1. Songon dia do pardalanan ni si Jona tu Ninive, jala songon dia do pangkilalaanna taringot tusi?

ANDORANG SO borhat tu Ninive, adong do tingki ni si Jona mamingkirhon pardalananna. Lobi sian 800 kilometer ma dao ni pardalananna i. Olo do ra sabulan manang lobi lelengna asa sahat ibana tu Ninive. Porlu pingkirhononna sian dia do ibana laho tu Ninive. Sian dalan na jumonok do, manang sian dalan na dumao. Dung i, ditorushon ma pardalananna i sian rura manang dolok. Ingkon halianganna do Padang Pasir Ram, tariparanna angka sunge, dohot ma i sunge Euprat. Ingkon marborngin do ibana di angka huta di Siria, Mesopotamia dohot Assur na so tinandana. Alai mabiar ma ibana tingki lam jonok tu kota Ninive.

2. Songon dia do si Jona diurupi asa sai mangoloi Jahowa?

² Ndang boi be tadingkonon ni si Jona ulaonna on, ala nunga hea dibahen ibana songon i. Songon naung dipaboa, dipinsang Jahowa ma ibana marhite habahaba, jala dipalua marhite dengke na balga. Dung tolu ari, diutahon dengke i ma ibana tu darat. Na masa tu si Jona mangajari ibana asa sai mangoloi Jahowa.​—Jona, bindu 1, 2.

3. Songon dia do Jahowa maradophon si Jona, jala aha do sungkunsungkun na tubu alani i?

³ Dioloi si Jona do Jahowa tingki disuru ibana laho muse tu Ninive. Rade do ibana mangulahon pardalanan na dao tu sabola timur. (Jaha Jona 3:1-3.) Alai, nunga muba si Jona dung dipinsang  Jahowa ibana? Umpamana, nunga dipatuduhon Jahowa asi ni rohaNa tu si Jona. Dipalua do ibana sian parmaraan, jala ndang diuhum Jahowa ibana. Dilehon Jahowa do tingki tu ibana laho marhamubaon jala mangulahon parentaNa. Dung sude na masa i, nunga rade si Jona patuduhon asi ni roha tu na asing? Tontu, ndang mura on patuduhonon ni jolma na mardosa. Taida ma angka parsiajaran na tadapot sian si Jona.

4, 5. Boasa didok Jahowa Ninive ”huta na bolon” jala aha do na taparsiajari sian i taringot tu Jahowa?

⁴ Ndang dos pangkilalaan ni si Jona dohot pangkilalaan ni Jahowa taringot kota Ninive. Dipaboa tu hita, ”Huta na bolon do ianggo Ninive di jolo ni Debata.” (Jona 3:3) Buku Jona manurat tolu hali hata ni Jahowa na mandok ”Ninive, huta na bolon”. (Jona 1:2; 3:2; 4:11) Boasa songon i pangkilalaan ni Jahowa taringot tu Ninive?

 ⁵ Ninive, i ma kota naung leleng, jala kota na pinajongjong ni si Nimrod dungkon Aek na Sumar. Balga do kota i, songon kota metropolitan. Alani i, tolu ari ma lelengna dalanan asa sahat sian ujung tu ujung. (1 Mus. 10:11; Jona 3:3) Timbo do tembok ni kota i, jala adong do angka kuil na balga. Alai, ndang i na arga di Jahowa, penduduk ni kota na godang i do. Asi do roha ni Jahowa mangida nasida. Alani i, las do roha ni Jahowa molo ditadingkon nasida hajahatonna asa malua sian panguhuman.

6. (a) Boasa mabiar si Jona dung sahat di Ninive? (Ida surat na di toru.) (b) Aha do na boi taparsiajari tingki marbarita si Jona?

⁶ Olo do lam mabiar si Jona dung diida godang ni penduduk ni kota i. Adong lobi sian 120.000 halak godang ni pendudukna. * Mardalan ma si Jona parsadarian tu tongatonga ni kota i laho mangalului inganan na denggan pasahathon barita panguhuman. Bahasa aha do dipangke si Jona mangkatai tu halak Ninive? Diboto ibana do bahasa Assur? Manang dibahen Jahowa do tanda halongangan asa boi ibana marbahasa Assur? Ndang dipaboa tu hita. Olo do ra ibana mamangke hata Heber. Dung i, adong na manerjemahon tu bahasa Ninive jala jempek do isi ni barita i. Ninna ibana ma, ”Opatpulu ari nari na ma, jadi marongrong ma Ninive!” (Jona 3:4) Mulahulak do didok ibana songon i. Tarida ma habaranion dohot haporseaon ni si Jona tingki marbarita. Laos songon i do na dihaporluhon halak Kristen saonari.

7, 8. (a) Songon dia do pangkilalaan ni halak Ninive mambege barita ni si Jona? (b) Songon dia do muse pangkilalaan ni rajanasida?

⁷ Marpungu ma halak Ninive mambege barita ni si Jona. Dirimpu si Jona do muruk halak Ninive mambege baritana, alai ndang songon i na masa. Rade do nasida manangihon barita i! Jala tarsar ma barita panguhuman i tu saluhut kota. (Jaha Jona 3:5.) Rade do penduduk ni kota i marhamubaon, halak na mora, na pogos, na matua dohot na poso. Marpuasa ma nasida. Dung i, sahat do barita i tu raja ni Ninive.

 ⁸ Dohot ma raja ni Ninive marhamubaon. Turun ma ibana sian karosi harajaonna, dung i ditanggali ma pangkean harajaonna, dipangke ma abit goni jala ”hundul tu sirabun”. Dohot do angka pegawai ni harajaon i mambahen songon i. Dibahen ma parenta asa sude jolma ro di pinahan marabit goni. * Diboto raja i do naung mardosa nasida dohot rayatna ala mangulahon hajahaton. Didok raja i ma, ”Anggiat tung . . . mulak [Debata] sian parpiar ni rimasna, asa unang mago hita.”​—Jona 3:6-9.

9. Aha do na so dihaporseai angka kritikus, alai boasa boi tadok sala nasida?

⁹ Ndang porsea halak na mangkritik Bibel tu hamubaon na binahen ni halak Ninive. Alai pakar ni Bibel patorangkon, ndang pola longang roha mangida i. Tingki i, dihaporseai halak Ninive dope takhayul, jala haporseaon on boi mambahen nasida hatop marhamubaon. Dung i, ditaringoti Jesus do di pudian ni ari taringot halak Ninive na marhamubaon. (Jaha Mateus 12:41.) Di surgo do Jesus tingki i, tontu patar do diida ibana hamubaon ni halak Ninive. (Joh. 8:57, 58) Na ringkot taingot, sajahatjahat ni jolma, sada tingki boi do nasida marhamubaon. Dung i, holan Jahowa do na mamboto roha ni jolma.

10, 11. (a) Songon dia do pangkilalaan ni Debata mangida hamubaon ni halak Ninive? (b) Boasa boi tadok ndang sala pangkilalaan ni Jahowa taringot tu halak Ninive?

¹⁰ Songon dia do pangkilalaan ni Jahowa mangida hamubaon ni halak Ninive? Dipaboa si Jona tu hita, ”Dung diida Debata pambahenannasida, na mulak i nasida sian dalannasida angka na roa i, gabe disolsol Debata ma rohana taringot tu hamagoan na nilumbahonna bahenonna hian tu nasida, gabe ndang saut dibahen.”​—Jona 3:10.

¹¹ Na sala do pangkilalaan ni Jahowa taringot tu halak Ninive? Ndang sala. Bibel paboahon tu hita, tigor do saluhut  dalan ni Jahowa. (Jaha 5 Musa 32:4.) Diuba Debata ma sangkapNa dung diida hamubaon ni halak Ninive i. Ndang saut be nasida diuhum songon na nidokNa hian. Dipatuduhon Jahowa do asi ni rohaNa tu halak Ninive, ala marhamubaon nasida.

12, 13. (a) Songon dia do Jahowa patuduhon molo Ibana parasi roha jala ndang maol jonohan? (b) Boasa tadok sintong do surirang ni si Jona i?

¹² Jotjot do pamimpin agama mambahen halak marpingkir molo Debata maol jonohan, ndang parduli jala kejam. Alai sasintongna, marpangantusion jala rade do Debata Jahowa patuduhon asi ni rohaNa. Andorang so ditontuhon Jahowa laho manguhum parjahat, dipasingot Debata do nasida marhite naposoNa asa mambahen hamubaon, songon halak Ninive. (Hes. 33:11) Didok do tu si Jeremia, ”Satongkin ahu martahi dompak sada bangso dohot dompak, sada harajaon naeng mangurati dohot naeng mamansingkon dohot naeng mangago. Alai molo mulak bangso naung hupalumba i sian hajahatonna, gabe marpangulahi rohangku taringot tu hamagoan naung husangkapi naeng bahenonku tu ibana.”​—Jer. 18:7, 8.

¹³ Na so sintong do barita ni si Jona? Ndang songon i. Surirang na pinasahat ni si Jona gabe sipasingot tu nasida. Barita panguhuman i dipasahat alani hajahaton ni halak Ninive. Molo ndang marhamubaon halak Ninive sian hajahatonna, tontu uhumon ni Debata ma nasida songon na pinaboaNa marhite si Jona. Jala di pudian ni ari, diuhum Debata do halak Ninive.​—Sep. 2:13-15.

14. Songon dia do pangkilalaan ni si Jona tu asi ni roha ni Jahowa?

¹⁴ Songon dia do pangkilalaan ni si Jona ala ndang diuhum Debata halak Ninive di tingki i? Dipaboa tu hita, ”Sogo situtu do roha ni si Jona disi, jala piripirion ibana.” (Jona 4:1) Tarida do sian tangiang ni si Jona, na sogo rohana tingki so diuhum Debata halak Ninive. Didok si Jona, tumagon ma tongtong hian ibana di hutana. Didok muse, nunga diboto ibana hian na so paroon ni Jahowa panguhuman tu Ninive. Laos i do sidalianna umbahen na maporus ibana tu Tarsis. Dung i, didok ibana muse tu Jahowa, dumenggan ma ibana mate sian na mangolu.​—Jaha Jona 4:2, 3.

15. (a) Aha do na mambahen muruk si Jona? (b) Songon dia do dibahen Jahowa maradophon ibana?

¹⁵ Aha do na mambahen muruk si Jona? Ndang taboto boasa muruk situtu ibana. Alai taboto do, nunga dipaboa ibana  barita ni hasesega ni kota Ninive, jala porsea do halak Ninive tu barita i. Saonari, ndang saut diuhum Jahowa Ninive. Na maila do ibana diinsahi jala didok panurirang na so tutu? Aha pe alusna, ndang las roha ni si Jona tu hamubaon ni halak Ninive dohot tu asi ni roha ni Jahowa. Gabe dirina sandiri dohot hasangaponna do na dipingkirhon. Tongtong do marasi ni roha Jahowa tu si Jona. Nang pe ndang diargai ibana Jahowa, alai diida Debata do na denggan sian diri ni si Jona. Lambok do disungkun Jahowa si Jona, ”Tung [patut] ma ho marronirimas?” (Jona 4:4) Dialusi si Jona do Jahowa? Ndang dipaboa di Bibel.

16. Boasa jolma jotjot ndang mangantusi lomo ni roha ni Debata, jala aha do na taparsiajari sian si Jona?

¹⁶ Mura do ra hita mandok na sala si Jona disi. Alai taingot ma, jotjot do jolma na mardosa ndang mangantusi lomo ni roha ni Debata. Adong do sipata na marpandapot, dumenggan do molo dipaso Jahowa parmaraan. Manang dumenggan do molo pintor diuhum angka parjahat, jala pintor diparo ajal ni hasiangan on. Alani i, taparsiajari ma sian na masa tu si Jona, molo ndang sapandapot hita tu pingkiran ni Jahowa, sasintongna pangantusionta do na porlu tapahombar tu pingkiran ni Debata.

17, 18. (a) Aha do dibahen si Jona dung ditadingkon Ninive? (b) Aha do pangkorhon ni hau na tubu alani tanda halongangan tu si Jona?

¹⁷ Mandele ma si Jona. Ditadingkon ibana ma Ninive, laho ma ibana tu inganan na timbo, dompak timur. Dipature ibana ma soposopo jala hundul ma ibana disi, huhut manatap jala paimahon na masa tu kota Ninive. Olo do ra hirim rohana mangida hasesega ni kota i. Songon dia do bahenon ni Jahowa mangurupi ibana asa patuduhon asi ni roha?

¹⁸ Dung borngin, dibahen Jahowa ma tubu sada hau laho mangalinggomi si Jona. Dung dungo, ”las situtu ma roha ni si Jona” ala dilinggomi bulung ni hau i ibana. Dirimpu ibana do hau i tanda halongangan na patuduhon pasupasu ni Debata. Alai, lobi sian i na laho bahenon ni Debata. Na tinuju ni Jahowa, i ma mangurupi si Jona asa marasi ni roha. Alani i, dibahen Debata ma muse tanda halongangan. Dibahen Jahowa ma malos hau i marhite sada gulokgulok. Dung i, diparo ma muse ”alogo na mohop” sian timur, gabe hansit ma ulu ni si Jona pola naeng peak ibana. Dipangido ibana ma muse asa tumagon ibana mate.​—Jona 4:6-8.

19, 20. Songon dia do Jahowa mangurupi si Jona asa denggan marpingkir?

 ¹⁹ Disungkun Jahowa ma sahali nai boasa muruk si Jona alani hau i. Alai, dipasintong si Jona do muse dirina. Didok ibana ma, ”[Patut] do ahu marronirimas sahat ro di hamatean.” Ujungna, dipatorang Jahowa ma tu si Jona parsiajaran sian hau i.​—Jona 4:9.

²⁰ Diurupi Jahowa ma si Jona asa denggan marpingkir. Dipaboa Jahowa ma boasa pola marsak ibana alani sada hau na tubu di bagasan saborngin jala mate di manogotna. Hape so adong na diula si Jona laho mambahen tubu hau i. Dung i, didok Jahowa ma, ”Baliksa pala ahu, tung so marasi ni roha ahu mida Ninive, huta na bolon i, na marisi lobi saratus duapulu ribu jolma, angka na so umboto parsirangan ni siamunna dohot sihambirangna, tole pinahan na sai deak?”​—Jona 4:10, 11. *

21. (a) Aha do parsiajaran na dilehon Jahowa tu si Jona? (b) Songon dia do na masa tu si Jona mangurupi hita mamareso rohanta?

 ²¹ Boi do taida parsiajaran na denggan na pinatuduhon ni Jahowa tu si Jona? Jahowa do na mangalehon hangoluan tu penduduk ni Ninive, jala mangalehon na ringkot tu nasida dohot tu sude na mangolu di tano on. Hape si Jona, so ibana manuan hau i, boasa ma gabe gumodang asi ni roha ni si Jona tu sada hau martimbangkon tu 120.000 halak, asing dope muse angka pinahan? Ndang na on patuduhon molo si Jona holan mamingkirhon dirina sandiri? Dung i muse, ala na boi do hau i mangalinggomi ibana umbahen na muruk ibana. Ndang na holan mangalului sangap tu dirina ibana, umbahen na muruk ibana ala ndang saut diuhum Debata kota Ninive? Na masa tu si Jona, mangurupi hita laho mamareso rohanta. Ise sian hita na so lomo rohana dipasangap? Alani i, mandok mauliate ma hita tu Jahowa, ala sabar do Ibana mangajari hita laho patuduhon asi ni roha, manarihon halak na asing, dos songon Ibana!

22. (a) Songon dia do pangkilalaan ni si Jona tu pangajarion ni Jahowa? (b) Aha do na porlu taulahon?

²² Sungkunsungkunna: Marsiajar do si Jona sian aha na masa tu ibana? Buku na disurat mamangke goarna, dipaujung marhite sungkunsungkun na so taboto alusna. Adong kritikus mandok, ndang dialusi si Jona sungkunsungkun i. Alai sasintongna dialusi ibana do. On tarida sian buku Jona i sandiri. Songon naung taboto, si Jona do panurat ni buku i. Pingkirhon ma dung sahat si Jona di hutana. Dung i, disurat ibana ma sude na masa taringot tu ibana. Nunga lam tamba umurna, bisukna jala lam marserep ni roha. Diingot ibana ma muse hagaleonna, tingki mangalo ibana, jala na maol ibana patuduhon asi ni roha. On patuduhon, dapot ni si Jona do laba sian pangajarion ni Jahowa, jala rade do ibana marasi ni roha. Rade do hamu patuduhon asi ni roha?​—Jaha Mateus 5:7.