SƆ̃ƆSI 01

Amɔsunwa Bibeli ya koo kpĩ yu nun somi?

ÉCOUTER EN

Bɛsɛ kpuro sa ra tii gari bikie, wãaru sɔɔ, nɔni swãaru sɔɔ, gɔɔ sɔɔ, ka sia sɔɔ. Sa ra n maa wurure ka tɔ̃ru baateren wunanɔsu, wunanɔsu nge mɛ sa koo ko su ka gobi wa su ka tii nɔɔri ǹ kun mɛ mɛ sa koo ko sa n ka yɛnu nuku dobuguu mɔ. Tɔn dabina wa ma Bibeli ya bu somi bu ka wãarun bikia giribun wisibu wa, ma ya maa be bwisi kɛ̃ɛ geenu kã bu ka tɔ̃ru baateren wãaru di. Wunɛn waaru sɔɔ tɔmba koo kpĩ bu Bibelin arufaani di?

1. Gari bikia birà Bibeli ya wisimɔ?

Bibeli ya bikia giri bini wisimɔ: Amɔsunwa wãara ka torua? Mban sɔ̃na sa wãa wãaru sɔɔ? Mban sɔ̃na taarɛ sarirugiba wahala mɔ̀? Mba n da koore tɔnu ù n gu? Baa mɛ tɔmba ka bɔri yɛndu kĩ, mban sɔ̃na tabu bu ka wãa yam kpuro? Mba n koo ra tem deema? Bibeli ya sun dam kɛ̃mɔ su ka gari yin wisibu kasu, tɔn yako dabina maa yin wisibu wa Bibeli sɔɔ, bu maa ka be naawa.

2. Amɔsunwa Bibeli ya koo sun somi su ka bɛsɛn tɔ̃ru baateren wãarun dobu nɔ?

Bibeli ya sun bwisi kɛ̃ɛ geenu wɛ̃ɛmɔ. Nge weenasia ya yɛnusu sɔ̃ɔsimɔ mɛ ba koo ka nuku doo geebu wa. Ya sun bwisi kɛ̃mɔ mɛ sa koo ka wururabu kamia ka mɛsum sa ko n ka nuku dobu mɔ bɛsɛn sɔmburu sɔɔ. Kaa wa ye Bibeli ya gerumɔ gari yi sɔɔ, kaa n maa yɛ̃ru sosimɔ sà n tire tenin keu mɔ̀ sannu. N koo ra nun yeeri ma Gusunɔn gari kpuro yi yi wãa Bibeli sɔɔ kpuro “yi arufaani mɔ”—2 Timɔte 3:16.

Tire teni ta ǹ Bibeli kɔsire mɔ̀. Adama, ta nun dam kɛ̃mɔ a ka tii Bibeli wɛ̃ɛri. Yen sɔ̃ sa nun kanamɔ a Bibelin naa si ba sia sɔ̃ɔsi nini sɔɔ gario kpa a si weenasia ka ye a garimɔ.

A SƆ̃ƆSI TE DUKIASIO

A mɛɛrio mɛ Bibeli ya ka tɔmbu somi, kpa a wa mɛ kaa n ka nuku dobu mɔ yen garibu sɔɔ, ka yèn sɔ̃ a somirun bukata mɔ yu ka nun yeeri.

3. Bibeli ya koo kpĩ yu sun swaa sɔ̃ɔsi

Bibeli ya sãawa nge fitila ye ya dɔ̃ɔ do. Bibeli ya koo kpĩ yu sun somi su ka kpini geenu swaa, ya koo maa kpĩ yu sun sɔ̃ ye ya koo koora sia.

A Womusu 119:105 gario, yen biru a gari bikia bini wisio:

Amɔsunwa wi u womu si yorua u Bibeli waasinɛ?
Amɔsunwa a Bibeli waasinɛ?

4. Bibeli ya koo kpĩ yu bɛsɛn gari bikiabu wisi

Kurɔ goo u wa ma Bibeli ya gari yi u tii bikiamɔ saa wɔ̃ɔ dabi dabinun din wisibu wɛ̃. A FIDEO yeni mɛɛrio, yen biru kpa i wesiana gari yini sɔɔ.

FIDEO: A ku yĩiyɔbu deri pai! (1:48)

Fideo ye sɔɔ, gari yirà kurɔ wi u raa tii bikiamɔ?
Amɔsunwa Bibelin keu ya ka wi somi?

Bibeli ya sun dam kɛ̃mɔ sa n da gari bikie. A Mateu 7:7 gario, yen biru i wesianɔ gari bikia bini sɔɔ:

Gari bikia birà a mɔ a kĩ Bibeli yu nun wisi?

5. Kaa kpĩ a Bibelin garibun dobu nɔ

Tɔn dabina ra kã bu Bibeli gari ba ra maa yen arufaani wa. A fideo yeni mɛɛrio, yen biru i wesianɔ gari bikia bini sɔɔ.

FIDEO: Bibelin garibu (2:05)

Fideo ye sɔɔ, amɔsunwa aluwaasiba ka wɔndiaba ba ra tire garibu waasinɛ?
Baa mɛ ba ku ra kã bu tirenu gari, mban sɔ̃na ba ra kã bu Bibeli gari?

Bibeli ya nɛɛ ya koo kpĩ yu sun sɔ̃ɔsiru wɛ̃ te ta koo kpĩ tu sun gɔ̃ru yɛmiabu ka yĩiyɔbu kɛ̃. A Romu 15:4 gario, yen biru kpa i wesiana gari yini sɔɔ:

A Bibelin nɔɔ mwɛɛru gɔ̃ru yɛmiabu ka yĩiyɔbu sɔɔ kĩ?

6. Gaba koo kpĩ bu nun somi Bibeli yu ka nun yeeri

Bibelin garibu baasi, gaba wa ma bu ka gabu wesiana Bibeli sɔɔ ya arufaani mɔ. A Gɔrobun Kookoosu 8:26-31 gario, yen biru kpa i wesiana gari yini sɔɔ: