Didok halak Jahudi do Jesus mangalanggar Patik ni Debata, ala pamalumhon na marsahit di ari Sabbat. Alani i, didok Jesus ma, “Tongtong do karejo Damang sahat tu saonari, jala ahu pe tongtong do songon i.”​—Johannes 5:17.

Sasintongna, ndang mangalanggar patik Jesus disi. Gariada na maniru Debata do ibana tingki marbarita dohot pamalumhon halak. Alani i, tongtong do diulahon Jesus na denggan. Alai lam muruk do halak Jahudi mambege alus ni Jesus. Marsitutu ma nasida laho mambunu Jesus. Boasa?

Ala didok Jesus do Debata Amana. Didok roha ni halak Jahudi, na mangaleai Debata do Jesus disi. Ai gabe dos do dibahen Jesus dirina songon Debata. Nang pe songon i, ndang mabiar Jesus jala dialusi ibana do nasida. Ninna ma, “Dihaholongi Ama i do Anak i jala dipatuduhon do sude na niulana tu ibana.”​—Johannes 5:20.

Debata do Silehon Hangoluan. Dipatuduhon Debata do i marhite mangalehon gogo tu angka baoa najolo laho pahehehon halak na mate. Didok Jesus ma muse, “Songon Ama i na pahehehon halak na mate jala pangoluhon nasida, Anak i pe pangoluonna do manang ise lomo ni rohana.” (Johannes 5:21) Pangkirimon na mansai denggan do on! Gariada, saonari pe nunga dipahehe Jesus angka jolma marhite patoguhon parale-aleon ni jolma tu Debata. Ai didok Jesus do, “Manang ise na manangihon hatangku jala porsea tu Ama na marsuru ahu, dapotna do hangoluan na saleleng ni lelengna.”​—Johannes 5:24.

Tingki i, ndang hea dope Jesus paheheon halak na mate. Alai, dipaboa ibana do tu halak na marsogo ni roha i na laho masa haheheon. Didok ibana ma, “Ai na ro ma tingkina begeon ni saluhut na di kuburan i ma soarana jala kaluar ma nasida.”​—Johannes 5:28, 29.

Nang pe Jesus dipillit laho manguhumi halak naung mate, alai tangkas do dipatuduhon ibana na umtimbo Debata sian ibana. Didok Jesus do, “Ndang adong na boi huulahon mangihuthon sangkaphu sandiri. . . . Alai sangkap ni na marsuru ahu i do na huihuthon.” (Johannes 5:30) Ndang hea dope dipaboa Jesus ulaonna i tu godang halak. Alai sasintongna, lobi sian i pe boi do botoon ni angka na marsogo ni roha i. Ai didok Jesus do tu nasida, “Disuru hamu do angka halak mandapothon si Johannes [Pandidi] jala nunga dipaboa ibana hasintongan i.”​—Johannes 5:33.

Ra nunga hea dibege angka na marsogo ni roha i taringot i dua taon naung salpu. Nunga dipaboa si Johannes tu pamimpin ni halak Jahudi na laho ro do sasahalak dungkon ibana, na digoari “Panurirang” dohot “Kristus”. (Johannes 1:20-25) Dipaboa Jesus ma muse taringot tu si Johannes. Najolo sangap do ibana dibahen nasida, alai saonari nunga dipenjara ibana. Didok Jesus ma, “Satongkin do las rohamuna tu sinondangna i.” (Johannes 5:35) Tangkas ma, rumingkot do na dipaboa Jesus tu nasida sian na pinaboa ni si Johannes Pandidi.

Didok Jesus do, “Ulaon na nilehon ni Ama i laho pasidungonku, angka i do na huulahon [dohot ma i ulaon pamalumhon na marsahit di tingki i] jala on ma na patuduhon na sinuru ni Ama i do ahu. Jala Ama na marsuru ahu i pe dipaboa do taringot tu ahu.” (Johannes 5:36, 37) Umpamana, tingki na tardidi i Jesus, dipaboa Jahowa do taringot tu ibana.​—Mateus 3:17.

 Sasintongna, ndang adong dalan ni halak laho marsogo ni roha tu Jesus. Jala ayat na pinangke ni nasida gabe patoguhon na tutu do Jesus. Ai didok Jesus do, “Molo porsea do hamu tu si Musa, porsea ma nian hamu tu ahu. Ai taringot tu ahu do na sinuratna. Alai molo so porsea do hamu tu na sinuratna, songon dia ma hamu boi porsea tu na hudok i?”​—Johannes 5:46, 47.