Ulaon ni Apostel 12:1-25
12 Hira-hira di tikki i, mulai ma dibahen si Herodes akka na haccit tu piga-piga halak na di huria.+
2 Dibunu ibana ma si Jakobus abang ni si Johannes+ mamakke podang.+
3 Dung diida si Herodes na las roha ni halak Jahudi mangida na binahenna i, ditakkup ma muse si Petrus. (On masa saleleng Perayaan Roti na So Marragi.)+
4 Dung ditakkup si Petrus, dipamasuk ma ibana tu penjara.+ Disuru ma ibana jagaon ni opat punguan ni tentara. Opat halak ma tentara i sapunguan. Direncanahon si Herodes do lao mamboan si Petrus tu* jolo ni godang halak dung salpu ari Paska.
5 Saleleng dipenjarahon si Petrus, sai ditangiakkon huria do ibana.+
6 Di borngin andorang so diboan si Petrus tu jolo ni akka jolma i, ditali do ibana mamakke dua ratte di tonga-tonga ni dua tentara. Modom do ibana di tikki i jala adong do muse akka panjaga di pintu ni penjara i.
7 Toppu ma jongjong suru-suruan ni Jahowa* disi,+ jala gabe tiur situtu ma penjara i. Dihutur suru-suruan i ma si Petrus lao mandungoi ibana, ninna ma, “Hatop, dungo ma ho!” Dung i malua ma ratte i sian tanganna.+
8 Didok suru-suruan i ma tu ibana, “Siap-siap ma ho, pakke ma sipatumi.” Dibahen si Petrus ma songon i. Didok suru-suruan i ma muse, “Pakke ma baju luarmi jala ihutton ma au.”
9 Diihutton si Petrus ma suru-suruan i, nang pe sasittongna dang diboto ibana na tutu masa na binahen ni suru-suruan i. Ai dirippu ibana do na mandapot parnidaan ibana.
10 Dung dibolus nasida panjaga na parjolo dohot na paduahon, sahat ma nasida di gerbang bosi, gerbang lao kaluar tu kota. Bukka sandiri do gerbang i. Dung kaluar, rap mardalan ma nasida, alai toppu ma ditinggalhon suru-suruan i si Petrus.
11 Gabe diboto si Petrus ma na masa tu ibana, ninna ma, “On pe asa huboto, nungnga disuru Jahowa* suru-suruanna paluahon au sian si Herodes dohot sian sude rencana ni halak Jahudi na jahat.”+
12 Dung takkas diboto si Petrus na masa i, lao ma ibana tu jabu ni si Maria omak ni si Johannes na digoari si Markus.+ Di tikki i, marpungu do godang halak disi lao martangiang.
13 Tikki dituktuki si Petrus pintu ni gerbang, ro ma sahalak hatoban borua na margoar si Rode lao mangida ise na ro i.
14 Dung diboto ibana soara ni si Petrus do i, marlojong ma ibana muse tu bagasan jala dang saut dibukka ibana pintu i alani las ni rohana. Dipaboa ibana ma tu nasida naung jongjong si Petrus di gerbang.
15 Didok nasida ma tu ibana, “Na marnipi do huroha ho.” Alai sai dipartahatton ibana do na tutu hatana i. Gabe ninna nasida ma, “Suru-suruanna do i.”
16 Alai sai dituktuki si Petrus do pintu i. Dung dibukka nasida pintu i, gabe tarsonggot ma nasida mangida ibana.
17 Alai dibahen si Petrus ma tanda dohot tanganna asa hohom nasida. Dipatorang ibana ma songon dia Jahowa* mamboan ibana kaluar sian penjara. Jala didok ibana ma, “Paboa hamu ma na masa on tu si Jakobus+ dohot tu akka dongan na asing.” Dung i kaluar ma ibana jala lao tu inganan na asing.
18 Marsogotna i, gaor ma akka tentara na manjaga i, ai dang diboto nasida manang aha na masa tu si Petrus.
19 Sai dilului si Herodes ma si Petrus tu sude inganan. Ala dang dapotna, disukkuni ibana ma akka panjaga i jala diparettahon ma asa dihukum nasida.+ Dung i lao ma si Herodes sian Judea tu Kaesarea, disi ma ibana maringanan piga-piga leleng.
20 Di sada tikki, muruk ma si Herodes tu halak Tirus dohot tu halak Sidon. Gabe ro ma nasida manjuppangi si Herodes. Ai sian luat ni si Herodes do ro akka sipanganon tu luat ni nasida. Alai parjolo ma dielek-elek nasida si Blastus, na mangaradoti istana* ni raja i asa diurupi nasida. Dung i dipangido nasida ma asa mardame nasida dohot si Herodes.
21 Di ari naung ditottuhon, dipakke si Herodes ma pakkean harajaonna, hundul ma ibana di kursi pengadilan,* jala makkatai ma ibana di jolo ni akka jolma.
22 Dung i, marsurak ma akka jolma i didok nasida ma, “Soara ni debata do i dang soara ni jolma.”
23 Laos satokkin i, dibahen suru-suruan ni Jahowa* ma ibana marsahit, ai dang dipasangap ibana Debata. Diallangi akka gilok-gilok ma ibana laos mate.
24 Alai lam rarat ma hata ni Jahowa* jala lam godang ma halak na gabe sisean.+
25 Dung sae ulaon ni si Barnabas+ dohot si Saulus pasahatton silehon-lehon tu akka dongan na di Jerusalem,+ mulak ma nasida tu Antiokia jala ditogihon ma si Johannes+ na laos digoari si Markus.
Surat na di toru
^ Manang “si Herodes do lao mangadili si Petrus di”.
^ Ida Lampiran A5.
^ Ida Lampiran A5.
^ Ida Lampiran A5.
^ As. “kamar”.
^ Ida Lampiran A5.
^ Ida Lampiran A5.
