jonok tu huta Sikar. Mangkatai ma ibana dohot sahalak borua na manimba aek sian sumur i. Di pangkataion ni nasida, dipatudu borua i do imbar ni panombaon ni halak Jahudi dohot halak Samaria. Ibana mandok, ”Di dolok on do ompu ni hami halak Samaria manomba Debata, alai ianggo hamu halak Jahudi  mandok di Jerusalem do inganan parsombaon tu Debata.”—Johannes 4:5-9, 20, Bibel siganup ari.

Dolok na didok ni borua i, i ma Dolok Gerizim, hirahira 50 kilometer di utara ni Jerusalem. Disi ma inganan ni halak Samaria mangulahon ari raya, songon Paska. Alai, Jesus ndang mamparsoalhon imbar ni panombaon ni nasida. Ibana mandok, ”Porsea ma ho di Ahu, inang! Na ro ma tingkina, gabe ndang pola be dolok an manang Jerusalem partangiangan tu Ama i.” (Johannes 4:21) Di na so panagaman do alus ni Jesus, tarlumobi ala halak Jahudi do ibana! Boasa dipaso panombaon na diulahon di Jerusalem?

Didok Jesus ma muse, ”Alai na ro ma tingkina jala nunga ro i nuaeng, gabe di bagasan Tondi dohot hasintongan martangiang angka partangiang na tutu tu Ama i; ai angka partangiang na songon i dipangido Ama i.” (Johannes 4:23) Saleleng marratus taon, dirimpu halak Jahudi do holan di Jerusalem inganan laho manomba Debata. Laho do nasida tusi tolu hali sataon, mangalehon pelean tu Jahowa. (2 Musa 23:14-17) Alai, Jesus mandok nunga muba be on jala ”partangiang na tutu” ingkon manomba ”di bagasan Tondi dohot hasintongan”.

Tondi dohot hasintongan ndang boi diida halak. Alai, bagas joro na dipangke halak Jahudi laho manomba Debata, boi do diida halak. Alani i, Jesus patorangkon molo halak Kristen na sintong, ndang ingkon manomba Debata di sadasada inganan. Umpamana, di Dolok Gerizim, bagas joro di Jerusalem, manang di inganan na badia na asing.

Tingki mangkatai Jesus dohot borua Samaria, dipatorang ibana ma ”na ro ma tingkina” diganti panombaon tu Debata. Andigan do masa i? Masa ma i dung dipelehon Jesus ngoluna. Alani i, ndang marlangku be panombaon ni halak Jahudi na marojahan tu Uhum ni si Musa. (Rom 10:4) Didok Jesus ma muse, ”Tingkina . . . nunga ro i nuaeng.” Boasa didok Jesus songon i? Ala nunga dipapungu ibana angka sisean na unduk tu parenta on, ”Tondi do anggo Debata; asa angka na martangiang tu Ibana, patut martangiang di bagasan Tondi dohot hasintongan.” (Johannes 4:24) Aha do lapatanna manomba di bagasan tondi dohot hasintongan?

Tingki didok Jesus manomba di bagasan tondi, on patuduhon panombaon na ditogutogu ni tondi parbadia, na mangurupi hita mangantusi isi ni Bibel. (1 Korint 2:9-12) Jala hasintongan na didok  ni Jesus, i ma pangantusion na tingkos sian Bibel. Alani i, panombaonta ndang ingkon di inganan na badia. Dihalomohon Debata do panombaonta molo hombar tu na diajarhon ni Bibel jala ditogutogu tondi parbadia.

Songon dia do pangantusion ni halak Kristen taringot inganan na badia? Ala Jesus mandok hita ingkon manomba Debata di bagasan tondi dohot hasintongan, ndang arga di Debata inganan na badia. Asing ni i, dipaboa do di Bibel songon dia pangkilalaan ni Debata tu halak na manomba ganaganaan. Didok ma, ”Pasiding parsombaon tu angka begu!” Jala didok muse, ”Jaga hamu ma dirimuna maralohon debata sileban!” (1 Korint 10:14; 1 Johannes 5:21) Halak Kristen na sintong ndang manomba Debata di inganan na badia manang manomba marhite ganaganaan. Alani i, ingkon dipasiding halak Kristen na sintong do panombaon sisongon i.

Ndang diorai Bibel hita marsiajar, martangiang manang mangarimangi Hata ni Debata di sada inganan. Inganan parpunguan na tama pangkeon denggan do gabe inganan laho marsiajar Hata ni Debata. Ndang sala muse tabahen batu nisan di kuburan, ala on songon sada parningotan tu halak naung mate. Alai, ndang taoloi hata ni Jesus molo tabahen i gabe inganan na badia manang inganan panombaon.

Ndang porlu laho hamu tu sada inganan na badia, asa ditangihon tangiangmu. Jala ndang lomo roha ni Debata molo laho hita ziarah tu inganan na badia. Bibel patorangkon molo Debata Jahowa, ”Tuhan ni langit dohot tano, ndang maringanan Ibana di angka joro na pinauli ni tangan”. Alai, on ndang mambahen Debata dao sian hita. Boi do hita martangiang tu Ibana jala pos ma rohanta na tangihononNa do hita, ala ”ndang na dao Ibana sian ganup hita”.—Ulaon ni Apostel 17:24-27.