5 Musa 17:1-20
17 “Unang pelehon hamu tu Jahowa Debatamuna lombu jantan manang biru-biru na adong cacatna manang na adong lukana. Ai magigi do Jahowa Debatamuna tu pelean sisongon i.+
2 “Molo adong sahalak bawa manang borua di sada sian kota na lao lehonon ni Jahowa Debatamuna i tu hamu, na tardapot mangulahon na jahat di jolo ni Jahowa Debatamuna i, jala dilanggar ibana parjanjian na binahen ni Debata,+
3 jala manirpang ibana manomba akka debata na asing, marsomba ibana tu akka debata i manang marsomba ibana tu mataniari, tu bulan, manang tu sude na adong di langit,*+ hape dang adong huparettahon songon i,+
4 jala molo adong na paboahon i tu hamu manang dibege hamu taringot sisongon i, ikkon manat do i paresoonmuna. Molo sittong do masa songon i,+ jala tutu do diulahon di Israel ulaon na dihagigihon i,
5 ikkon boanonmuna do bawa manang borua na mangulahon na jahat i tu luar ni gerbang ni kota. Ikkon didangguri do bawa manang borua i pakke batu sappe mate.+
6 Alai ikkon adong do hatorangan sian dua manang tolu halak saksi+ asa boi sasahalak dihukum mate. Molo holan hatorangan ni sahalak saksi do, dang boi ibana dihukum mate.+
7 Akka saksi i ma na parjolo sahali mandangguri halak na dihukum mate i. Dung i pe asa dohot sude halak na asing mandangguri ibana pakke batu sappe mate. Ikkon dipasiding hamu do hajahaton sian tonga-tongamuna.+
8 “Molo adong parsoalan na maol dipature di sada sian kotamuna i, dohot ma i parsoalan taringot tu sasahalak na mambahen mate halak na asing,+ parsoalan ni dua halak na marsalisi, mamukkul donganna, manang akka parsoalan na asing, ikkon lao do hamu tu inganan na pinillit ni Jahowa Debatamuna i.+
9 Juppangi ma akka malim halak Lepi i dohot akka hakim+ na marhobas di tikki i, jala pangido ma tudu-tudu sian nasida. Nasida ma na mambahen keputusan taringot tu parsoalan i.+
10 Ikkon ulahononmuna do dos songon keputusan na nilehon ni nasida tu hamu sian inganan na dipillit Jahowa i. Ikkon marsitutu do hamu mangulahon sude tudu-tudu na dipaboa nasida tu hamu.
11 Ikkon ulahononmuna do dos songon patik na dipatudu nasida tu hamu, jala dos songon keputusan na dilehon nasida tu hamu.+ Unang manirpang hamu sian keputusan na dilehon nasida tu hamu. Dang boi hamu manirpang tu kanan manang tu kiri.+
12 Molo adong halak na ginjang rohana jala dang olo manangihon hata ni hakim dohot hata ni malim na marhobas tu Jahowa Debatamuna i, ikkon dipamate do ibana.+ Ikkon dipasiding hamu do hajahaton sian Israel.+
13 Begeon ni sude halak Israel ma i, mabiar ma nasida, jala dang ginjang be roha ni nasida.+
14 “Molo dung masuk hamu tu luat na lao lehonon ni Jahowa Debatamuna i tu hamu, jala molo dung dibuat hamu luat i, gabe tinggal hamu disi, dung i didok hamu, ‘Beta ma tapillit raja di hita songon akka bangso na di sakalilingta on,’+
15 Ikkon halak na pinillit ni Jahowa Debatamuna i do bahenonmuna gabe raja.+ Ikkon sahalak sian donganmu sabangso do na boi gabe raja. Dang boi pillitonmuna halak na asing na so sian donganmuna sabangso.
16 Alai dang boi godang hoda ni raja i.+ Jala dang boi suruonna halak tu Mesir lao manuhor akka hoda.+ Ai nungnga didok Jahowa hian, ‘Dang boi be hamu mulak tu Mesir.’
17 Dang boi godang istrina, asa unang manirpang rohana sian Au.+ Dang boi pagodangku perak dohot masna.+
18 Molo dung raja ibana, ikkon disalin ibana do Patik ni Debata on di sada bukku,* i ma Patik na disippan akka malim Lepi i.+
19 “Ikkon toktong do adong bukku i di ibana, jala ikkon dijaha ibana do i saleleng ngoluna+ asa marsiajar ibana makkabiari Jahowa Debatana, asa dioloi ibana sude na adong di Patik ni Debata on, jala asa diulahon ibana sude akka aturan on.+
20 Molo dibahen ibana songon i, dang ginjang be rohana, dang dietong ibana be na untimbo dirina sian halak Israel na asing, dang manirpang be ibana sian akka paretta i, jala dang manirpang ibana tu kiri manang tu kanan. Alani i, boi ma ibana rap dohot pinopparna leleng mamaretta gabe raja di Israel.
