Osman bo nwaa ni ngond yap ba bé likalô ni kak i bikaat bebee ni kodoo soñ i Chili. A bé a yii, limut li bôt li lona mim li kôtôk nsik ni ngui. Bahogi ikété yap ba hoñol le Osman a yé pastô yap i base i évangélik, ba bi tiige nye bebee, ba sambla nye, ba kal nye ni makénd le: “Di nyéga le u nlôl i ngeñ a pastô, ngo di bemek we!”

Osman a bi noode toñle bo ha le a ta bé pastô yap, ndi kii ba bé yô ngandak ba bi nok bé. I mbus ndék manut, i limut li bôt li li bi jôp i kodoo soñ, ndék bôt i bi pam i kal nye le, “A pastô, di mbem we i kodoo soñ.”

I ngéda ba bi mom nwee, Osman a kal bo njee a yé, a kal ki bo kii i nlona nye ha. I bôt ba ba kal le ba yé ñunbak kiki pastô yap i nlo bé, i mbus ba bat Osman le, “ Baa u yé le u lo i kal i bôt ba yé hana ndék bibuk bi mpémél i Bibel? Osman a neebe.

Mu kiki ba bé ke i het soñ i yé, Osman a bat bo mambadga inyu mut a bi wo a kôôba ndék minlôñ mi Bibel inyu éñél bo nwo. I ngéda a bi bol i homa soñ i yé, a kal i limut li bôt li jôl jé a toñle ki bo le a yé Mbôgi Yéhôva, jon a ñañle bôt ñañ nlam.

I mbus, a bi añ kaat Masoola 21:3, 4 ni Yôhanes 5:28, 29, a kal bo le sômbôl i Nyambe i bé bé le bôt ba wo. A kal ki bo le ibéba pééna yo ki yo Nyambe a’ tugul bawoga ndék ngéda, ba ga bana ki botñem i niñ i boga ni boga hana ’isi. I ngéda Osman a bi mal pot, ngandak i bi sambla nye ni maséé momasôna, ba ti ki nye mayéga inyu “minañ minlam mi Yéhôva.” Ha nyen a bi témb i kak bikaat.

I mbus maéya, bôt bahogi ba ba bé nyoo ba bi lo i kak bikaat ba bat Osman ni nwaa ni ngond yé mambadga ma ma mbéñge Bibel. Ba bi kwel ngandak, i ngéda ba bé ke, ba bi huuna bebee le bikaat gwobisôna bi bé mu i kak bikaat.