Na disurat si Mateus 19:1-30
19 Dung sae dihatahon Jesus taringot i, lao ma ibana sian Galilea tu parbatasan ni Judea na di bariba ni Sunge Jordan.+
2 Godang do halak na mangihutton ibana, jala dipamalum ibana ma akka na marsahit.
3 Dung i, ro ma halak Parise naeng manguji ibana. Disukkun nasida ma, “Mangihutton patik, boi do disirakkon sahalak bawa istrina asal ma adong alana?”+
4 Dialusi Jesus ma, “Na so hea do dijaha hamu, sian mulana i do ditoppa Debata bawa dohot borua?+
5 Jala didok do, ‘Alani i, ikkon tadikkonon ni bawa ma omakna dohot bapakna, asa toktong rap* dohot istrina jala gabe sada daging ma nasida na dua.’+
6 Jadi, dang dua be nasida alai sada* nama. Alani i, naung dipasada Debata,* dang boi sirangon ni jolma.”+
7 Didok nasida ma, “Attong, boasa do didok si Musa ikkon dilehon sahalak bawa do surat sirang lao manirakkon istrina?”+
8 Didok Jesus ma tu nasida, “Alani takkang ni rohamuna do umbahen na diloas si Musa hamu manirakkon istrimuna.+ Alai, dang songon i hian sian mulana.+
9 Hudok ma tu hamu, manang ise na manirakkon istrina molo so alani na mangulahon seks na so patut* jala mangoli muse tu na asing, na mangalakkup+ do ibana disi.”
10 Didok akka sisean i ma tu Jesus, “Molo songon i do hape na masa di parsaripeon, tumagon ma dang marhasohotan.”
11 Didok ibana ma tu nasida, “Dang sude halak boi mangulahon i, holan halak na manjalo silehon-lehon i do.+
12 Adong do na so marhasohotan* ala nungnga songon i partubuna,* adong do ala na binahen ni halak, alai adong do na mamillit dang marhasohotan alani Harajaon banua ginjang. Manang ise na olo mangulahon sisongon i, diulahon ma i.”+
13 Dung i, diboan akka halak ma akka dakdanak tu Jesus, asa diappehon Jesus tanganna tu nasida jala ditangiakkon. Alai muruk ma akka sisean i tu nasida.+
14 Gabe ninna Jesus ma, “Loas ma ro akka dakdanak i tu au. Unang ma orai hamu nasida. Ai akka halak sisongon i do nappuna Harajaon banua ginjang.”+
15 Diappehon Jesus ma tanganna tu akka dakdanak i jala lao ma ibana sian i.
16 Dung i, ro ma sasahalak mandapotton Jesus, ninna ma, “Guru, dia do ulaon na denggan na ikkon huulahon asa boi dapottu hangoluan na saleleng ni lelengna?”+
17 Didok Jesus ma tu ibana, “Boasa disukkun ho tu au taringot tu na denggan? Holan sada do na denggan.+ Alai molo naeng dapotmu hangoluan, toktong ma oloi akka paretta ni Debata.”+
18 Disukkun ibana ma muse, “Paretta na dia ma i?” Dialusi Jesus ma, “Unang hamu mambunu,+ unang hamu mangalakkup,+ unang hamu manakko,+ unang ma dok hata na so tutu,+
19 pasangap ma omakmu dohot bapakmu+ jala ikkon haholonganmu do donganmu jolma doshon dirim.”+
20 Didok bawa na poso i ma tu Jesus, “Nungnga huulahon sudena i, aha dope na hurang?”
21 Didok Jesus ma tu ibana, “Molo naeng sun denggan do ho,* lao ma ho, gadis ma artam jala lehon ma i tu na pogos asa adong artam di banua ginjang.+ Dung i, ihutton ma au.”+
22 Dung dibege bawa i hata ni Jesus i, gabe marsak ma ibana jala lao. Ai godang do artana.+
23 Didok Jesus ma tu akka siseanna, “Tutu do na hudok on tu hamu, maol do na mora masuk tu Harajaon banua ginjang i.+
24 Hudok ma muse tu hamu, ummura do unta masuk tu lubang ni jarum sian apala sahalak na mora masuk tu Harajaon ni Debata.”+
25 Dung dibege akka sisean i hata ni Jesus i, tarsonggot ma nasida. Didok nasida ma, “Attong, ise do na boi malua?”+
26 Diida Jesus ma tu nasida jala didok ma, “Dang tarbahen ni jolma i, alai dang adong na so tarbahen ni Debata.”+
27 Dung i, didok si Petrus ma mangalusi, “Nungnga hutadikkon hami sude lao mangihutton ho, attong aha ma upa na lao jaloonnami?”+
28 Ninna Jesus ma tu nasida, “Tutu do na hudok on tu hamu, molo dung hundul Anak ni jolma i di tahtana na marmulia i, bahenonna do sude gabe na imbaru. Jala di tikki i, dohot do hamu hundul di 12 tahta lao mangadili 12 marga ni Israel.+ Ai nungnga diihutton hamu au.
29 Ganup halak na manadikkon jabuna, haha anggina, ibotona, omakna, bapakna, anakkonna, manang tanona alani goarhu, jaloonna do 100 hali loppit unggodang sian i. Jala dapotna do muse hangoluan saleleng ni lelengna.+
30 “Alai godang do na parjolo gabe na parpudi, jala na parpudi gabe na parjolo.+
Surat na di toru
^ As. “sada daging”.
^ Cacat sian mulai tubu.
^ Manang “Molo naeng denggan do ulahononmu sudena i”.
