Ditogihon Debata do asa angka halak sian nasa bangso martangiang tu Ibana. (Psalmen 65:3) Alai, ndang ditangihon, manang dijalo Ibana sude tangiang. Umpamana, tarambat do tangiang ni sada baoa molo jungkat ibana martungganiboru. (1 Petrus 3:7) Jala, tingki sai na jahat diula halak Israel, ndang olo Debata manangihon tangiang nasida. Tangkas ma, sada hasurungan do anggo tangiang. Alai, ditangihon Debata do tangiang ni angka na mardosa molo dipauba nasida rohana.​—Jaha Jesaya 1:15; 55:7.

Tonton ma video Ditangihon Debata do Sude Tangiang?

Sada sian ruhut ni panombaonta do anggo martangiang. Alani i, holan tu Panompanta, Jahowa do hita martangiang. (Mateus 4:10; 6:9) Jala, ala ndang tipak hita, ingkon martangiang marhite goar ni Jesus naung mate humongkop hita sian dosa. (Johannes 14:6) Ndang lomo roha ni Jahowa molo taulangulangi tangiang na diapil manang naung tarsurat. Lomo do rohaNa molo hita martangiang sian nasa rohanta.​—Jaha Mateus 6:7; Pilippi 4:6, 7.

Boi ditangihon Sitompa hita tangiang na di bagasan roha. (1 Samuel 1:12, 13) Ditogihon do hita asa martangiang di ganup tingki, songon di ari manogot manang di bot ni ari, andorang so mangan, jala molo adong sitaononta.​—Jaha Psalmen 55:23; Mateus 15:36.

Ndang mura maraleale tu Debata ala hita mian di humaliang ni angka na so porsea tu Ibana jala na manginsahi bagabagaNa laho mambahen hadameon di tano on. (2 Timoteus 3:1, 4; 2 Petrus 3:3, 13) Alani i, hita mamorluhon pangurupian sian dongan sahaporseaon, jala nasida pe mamorluhon hita.​—Jaha Heber 10:24, 25.

 Molo marsaor hita rap angka na manghaholongi Debata, hita pe lam jonok ma tu Debata. Di parpunguan ni Sitindangi Ni Jahowa, lam dipatogu ma haporseaonta molo taida haporseaon ni donganta.​—Jaha Rom 1:11, 12.

Hita boi gabe aleale ni Debata molo tarimangi aha naung taparsiajari sian HataNa. Pingkiri ma denggan sude parniulaanNa, podaNa, dohot bagabagaNa. Molo tarimangi jala martangiang hita, lam taargai ma holong dohot bisuk ni Debata.​—Jaha Josua 1:8; Psalmen 1:1-3.

Boi hita lam jonok tu Debata molo tahaporseai Ibana. Alai, haporseaon boi dipatudos songon suansuanan na ingkon disirami. Ingkon sai tasiram do haporseaonta marhite mangarimangi hasintongan na gabe ojahan ni haporseaonta.​—Jaha Mateus 4:4; Heber 11:1, 6.

Disarihon Jahowa do angka na manghaholongi Ibana. Diramoti Ibana do nasida sian angka na boi manegai haporseaon dohot pangkirimon nasida laho mangolu salelenglelengna. (Psalmen 91:1, 2, 7-10) Dipasingot Ibana do hita asa mandao sian dalan ngolu na boi manegai hahipason dohot hasonanganta. Dipatudu Jahowa do dalan hangoluan na sun denggan tu hita.​—Jaha Psalmen 73:27, 28; Jakobus 4:4, 8.