A wa tire tenin fotoba sɔɔ mɛ Yehofan Seeda Dio ba yãnu sebua ka bɛɛrɛ bà n ben mɛnnɔsu dɔɔ? Mban sɔ̃na sa ra laakari ko too ye sa sebua sɔɔ ka bɛsɛn wasin tii sɔɔ?

Su ka bɛsɛn Yinni Gusunɔ bɛɛrɛ wɛ̃. Gema, Gusunɔ ku ra bɛsɛn wasin buram tɔna mɛɛri. (1 Samuɛli 16:7) Ka mɛ, sanam mɛ sa mɛnnɛ win sãa yerɔ, ye sa kĩ ka nuku tia, yera su Wi, ka bɛsɛn berusebu bɛɛrɛ wɛ̃. Nge weenasia, sà n dɔɔ siri kowo goon mi siri yerɔ, sa ko sa n kĩ su laakari ko ye sa sebua ka bɛsɛn wasi sɔɔ, yèn sɔ̃ tɔn girimagiiya. Swaa tia ye sɔɔ, mɛsum sa ra ka tii sɔmɛ mɛnnɔsun sɔ̃, ya bɛɛrɛ ye sa handunia gira kpuron Siri Kowo, Yehofa Gusunɔ mɔɔwɛ sɔ̃ɔsimɔ, ya maa sɔ̃ɔsimɔ ma sa Win sãa yeru bɛɛrɛ wɛ̃ɛmɔ.—Torubu 18:25.

Ya maa sɔ̃ɔsimɔ ma sa Bibelin gee kpɛɛkpɛɛkugii girima dokemɔ bɛsɛn wãaru sɔɔ. Bibeli ya Kirisigibu kanamɔ bu tii sɔmɛ “saka sɔɔ ka girima” (1 Timɔte 2:9, 10). A yãnu doke “saka sɔɔ ka girima” ya tubusia ma n ǹ weenɛ a yãnu doke ye ya koo de tɔmbun laakari ya n wãa wunɛ sɔɔ, yèn sɔ̃ yãa ni nu balimɔ too, ǹ kun mɛ nu tɔmbun binɛ seeye, ǹ kun maa mɛ nu nun tereru yɔ̃su. Ye ya maa tubusia ma n weenɛ a yãnu gɔsi ni nu wã, ni nu kun gɛ̃ɛkire, ǹ kun mɛ nu n sãa suriki suriki, nu n kun maa nun sɛ̃ka too. Ka mɛ, Bibelin gee kpɛɛkpɛɛkugii nini nu sun swɛɛ dabinu yiiye su ka gɔsi ye sa kĩ. Baa sa kun nɔɔ wukie, ye sa sebua ka bɛsɛn wasi ya n mɛɛribu wã, ya koo de “bɛsɛn Faaba kowon sɔ̃ɔsiru tu . . . ko bɛɛrɛgiru” “kpa bu Gusunɔ siara.” (Titu 2:10; 1 Piɛɛ 2:12) Ye sa sebua ka bɛsɛn wasi ya n mɛɛribu wã, ya koo de tɔmbu bu Yehofan sãaru mɛɛri ka nɔnu geu.

A ku Bandu Yeru daabu yina yãnu dokebun garin sɔ̃. Baa sà kun gobi mɔ, bɛsɛn yãnu nu koo kpĩ nu n dɛɛre kpa nun waabu wã.

• Mban sɔ̃na ya sãa girim bɛsɛn yãnu ka bɛsɛn wasi yi n mɛɛribu wã sà n Gusunɔ sãamɔ?

• Gee kpɛɛkpɛɛkugii nirà nu koo sun somi ma sa kĩ su bɛsɛn yãnu gɔsi ?