Panguhum 2:1-23
2 Dung i borhat ma suru-suruan ni Jahowa+ sian Gilgal+ tu Bokim jala didok ma, “Nungnga huboan hamu kaluar sian Mesir tu tano naung hujanjihon* tu akka ompumuna.+ Jala hudok do muse, ‘Ikkon pasautokku do parjanjiakku dohot hamu.*+
2 Hamu pe, dang boi bahenonmuna parjanjian dohot akka pangisi ni huta on.+ Jala ikkon ruppakkononmuna do langgatan ni nasida.’+ Alai dang ditangihon hamu hatakku.+ Boasa diulahon hamu songon i?
3 Alani i ma hudok, ‘Dang palaookku nasida sian jolomuna.+ Gabe songon jorat ma nasida di hamu+ jala ditogihon nasida ma hamu asa manomba debata ni nasida.’”+
4 Tikki didok suru-suruan ni Jahowa songon i tu halak Israel, gabe mangangguki ma nasida.
5 Alani i ma dibahen nasida goar ni inganan i Bokim.* Jala dilehon nasida ma pelean tu Jahowa disi.
6 Dung disuru si Josua nasida mulak tu tano parbagianan ni nasida be, mulak ma nasida jala ditaluhon ma huta i.+
7 Toktong do disomba halak Israel Jahowa saleleng mangolu si Josua nang dung mate ibana. Jala disomba nasida do Debata saleleng mangolu dope akka pamimpin na mangida sude halongangan* na binahen ni Jahowa tu halak Israel.+
8 Dukkon i mate ma si Josua anak ni si Nun, naposo ni Jahowa i. Marumur 110 taon ma ibana mate.+
9 Dikubur nasida ma ibana di tano parbagiananna di Timnat-heres,+ i ma akka huta na di inganan na mardolok-dolok di Epraim di sabola utara ni Dolok Gaas.+
10 Dung i mate ma na sasundut* i. Ro ma sundut na baru na so mananda Jahowa jala na so mamboto na niulahonna tu bangso Israel.
11 Dibahen halak Israel ma sogo roha ni Jahowa. Jala disomba nasida ma akka patung ni Baal.+
12 Ditadikkon nasida do Jahowa Debata ni akka ompu ni nasida, na mamboan nasida kaluar sian tano Mesir.+ Diihutton jala disomba nasida do akka debata na asing, i ma akka debata na disomba akka bangso na di sakaliling ni nasida.+ Alani i, gabe muruk ma Jahowa.+
13 Ditadikkon nasida do Jahowa jala disomba nasida do akka patung ni Baal dohot Astarot.+
14 Ala muruk Jahowa tu halak Israel, gabe dipasombu ma nasida ditaluhon* akka musu.+ Dung i dirampok ma akka barang ni nasida,+ jala dang tolap be nasida mangalo akka musu ni nasida.+
15 Tudia pe nasida lao, dialo Jahowa do nasida jala gabe susa ma nasida.+ Ai songon i do didok Jahowa tu nasida jala songon i do sumpa ni Jahowa tu nasida.+ Gabe marsak situtu ma nasida.+
16 Alani i, dipillit Jahowa ma akka panguhum na lao paluahon nasida sian tangan ni akka pangarampok.+
17 Alai dang ditangihon nasida akka panguhum i. Songon boru-boru na so hasea do nasida, dang setia tu Debata. Jala disomba nasida do akka debata na asing. Dang diihutton nasida akka ompu ni nasida. Hatop do nasida manimbil sian dalan na diihutton akka ompu ni nasida na mangoloi paretta ni Jahowa.+
18 Tikki dipillit Jahowa akka panguhum di nasida,+ didongani Jahowa do akka panguhum i. Dipalua do nasida sian tangan ni akka musu saleleng mangolu akka panguhum i. Ai asi* do roha ni Jahowa+ mambege andung-andung ni nasida,+ tikki disiksa jala dibahen na haccit tu nasida.
19 Alai molo dung mate panguhum i, diulahon nasida do muse na jahat jala unjahat sian akka ompu ni nasida. Diihutton nasida do akka debata na asing jala disomba do i.+ Dang olo nasida muba jala sijogal rukkung do nasida.
20 Gabe muruk ma Jahowa tu halak Israel+ jala didok ma, “Dilanggar* bangso on do parjanjian na hubahen+ tu akka ompu ni nasida. Jala dang dioloi nasida parettakku.+
21 Alani i, dang palaookku nanggo sada bangso pe sian jolo ni nasida, i ma na tinggal dope di tikki hamamate ni si Josua.+
22 Sian i botookku ma, na toktong do bangso Israel mangihutton dalan ni Jahowa+ manang na dang, songon na diulahon ompu ni nasida.”
23 Alani i ma diloas Jahowa akka bangso i toktong maringanan disi. Dang pittor dipalao Ibana akka bangso i, jala dang diloas Ibana akka bangso i ditaluhon si Josua.
Surat na di toru
^ Manang “Dang oseokku parjanjiakku tu hamu”.
^ As. “naung hulehon mardongan sumpa”.
^ Lapatanna “Akka Halak na Mangangguki”.
^ Manang “mukjizat”.
^ Manang “sagenerasi”.
^ As. “digadis tu”.
^ Manang “manolsoli”.
^ Manang “Diose”.
