Dosa, i ma pangalaho, perasaan, dohot pikkiran na maralo tu Patik ni Debata. Sasahalak didok do mardosa ala diulahon ibana na sala di jolo ni Debata. (1 Johannes 3:4; 5:17) Didok do di Bibel, molo diboto sasahalak dia na denggan hape dang diulahon i, mardosa do ibana disi.​—Jakobus 4:17.

 Di bahasa asli na adong di Bibel, hata dosa lapatanna, “dang hona tu sasaran”. Contohna, najolo malo do tentara ni halak Israel mangalempar batu “jala dang hea pilit”. Jadi molo diterjemahon hata dang hea pilit, boi do lapatanna “dang hea mangulahon dosa”. (Panguhum 20:16) Jadi, molo pilit manang dang pas diulahon sasahalak Patik ni Debata, didok do ibana mardosa.

 Marhak do Debata manottuhon standar na lao diihutton jolma, ala Ibana do na manompa hita. (Pangungkapon 4:11) Jala ikkon martanggung jawab do hita tu aha na taulahon di jolona.​—Rom 14:12.

Mungkin do hita dang hea mangulahon dosa?

 Dang mungkin. Bibel mandok, “Nungnga mardosa sude jolma jala dang boi be nasida patuduhon hamuliaon ni pangalaho ni Debata.” (Rom 3:23; 1 Raja-Raja 8:46; Parjamita 7:20; 1 Johannes 1:8) Boasa songon i?

 Ai sian mulana nungnga mardosa si Adam dohot si Hawa. Hape sempurna do nasida ditompa Debata jala adong do di nasida akka sifat na denggan songon sifat ni Debata. (1 Musa 1:27) Alai dialo nasida do Debata, gabe dang sempurna be nasida. (1 Musa 3:5, 6, 17-19) Dung i, diwarisson nasida ma dosa i tu akka pinopparna. Jala dang sempurna be pinoppar ni nasida. (Rom 5:12) Alani i ma hea didok si Daud Raja ni halak Israel, “Nungnga mardosa au tikki ditubuhon.”​—Psalmen 51:5.

Sarupa do sude dosa i?

 Daong. Uppamana didok do di Bibel, massai jahat do halak Sodom jala diulahon nasida do “dosa na balga”. (1 Musa 13:13; 18:20) Parrohahon ma adong tolu na manottuhon sadia balga dosa ni sasahalak.

1.   Balga ni dosa i. Didok Bibel, unang ma taulahon seks na so patut, manomba patung, manakko, mabuk, mangarampok, mambunu, dohot mardatu. (1 Korint 6:9-11; Pangungkapon 21:8) Alai di Bibel, dibedahon do dosa on tu dosa na so disengaja. Contohna, hata manang pambahenan na mambahen haccit roha ni sasahalak. (Poda 12:18; Epesus 4:31, 32) Nang pe songon i, didok Bibel do tu hita asa unang sepele hita tu dosa na so disengaja. Alana dosa na gelleng pe, boi do mambahen sasahalak gabe mangulahon dosa na balga.​—Mateus 5:27, 28.

2.   Alasanna mangulahon dosa. Adong do halak mangulahon dosa ala dang diboto ibana aha lomo ni roha ni Debata. (Ulaon ni Apostel 17:30; 1 Timoteus 1:13) Alai sala do ulaon sisongon i. Jala dibedahon Bible do dosa i tu dosa na sengaja mangalanggar patik ni Debata. (4 Musa 15:30, 31) Alana dosa na disengaja ro sian ‘roha na jahat’.​—Jeremia 16:12.

3.   Sadia jotjot diulahon dosa i. Dibedahon do muse di Bibel, dosa na diulahon holan sahali dohot dosa na mulak-ulak diulahon. (1 Johannes 3:4-8) Adong do halak sengaja mulak-ulak mangulahon dosa. Hape nungnga takkas diboto ibana songon dia carana asa unang mangulahon dosa i be. Halak sisongon i, pasti dihukum Debata.​—Heber 10:26, 27.

 Olo do torus disalahon sasahalak dirina ala hea mangulahon dosa na balga. Contohna disurat Raja Daud do, “Gabe lonong do au dibahen dosakki, Songon boban na borat do i, na so tolap boanokku.” (Psalmen 38:4) Alai, adong dope na boi diulahon nasida. Bibel mandok, “Lok ma ditadikkon parjahat akka dalanna na jahat Jala unang be dipikkirhon halak na jahat akka ulaonna na jahat, Lok ma mulak ibana tu Jahowa, na marasi ni roha tu ibana, Mulak ma ibana tu Debatanta, ai rade do Ibana manesa sude dosana.”​—Jesaya 55:7.