Holan sahali do hata tato didok di Bibel, i ma di 3 Musa 19:28. Didok di ayat i, “Unang bahen tato di dagingmuna.” Paretta on dilehon Jahowa tu halak Israel lao patuduhon, molo halak Israel dang sarupa tu akka bangso na di sakaliling ni nasida. Alana, dibahen akka halak na sian bangso na asing i do simbol dohot goar ni debata ni nasida di daging ni nasida. (5 Musa 14:2) Patik na dilehon tu halak Israel on, dang na ikkon diihutton halak Kristen saonari. Alai ikkon tapikkirhon do aha prinsipna sian patik on.

Boi do halak Kristen martato?

 Akka ayat di toru on paboahon songon dia alusna:

•   ‘Akka borua ikkon . . . mardongan toruk ni roha.’ (1 Timoteus 2:9) Prinsip na di ayat on dang holan tu borua, alai dohot do tu bawa. Jadi, sude do hita ikkon mangargai perasaan manang pandangan ni halak na asing. Unang ma tabahen asa holan diritta na diparrohahon halak.

•   Adong halak, lomo rohana martato holan lao patuduhon tu halak na asing do ise ibana. Manang, lao patuduhon tu halak na asing na lomona do tu dirina sandiri manang sifat naeng bebas. Alai didok do di Bibel, “Pelehon hamu ma dirimuna gabe pelean na mangolu, na badia, jala na palasson roha ni Debata. Marhobas ma hamu tu Ibana sian nasa pikkiranmuna.” (Rom 12:1) Jadi ikkon jolo tapikkirhon do, aha alasanna hita naeng martato. Molo holan naeng mangihutton akka na masa saonari do manang naeng patuduhon na dohot do hita tu kelompok tertentu umbahen martato hita, haduan molo ro tu pikkiranta naeng menghapus tato i, nga maol be lao menghapus i. Jadi ikkon denggan do tapikkiri taringot on, asa boi tabahen keputusan na denggan.—Poda 4:7.

•   “Sai na saut do sakkap ni halak na ringgas, alai na lao marpogos do halak na gumarapus.” (Poda 21:5) Biasana halak na martato, dang jolo dipikkiri hian aha pengaruh ni i tu ibana. Boi do i berpengaruh tu hubunganna dohot halak na asing, jala olo do gabe maol ibana mandapot karejo. Asing ni i, haccit do molo naeng menghapus tato jala arga do biayana. Saonari, godang do dibahen akka penelitian songon dia carana menghapus tato. Jala godang do na mambahen bisnis lao menghapus tato. Jadi sian on taboto ma, godang do hape halak na martato i na menyesal ala hea ibana martato.