NA DIDOK BIBEL
taringot Marjuji
Di piga-piga halak, songon sada hiburan do na marjuji i. Alai molo di halak na asing, songon sada kebiasaan na mambahen rugi do i.
Sala do marjuji?
NA DIDOK HALAK
Di piga-piga halak, songon sada hiburan do na marjuji i asal ma dang maralo tu peraturan ni pamaretta. Adong do memang piga-piga jenis ni juji na diloas pamaretta. Alana boi do dapot ni pamaretta sian i hepeng na boi dipakke lao mambahen akka kegiatan na bermanfaat tu masyarakat.
NA DIDOK BIBEL
Memang dang adong dipaboa di Bibel dang boi marjuji. Alai sian piga-piga ayat di Bibel, boi ma taboto boha do pandangan ni Debata taringot marjuji.
Sebenarna lao mambuat hepeng ni halak do tujuan ni na marjuji i. Maralo do on tu hata ni Bibel na mandok asa ‘tapasiding ganup ragam ni hahisapon’. (Lukas 12:15) Jadi halak na hisap do halak na marjuji i. Di akka tempat parjujian, biasana ditawarhon do akka hadiah na balga. Alai dang dipaboa tu akka parjuji i, sebenarna maol do monang marjuji. Diboto nasida do akka parjuji i akka halak na olo martaru godang hepeng asa mamora. Jadi sebenarna mambahen halak gabe hisap do na marjuji i. Ala boi dapot ni nasida hepeng dang pola ikkon kerja keras.
Holan dirina sandiri do na dipikkirhon halak na marjuji. Lomo rohana asa talu halak na asing jala nasida ma na monang. Hape didok di Bibel, “Ikkon dipikkirhon ganup halak do aha na penting di halak na asing, unang ma holan na penting di dirina sandiri na dipikkirhon.” (1 Korint 10:24) Jala sada sian Sappulu Paretta i pe mandok, “Unang tubu di roham lao mambuat . . . manang aha pe na adong di donganmu.” (2 Musa 20:17) Molo lomo roha ni sasahalak monang marjuji, sebenarna lomo do rohana asa talu halak na asing jala habis hepeng ni nasida.
Di Bibel, diorai do hita asa unang porsea tu nasib. Najolo adong do piga-piga halak Israel na so togu haporseaonna tu Debata. Olo do nasida mangalehon pelean tu “debata Silehon Uttung”. Boha do pandangan ni Debata taringot i? Didok Ibana do, “Torus do diulahon hamu na jahat di jolokku, jala akka sogo ni rohakku do na dipillit hamu.”—Jesaya 65:11, 12.
Memang di piga-piga negara, sian parjujian do dapot ni pamaretta hepeng lao membiayai pendidikan, kemajuan ekonomi, dohot akka program ni pamaretta na asing. Alai nang pe songon i, tetap do na marjuji i mambahen halak gabe hisap, holan mamikkiri dirina sandiri, jala naeng hatop mamora alai dang olo kerja keras.
“Unang tubu di roham lao mambuat . . . manang aha pe na adong di donganmu.”—2 Musa 20:17.
Aha do akibat ni na marjuji i?
NA DIDOK BIBEL
Adong do sipasingot di Bibel na mandok, “Manang ise na marsakkap naeng mamora, tarjorat ma ibana jala ditarik akka sakkap haotoon dohot sakkap na parohon jea, na mambahen susa jala na mambahen hancur sasahalak.” (1 Timoteus 6:9) Alani hisap tu hepeng do makana olo sasahalak marjuji. Jala dang denggan sifat sisongon i. Alani i ma didok Bibel ikkon tapadao “hahisapon”.—Epesus 5:3.
Ala naeng mamora do sasahalak makana olo ibana marjuji. Dung i gabe holong ma rohana tu hepeng. Didok di Bibel, “Holong ni roha tu hepeng do urat ni nasa hajahaton.” Molo holong roha ni sasahalak tu hepeng, boi do ibana gabe paholsohu jala gabe dang pos be rohana tu Debata. Didok Bibel do muse molo holong roha ni sasahalak tu hepeng, gabe ‘parohon na haccit do i tu dirina sandiri alani godang ni hasusaan’.—1 Timoteus 6:10.
Halak na hisap dang hea mandok mauliate tu akka na adong di ibana. Jala gabe dang marlas ni roha be ibana. Bibel pe mandok, “Halak na makkaholongi perak, dang marna sonang rohana bahenon ni perak i. Jala halak na makkaholongi hamoraon, dang marna sonang rohana bahenon ni passarianna.”—Parjamita 5:10.
Godang do halak na marjuji ujungna gabe kecanduan. Songon i ma na masa di godang inganan. Haru di Amerika Serikat pe, adong do marjuta halak na gabe kecanduan marjuji.
Bibel mandok, ‘Olo do halak na jahat mandapot parbagianan, alai dang na lao parohon pasu-pasu i.’ (Poda 20:21) Molo nungnga kecanduan sasahalak marjuji, boi do gabe godang utangna manang bangkrut, jala boi do gabe dang adong be karejona. Dang adong be donganna, jala boi do ibana gabe marsirang dohot pasanganna. Alai molo taihutton nasehat na dipaboa di Bibel, dang na lao hilalaotta masalah sisongon i. Jala boi ma hita marlas ni roha.
“Manang ise na marsakkap naeng mamora, tarjorat ma ibana jala ditarik akka sakkap haotoon dohot sakkap na parohon jea, na mambahen susa jala na mambahen hancur sasahalak.”—1 Timoteus 6:9.
