Me bi gwéé bebee ni Rôma nyoo ki nyen me bi néñél. Diyeyeba tjon di nyééne nyoo homa nu. Niñ i bé let. Me bi yi bé mama yem, me bé nôgla bé ki to ni pua yem. Me bi néñél i béba homa ikété ndutu bilim.

Me bi bôdôl nip me ngi bolna to jôm li nwii. I ngéda me bi bolna 12 nwii me bi so ndap inyu ngélé bisu. Pua yem a bi lo yoñ me ngandak ngélé, bisônda bi ma gwel me, a témbnaga me i ndap. Me bé me mpééna ni bôt hiki ngéda—me bé jo bisañ me unbenege ki bôt bobasôna. I ngéda me bi bolna 14, me bi pam i ndap me ke, ke ke. Me bôdôl ôt hibañga me nañlak i ñem njel. Kiki me bééna bé nañi, me bé me jôp litôa me yéñ mu ikété letee kel i ye. I mbus me bé me yéñ malép inyu boñ le me nogop.

Me bi yila soso mut wip—me bé nip gwom gwobisôna, me kadlak bibot bi bôt, me jôbôk mandap ma bôt ni juu inyu nip. Me bi kahal yiba kiki mut wip, me jôp yak i lôñ i mintonba mi mi bé yiba, hala a yible me “njel” i bôdôl nip ikété bibañk. Kiki me bé lôs mut, ba bi kahal ti me lipém mu lôñ yés i mintonba. Me bé hiôm bé ngi ngaa yem; me bé nañlana yo isi mbôñga wem. Me bé jo bisañ, me ôdôk hibañga, me nibik, me podok mpuñgu, me lalnaga bôda. Hala nyen niñ yem i bé. Bisônda bi bé yéñ me hiki ngéda. Ba bi gwel me ngandak ngélé, me bé me jôbôk i mok, me pamak nwii ndi nwii.

Lisañ jada nu me bi pam mok, me ke i yuuga tañti yem yada. Me bé yi bé le tañti yem ni bon bé iba ba bi yila Mbôgi Yéhôva. Ba bi naña me likoda li Mbôgi Yéhôva. Kiki me bé sômbôl yi kii i ntagbe nyoo, me bi ke ni bo. I ngéda me bi bol i ndap  Ane, me bi nai le me nyén ndigi ipam nwemel inyu tehe kiki bôt ba njôp ba pamak. Me bééna ngaa yem.

Likoda li, li bi héñha niñ yem. Me mbigda ha ingéda i, me bé hoñol le me ta ha bé munu hisi hini. Bôt ba bé yéga me ni minyô masu ma nwemlaga bo. Me ngi hoñlak loñgeñem ni maliga ma bé nene mu mis ma Mbôgi Yéhôva i ngéda ba bé ba nun me. Maselna ma bé ngandak ipôla i het me bé ni i homa nu!

Me bi bôdôl nigil Bibel ni Mbôgi Yéhôva. Hala nyen me bi nôgda le me nlama héñha niñ yem. Me bi ôt mahoñol mu bibañga di nléba i kaat Bingéngén 13:20 bi bi nkal le: “Nu a nhiôm lôñni bôt ba pék nyen a’ bana pék, ndi nu a ñadba ni bijôñ bi bôt a’ yôm.” Me bi nok le me nlama pam mu i lôñ i mintonba me bé. Hala a bé bé jam li ntomb, ndi Yéhôva a bi hôla me, me pam mu.

Me bi bôñgôl ki nyuu yem. Me boñ biliya bi ngui i nwas siga ni hibañga. Me kit tjôñ tjem, me héya dibôñga me bééna maôô, me waa yak pot mpuñgu. Inyu ngélé bisu i niñ yem, me bé yi i yom me bé boñ.

Me bé gwés bé lisoñgol to yigil, jon hala a bé me ndutu i yoñ ngéda i nigil Bibel ni i ha i yom me bé nigil bisélél. Ndi kiki me bé boñ biliya, ndék ni ndék me bi kahal gwés Yéhôva, yak niñ yem i bôdôl héñha, kiññem yem i bi bôdôl kéés me. Me bééna mahoñol mabe ngim mangéda, me hoñlak le Yéhôva a ta bé le a nwéhél me inyu mam mabe me bi boñ. Mu mangéda ma, me bé kôhna ngui i ngéda me bé soñgol minlôñ mi Bibel i het Yéhôva a bi nwéhél Kiñe David i ngéda a bi boñ bibéba bikeñi.—2 Samuel 11:1–12:13.

Ndutu ipe i bé i ke i téé likalô li mandap ni mandap. (Matéô 28:19, 20) Me bé kon woñi le me yé le me boma mut me bi tééñga tole me bi boñ béba ilole me nyi maliga! Ndi ndék ni ndék, me bi bôdôl yémbél i woñi i. Me kahal kon maséé i hôla bôt i yi Tata wés nugwéha nu a nwéhél i nya iloo hihéga.

Mukiki me bi yi Yéhôva, hala a bi tohol me! Ngandak yem mawanda i bi wo, ipe i bi ke i mok, ndi me me bi bana niñ ilam, ipe i mbem me dilo di nlo. Me bi yila mut suhulnyuu, mut manôgla, ni mut nu a ngwel nyemede. Nano me nôgla loñge ni bôt bobasôna. Me yé maséé le me bi biiba ni loñge muda le Carmen. Bés bo iba di nkon maséé i niiga bôt Bibel.

Éé! Nano memede me nsal ni moo mem inyu bana likala li kel. Ngim mangéda me nke bibañk, nano me nke he bé inyu nip ndi inyu pubus gwo!