PARSIAJARAN 4
Jesus Kristus, Ise do Ibana?
1. Songon dia do mula ni hangoluan ni Jesus?
Angka aha ma parange na mambahen Jesus mura jonohan?—MATEUS 11:29; MARKUS 10:13-16.
Ibana ma tompaan ni Debata na parjolo. Ndang songon jolma na asing, andorang so ditubuhon di tano on nunga mangolu hian Jesus di surgo mardaging tondi. (Johannes 8:23) Ndang ditubuhon sada borua di surgo ibana. Ditompa Amana na di surgo i do ibana, i ma Jahowa. Alani i, tongon ma didok Jesus Anak ni Debata. Ibana pe dijou do si ”Hata” ala ibana sipasahat hata ni Debata. (Johannes 1:14) Dohot do Jesus manompa angka na asing.—Jaha Poda Sian Raja Salomo 8:22, 23, 30; Kolosse 1:15, 16.
2. Boasa ro Jesus tu tano on?
Debata manuru anakNa tuat tu tano on, dipapinda hangoluanna sian surgo tu bortian ni sada anakboru Jahudi na margoar si Maria. Alani i Jesus ndang maramahon jolma. (Lukas 1:30-35) Jesus ro tu tano on laho (1) mangajarhon hasintongan taringot tu Debata, (2) mambahen sada sitiruon laho mangulahon lomo ni roha ni Debata nang pe maol, jala (3) mangalehon hangoluan na tipak bahen ”tobusan”.—Jaha Mateus 20:28.
3. Boasa hita mamorluhon tobusan?
Tobusan i ma arga na ingkon sigararon laho paluahon jolma sian jea hamatean. (2 Musa 21:29, 30) Di tingki manompa jolma, ndang hea dihalomohon Debata asa matua jala mate nasida. Sian dia taboto? Dipabotohon Debata tu jolma na parjolo, i ma si Adam, molo diula ibana aha na didok ”dosa” di Bibel, mate ma ibana. (1 Musa 2:16, 17; 5:5) Didok di Bibel, hamatean ”bongot” tu portibi on marhite si Adam. Alani i, gabe ditean pinompar ni si Adam ma hamatean, upa ni dosa i. Mansai ringkot do tobusan on di hita asa malua hita sian hamatean na tatean sian si Adam.—Jaha Rom 5:12; 6:23.
Ise do na boi manggarar tobusan laho paluahon hita sian hamatean? Dung mate hita, holan upa ni dosanta sandiri do na tagarar. Jolma na so tipak ndang boi manggarar tobusan tu donganna jolma.—Jaha Psalmen 49:8-10.
4. Boasa ingkon mate Jesus?
Ndang songon hita, tipak do Jesus ala ibana ditubuhon marhite tanda halongangan. Ndang hea mardosa ibana. Alani i, ndang ingkon mate ibana ala dosana sandiri, alai mate ibana alani dosa ni jolma. Dipatuduhon Jesus do holongna tu hita marhite pangoloionna tu Amana jala dilehon hosana humongkop hita.—Jaha Johannes 3:16; Rom 5:18, 19.
Tonton ma video Boasa Ingkon Mate Jesus?
5. Aha ma na diulahon Jesus saonari?
Tingki di tano on, dipamalum Jesus do na marsahit, dipahehe na mate, jala diurupi angka na marsitaonon. Sude na i, patuduhon aha na laho bahenonna di ari na naeng ro tu angka jolma na daulat roha. (Mateus 15:30, 31; Johannes 5:28) Dung mate Jesus, dipahehe Debata do muse ibana mardaging tondi. (1 Petrus 3:18) Dung i, hundul ma Jesus di siamun ni Debata paima dilehon Jahowa huaso tu ibana laho mamarenta gabe Raja di liat portibi on. (Heber 10:12, 13) Saonari, nunga mamarenta Jesus gabe Raja di surgo, jala on ma barita na uli na dibaritahon siihuthon ibana di liat portibi on.—Jaha Daniel 7:13, 14; Mateus 24:14.
Ndang sadia leleng nai, marhuaso ma Jesus gabe Raja laho pasohon sude sitaonon dohot angka na mambahensa. Sude jolma na marhaporseaon tu Jesus na mangoloi ibana mandapot hangoluan di Paradeiso di tano on.—Jaha Psalmen 37:9-11.
