SƆ̃ƆSIRU 5
Mban sɔ̃na Gusunɔ u tem taka kua?
1. Mban sɔ̃na Gusunɔ u tem taka kua?
Yehofa u tɔn durɔbu ka tɔn kurɔbu tem kã. Mu sãawa bεsεn wãa yeru. N mεn na ba ǹ daa tɔn gbiikobu yiru, Adamu ka Efa, taka kue bu bibu mà bu dabia bu wɔnnu yibia—Gusunɔ raa maleekaba taka kua kɔ ba n wãa wɔllɔ. (Yoobu 38:4, 7) Adama Gusunɔ u tɔn durɔ gbiikoo sua ma u wi doke alusanna buram buram tɔna sɔɔ ye ba mɔ̀ Edεnin gbaaru. (Torubu 2:15-17) Yehofa raa kĩ wi ka win bibun bweseru be ba wee biruɔ, bu kpĩ bu wãaru nɔru sari di tem sɔɔ.—A Womu 37:29; 115:16 gario.
Saa toren di, Edεnin gbaaru tɔnawa ta raa sãa alusanna. Tɔn durɔ ka tɔn kurɔ gbiikobu ba koo raa tem yibia ka ben bibun bweseru. Sanam mu n dɔɔnɔ, ba koo raa tem gira kpuro nɔma sikerena, bu ko mu gɔsia alusanna. (Torubu 1:28) Tem mu ǹ kam koorɔ, pai. Mu koo n sãa tɔmbun wãa yeru sere ka baadomma.—A Womu 104:5 gario.
A fideo ye ba mɔ̀ Mban sɔ̃na Gusunɔ u tem taka kua? mɛɛrio
2. Mban sɔ̃na tem mu ǹ sãa alusanna gisɔ?
Adamu ka Efa ba ǹ Gusunɔ mεm nɔɔwε, yen sɔ̃ Yehofa u be yara saa gbaarun di. Alusanna ya kam kua, sere ka tɛ̃ yen tɔnu sari wi u kpĩa u ye wesia. Bibeli nεε: ‘Tem mu wɔri tɔn kɔ̃son nɔmuɔ.’—Yoobu 9:24.—A Torubu 3:23, 24 gario.
Yehofa u win himba gbiikaa tɔmbun sɔ̃ deri ro? Aawo! U sãawa Damkpurogii. U ǹ kpɛ̃ u wɔri. (Esai 45:18) U koo tɔmbun bweseru wesia swaa ye u raa yii sɔɔ.—A Womu 37:11, 34 gario.
3. Amɔsunwa alusanna ya koo maa koora?
Alusanna ya koo maa koora tem sɔɔ Yesun bandun sɔ̃nu nge Sunɔ wi Gusunɔ yi. Taa bi ba ra soku Aamagedom sɔɔ, Yesu u koo ko Gusunɔn maleekaban wirugii, kpa u be ba Gusunɔ biru kisi kpuro, kam koosia. Yen biru Yesu u koo Setam doke pirisɔm sɔɔ sere wɔ̃ɔ nɔrɔbu (1 000). Gusunɔn tɔmbu ba koo faaba wa kam koosiaru sɔɔn di, domi Yesu koo be kpara kpa u be bere. Ba koo wãaru te ta ku ra kpe di alusanna sɔɔ temɔ.—A Kãsiru 20:1-3; 21:3, 4 gario.
4. Domma nɔni swãaru ta koo kpe?
Domma Gusunɔ koo kɔ̃sa wĩa tem di? Yesu u yĩreru wɛ̃ te ta sɔ̃ɔsimɔ saka ye sɔɔ nɔru ta koo turuku ko. Gãa ni nu mɔ̀ handunia sɔɔ gisɔ, nu tɔnun wãaru kari mɔ̀, ma nu sɔ̃ɔsimɔ ma sa wãawa tɛ̃ “handunia yen kpeeru sɔɔ.”—A Mateu 24:3 NW, 7-14, 21, 22 gario.
Yesun wɔ̃ɔ nɔrɔbun (1 000) bandu sɔ̃nu saa wɔllun di tem sɔɔ, u koo ka nɔni swãaru kpuron nɔru na. (Esai 9:5, 6; 11:9) Yesu u bandu dimɔ nge Sunɔ, u koo maa sɔmburu ko nge Yãku Kowo Tɔnwero kpa u tɔn be ba Gusunɔ kĩ ben durum wɔka. Mεna, Gusunɔ u koo Yesu dam kɛ̃ u ka bararu, tɔkɔru ka gɔɔ kpeesia.—A Esai 25:8; 33:24 gario.
5. Wara ko n wãa alusanna ye ya wee sɔɔ?
Bandun Yerɔ, kaa ka tɔmbu yinna be ba Gusunɔ kĩ, ma ba maa kĩ bu mεεri mεsum ba koo ka wi wɛ̃re
Tɔn be ba ra Gusunɔ mεm nɔɔwε, ba ko n wãa alusanna sɔɔ. (1 Yohanu 2:17) Yesu u win bwãabu gɔra bu tɔn be ba tii kawe ba kasu, kpa bu be sɔ̃ɔsi mεsum ba koo ko Gusunɔ u ka be wura. Gisɔ Yehofa u tɔn yakom yakom sɔɔru kuamε ba n ka wãa alusanna sɔɔ temɔ. (Sofoni 2:3) Yehofan Seeda Diobun Bandun yerɔ, tɔn ba ra mεεri amɔsunwa ba koo n sãa durɔ ka tundo geobu, kurɔ mɔro ka mεro geobu. Bibu ka mɔwɔbu ba ra sãaru ko sannu, ma ba ra mεεri mεsum ba koo ka labaari gean arufaani wa.—A Misee 4:1-4 gario.
