Patoguhon Tekad

“Sasahalak boi marhasil so sian na marisap, ala balga do tekad ni nasida.”—Bukku “Stop Smoking Now!”

INTINA, molo lomo do rohamuna naeng so marisap, ikkon balga do tekadmuna lao mangulahon i. Songon dia carana asa lam balga tekadmuna? Pikkirhon ma aha manfaatna molo so hamu marisap.

Gabe hemat ma hamu. Molo sabukkus do sigaretmuna sadari, berarti di bagasan sataon nga marjuta hepeng na dipahabis hamu lao tu sigaret. “Dang husadari nungnga godang hape hepeng na hupasuda alani sigaret.”—Gyanu, Nepal.

Lam denggan ma ngolumuna. “Lam denggan do ngolukku jala tamba do las ni rohakku dung hupaso na marisap i.” (Regina, Afrika Selatan) Dung dipaso sasahalak marisap, lam denggan do ibana mandai dohot manganggo manang aha pe. Biasana lam tamba do gogona jala lam bagak.

Tamba sehat ma hamu. “Bawa manang borua, na poso manang na matua, molo dung so marisap lam sehat do nasida.”—Pusat Pengendalian dan Pencegahan Penyakit di Amerika Serikat.

Gabe lam percaya diri ma hamu. “Hupaso ma marisap ala dang olo au gabe hatoban ni sigaret. Ikkon au sandiri do na mangendalihon dirikku, dang sigaret.”—Henning, Denmark.

Gabe lam sehat ma keluargamuna. “Molo marisap hamu . . . dohot do halak na asing marsahit. . . . Sada penelitian patuduhon ganup taon marribu do halak na mate alani kanker paru-paru dohot jantung. Boasa? Ala dohot nasida mangisap timus ni sigaret na sian halak na marisap.”—Lembaga Kanker Amerika.

Las ma roha ni Debata mangida hamu. “Akka dongan na dihaholongi, . . . tapaias ma diritta sian akka na mambahen ramun.” (2 Korint 7:1) “Pelehon hamu ma dirimuna gabe pelean . . . na badia, jala na palasson roha ni Debata.”—Rom 12:1.

“Dung huboto na sogo roha ni Debata molo tabahen ramun pamatangta, pittor hupaso ma na marisap i.”—Sylvia, Spanyol.

Memang dang cukkup holan tekad na balga. Porlu do hita diurupi halak na asing, termasuk ma i keluarga manang akka dongan. Aha ma na boi diulahon halak i?