Harajaon ni Debata, i ma sada pamarettaon na dipajongjong Debata Jahowa. Di Bibel didok do muse Harajaon i “harajaon banua ginjang”, alana sian surgo do Harajaon i mamaretta. (Markus 1:14, 15; Mateus 4:17) Godang do persamaan ni pamarettaon ni jolma tu Harajaon ni Debata. Alai dao do undenggan Harajaon i sian sude pamarettaon di tano on.

•   Na mamaretta. Nungnga dipillit Jahowa be Jesus gabe Raja ni Harajaon ni Debata. Jala unggodang do dilehon Debata huaso tu ibana sian akka penguasa di portibi on. (Mateus 28:18) Dang hea sala cara ni Jesus mamakke huasona, alana nungnga terbukti Jesus sahalak Pamimpin na boi diandalhon jala parasi roha. Dipakke Jesus do huasona i lao mangulahon akka na denggan. (Mateus 4:23; Markus 1:40, 41; 6:31-34; Lukas 7:11-17) Diurupi Debata do Jesus mamillit akka halak na lao ‘mamaretta tu saluhut tano on’. Na lao mamaretta ma nasida rap dohot Jesus di surgo.—Pangungkapon 5:9, 10.

•   Sadia leleng. Na lao mamaretta do Harajaon ni Debata saleleng ni lelengna jala dang boi “dihancurhon”. (Daniel 2:44) Dang songon pamarettaon ni jolma i na sai torus margatti.

•   Rakyatna. Sude na olo mangulahon paretta ni Debata boi gabe rakyat ni Harajaon i, dang soal sian bangso na dia pe nasida jala manang aha pe bahasana.—Ulaon ni Apostel 10:34, 35.

•   Hukumna. Hukum manang peraturan na dibahen Harajaon ni Debata dang holan mangorai rakyatna mangulahon ulaon na sala. Alai boi do hukum i mangurupi rakyatna asa mangihutton standar moral na timbo. Uppamana didok do di Bibel, ‘“Ikkon haholonganmu do Jahowa Debatam sian nasa roham, sian nasa ngolum dohot sian nasa pikkiranmu. I ma paretta na umbalga jala na parjolo. Paretta na paduahon na dos tusi, i ma, ‘Ikkon haholonganmu do donganmu jolma doshon dirim.’” (Mateus 22:37-39) Ala holong do roha ni rakyat ni Harajaon i tu Jahowa dohot tu donganna jolma, gabe taronjar ma roha ni nasida mangulahon na denggan tu halak na asing.

•   Pendidikanna. Dang holan mambahen aturan na timbo Harajaon ni Debata tu rakyatna, alai diajari do nasida asa boi mangulahon i.—Jesaya 48:17, 18.

•   Tujuanna. Dang na lao mambuat hepeng ni rakyatna Harajaon i asa mamora akka pamimpinna. Alai lao pasautton lomo ni roha ni Debata do Harajaon i, termasuk ma asa boi halak na makkaholongi Debata mangolu saleleng ni lelengna di Paradeiso di tano on.—Jesaya 35:1, 5, 6; Mateus 6:10; Pangungkapon 21:1-4.