1. Bimbe bisai di nkôs ni njel binoñ?

MBIGDA i nyemb Kristô i di mbéna bana hiki ñwii i nhôñlaha bés le binoñ bi nyibil bon ba Adam njel ba ba ngwés telepsép i jôb lihaa li Djob. Binoñ bi nti bés pôla i niñ i boga ni boga ikété hogbe. Binoñ bi Kristô bi nti ndik bé bôt ba manôgla bilôl bilam. Mu kii Yésu a bé bebee i wo inyu nit telepsép i Djob, hala a bi ti ndimbhe i pééna i ntihba ngiinda yosôna.​—Lôk Héber 1:8, 9.

2. (a) Mambe mam ma mahee ma ntihba ngiinda yosôna di nléba ikété masoohe ma Yésu? (Béñge titii i bibôdle.) (b) Kii di ga wan?

² Ñwii ima ilole Yésu a nwo ni le a nti binoñ, a bi niiga banigil bé i soohe le: “Jon soohana ni lana le, A Tata wés nu a yé ngi, jôl joñ li tééba lipubi. Ane yoñ i lo. Sômbôl yoñ i bôña ’isi kikii ngii.” (Matéô 6:9, 10) Inyu kéñbaha mayéga més inyu binoñ, di béñge mambe maada ma yé ipôla binoñ ni mana mam kiki bo le jôl li Djob li tééba lipubi, le Ane i Djob yon i énél, ni le bi bitééne bi Djob bi yon.

3. Ngobol i jôl li Yéhôva li ntihba kii? Lelaa Satan a sohbene jôl lipubi li?

³ Jam li bisu Yésu a bi sima ikété ndémbél masoohe a ti, i yé le jôl li Djob li tééba lipubi. Jôl li Yéhôva li ntihba libak jé jolisôna li Bayemikok, li Nungingii, ni li Numpubi. Ikété masoohe mape, Yésu a sébél Yéhôva le “A Ta Numpubi.” (Yôhanes 17:11) Kiki Yéhôva a yé mpubi, matiñ ni mambén momasôna ma ma nlôl ni nye ma yé mapubi. To hala, i wom Eden, Satan a bi gwélél mandon inyu pééna kunde Djob a gwé i téé matiñ inyu bôt ba binam. Ni bitembee bi, Satan a bi sohbene jôl lipubi li Djob.​—Bibôdle 3:1-5.

4. Lelaa Yésu a bi yoñ ngaba i pubus jôl li Djob?

⁴ Mahéñha ni hala, Yésu a bi lôôha gwés jôl li Yéhôva. (Yôhanes 17:25, 26) Yésu a bi yoñ ngaba i pubus jôl li Djob. (Añ Tjémbi 40:9-11.) Mu kii a bi bana niñ i peles hana isi, Yésu a unda le Yéhôva a bé a kôli i tééne bihégél gwé bi bi gwé yi, mambén. Yak ngéda Satan a bi boñ le Yésu a kôs njiiha ilole a nwo, Yésu a bi téñbe i gwés Isañ nu a yé ngii. Mu kii a téñbe i gwés Djob, Yésu a unda le mut binam nu a yé peles a yé le a nôgôl mambén ma téé sép ma Djob ikété libak li yôni.

5. Lelaa di nla yoñ ngaba i pubus Jôl Djob?

⁵ Lelaa di nla unda le di ngwés jôl li Yéhôva? Ni njel bihiumul gwés. Yéhôva a mbat le di ba bapubhaga. (Añ 1 Pétrô 1:15, 16.) Hala a nkobla le di bégés ndik Yéhôva nyetama ni le di nôgôl nye ni ñem wés wonsôna. Yak ngéda ba ntééñga bés, di boñ biliya gwés gwobisô inyu niñ inoñnaga ni matiñ ni mambén mé ma téé sép. Mu kii di ga bana bihiumul bi téé sép, di mbéyés mapubi més, ni hala nyen di ñunda le di nti jôl li Yéhôva lipém. (Matéô 5:14-16) Kiki litén lipubhaga, di ñunda ni njel ntén niñ di gwé le mambén ma Yéhôva ma yé malam, ni le manjom Satan a ñôm Djob ma yé bitembee. Ngéda di nhôs, kii hala a mbéna pémél bés bobasôna, di ntam béba yés ni ñem wés wonsôna, di ke ki haa ni maboñok momasôna ma ma nhindis jôl li Yéhôva.​—Tjémbi 79:9.

6. Inyuki Yéhôva a ntehe bés kiki bôt ba téé sép tolakii di yé bikwéha?

⁶ Ni njel sesema i Kristô, Yéhôva a nwéhél bibéba bi bet ba nhémle i sesema i. A neebe ikété lihaa li bagwélél bé i bôt ba nti bomede nkikip inyu gwélél nye. Yéhôva a kal le minhook mi téé sép inyu yila bon bé, ni le i bet ba yé “mintômba mimpe” mi mi téé sép inyu yila mawanda mé. (Yôhanes 10:16; Rôma 5:1, 2; Yakôbô 2:21-25) Jon ibôdôl nano, binoñ bi nhôla bés i bana libak li téé sép bisu bi Isañ wés, ni i yoñ ngaba i pubus jôl jé.

7. Bimbe bisai di nla kôs ni njel binoñ i si énél i Ane i Djob?

⁷ Ikété ndémbél masoohe a bi ti, Yésu a bi ke ni bisu i bat Djob le: “Ane yoñ i lo.” Mambe maada ma yé ipôla binoñ ni Ane i Djob? Binoñ bi mboñ le nsoñgi u 144 000 i bôt ba ba nlama yila bikiñe ni biprisi ntôñ ni Kristô i ngii u yon (Masoola 5:9, 10; 14:1) Ane i Djob, i i gwé Yésu ni baso baane i  ño wé, i ga bana 1 000 ñwii inyu tjam bisai bi binoñ ni bôt ba manôgla bobasôna. Hisi hi ga yila paradis, bôt ba nhémle Djob b’a yila peles, kayéle lihaa li Djob li yé i ngii li ga ba li édi bas bas ni li li yé hana isi. (Masoola 5:13; 20:6) Yésu a’ nyagat ño nyoo, a sas ki maton momasôna ma ndok i Satan ikété ngiinda.​—Bibôdle 3:15.

8. (a) Lelaa Yésu a bi hôla bés i tehe nseñ u Ane i Djob? (b) Lelaa di ñunda le di nit Ane i Djob i len ini?

⁸ Ngéda a bé hana isi, Yésu a bi hôla banigil bé i tehe nseñ u Ane i Djob. Kunda yada i mbus sôble yé, Yésu a bi añal “miñañ minlam mi Ane Nyambe” letee ni minkoñ mi bé haa ngandak. (Lukas 4:43) Ikété bibañga bi nsôk a kal banigil bé ilole a ntémb i ngii, Yésu a niiga bo le ba ba “mbôgi yé letee ni masuk ma ’isi.” (Minson mi baôma 1:6-8) Ni njel nson likalô, bôt ba nkoñ isi bobasô ba bé le ba kôhna pôla i yi kii i yé binoñ ni i yila bakôdôl Ane i Djob. I len ini, di ñunda le di nit Ane i Djob ngéda di nhôla lôkisañ i Kristô i i yii hana isi i yônôs nson u añal ñañ nlam ni nkoñ isi woñsôna u u bi tiba bo.​—Matéô 24:14; 25:40.

9. Inyuki di nla ba nkwook nkaa le bitééne bi Yéhôva inyu bôt ba binam gw’a yon?

⁹ Kii Yésu a bé gwés niiga bés ngéda a sôk kal le: “Sômbôl yoñ i bôña”? Yéhôva nyen a yé Nhek. Ngéda a nkal le jam li bôña, a yé wengoñle li mal bôña. (Yésaya 55:11) A ga nwas bé le ndok i Satan i kwés bitééne gwé inyu bôt ba binam. I bibéé, ngôñ Nyambe i bé le hisi hi yon ni bon ba peles ba Adam bo Eva. (Bibôdle 1:28) Ibale Adam bo Eva ba wo ngi bana bon, ki bitééne bi Djob i yônôs hisi ni mbôda yap bi bi yon bé. Jon, ngéda Adam bo Eva ba bi boñ béba, Yéhôva a bi nwas le ba bana bon. Ni njel binoñ, Yéhôva a nti ba bobasôna ba nhémle nye pôla i pam yila peles, ni niñ boga ni boga i paradis hana isi. Yéhôva a ngwés bôt, a gwé ki ngôñ le bôt ba manôgla ba niñ kiki a bé hoñol.

10. Kii binoñ bi ga lona i bet ba bi wo?

¹⁰ Ndi kii y’a bôña inyu didun ndi didun di bôt di di bi wo ibabé i bana pôla i yi, to i gwélél Yéhôva? Binoñ bi ga boñ le bawoga ba loo bitugne. Tata wés nu gwéha a ga témbna bo i niñ, a ti ki bo pôla i nigil bitééne gwé ni i bana niñ boga. (Minson mi baôma 24:15) Yéhôva a ngwés le bôt ba niñ, le ba wo bañ. Nye kiki lingen li niñ, a nyila Isañ nu hiki mut nu a ntuge. (Tjémbi 36:10) Jon hala a bé a kôli le, Yésu a niiga bés i soohe le: “A Tata wés nu a yé ngii.” (Matéô 6:9) Yéhôva a bi ti Yésu ngaba ikeñi ikété bitugne bi bawoga. (Yôhanes 6:40, 44) Ikété Paradis, Yésu a ga yila toi ‘bitugne, ni niñ.’​—Yôhanes 11:25.

11. Sômbôl Djob inyu “limut li bôt likeñi” li yé le kii?

¹¹ Libak li likap li Yéhôva li tane ndik bé nseñ inyu ndék mimpohlak mi bôt, jon Yésu a kal le: “Inyule tonjee a mboñ sômbôl Nyambe, nyen a yé mankéé nu munlôm ni nu muda, ni ini [mama] ki.” (Markô 3:35) Ngôñ i Djob i yé le “limut li bôt likeñi” li ba nla bé soñgol li nlôl matén ni dilémb tjodisôna li jôp ikété lihaa jé. I bet ba nhémle sesema i Kristô ba boñok ki sômbôl Djob b’a ba i nsoñgi u bôt ba  nlond le: “Tohi i ba ni Nyambe wés, nu a yii mu yéene ane, yak ni Man Ntômba ki”​—Masoola 7:9, 10.

12. Lelaa bitééne bi Yéhôva inyu bôt ba manôgla bi nene mu ndémbél masoohe?

¹² Bitééne bi Yéhôva inyu lihaa li bôt ba binam bi nlébna ikété mam Yésu a bat ikété ndémbél masoohe mé. Inoñnaga ni ma masoohe, di gwé ngôñ i boñ biliya gwés gwobisôna inyu pubus, tole inyu boñ le jôl li Djob li pubhana. (Yésaya 8:13) Jôl li Yésu li nkobla le “Yéhôva a yé tohi,” jon tohi yés ni njel binoñ i nti jôl li Yéhôva lipém ni bibégés. Bisai bi nlôl ni binoñ bi ga kuha ni njel Ane i Djob. Ntiik, ndémbél masoohe Yésu a bi yék, i nkwés bés nkaa le yom yo ki yo i nla bé kéñ sômbôl i Nyambe le i yon.​—Tjémbi 135:6; Yésaya 46:9, 10.

13. Kii sôble yés i ñunda?

¹³ Njel yada di nla gwélél inyu unda le di nti mayéga inyu binoñ i yé le di neebe le di yila bijô bi lihaa li Djob. Di mboñ hala ngéda di nti bésbomede nkikip yak Yéhôva ni njel hémle di gwé ikété binoñ, ni ngéda di nsôblana. Sôble yés i ñunda le “di yé ndigi ba Yéhôva.” (Rôma 14:8, MN) Sôble i yé “minyemhe mi loñge kiññem yak Nyambe.” (1 Pétrô 3:21) Yéhôva a ntimbhe masoohe més i ngéda a neebe i pubus bés ni njel sesema i matjél ma Yésu. Di yé toi nkwook nkaa le a ga ti bés gwom gwobisôna a bi bôn bés.​—Rôma 8:32

14. Inyuki di bi kôs oda le di gwés mut wés libôk?

¹⁴ Ni imbe njel ipe di nla unda le di nti mayéga inyu binoñ? Kiki gwéha yé  yon i ntinde Yéhôva i boñ hiki jam, sômbôl yé i yé le hiki jô i lihaa jé i numus lem i gwéha iloo bini bilem gwobisôna. (1 Yôhanes 4:8-11) Di ñunda le di ngwés ba bon ba Isañ wés nu a yé ngii ngéda di ngwés mut wés libôk. (Matéô 5:43-48) Mbén i gwés mut wés libôk i yé mbén i nyônôs iba i mbus i i bisu le di gwés Yéhôva. (Matéô 22:37-40) Njel yada di nla unda gwéha inyu mut wés libôk i yé le di nôgôl mbén i añle bôt miñañ minlam mi Ane i Djob. Ngéda di ngwés bôt kiki bésbomede, di mbéyés lipémba li Djob. Ntiik, gwéha Nyambe “i mal nañ kôñ kôñ ikété yés” ngéda di nôgôl mbén i gwés bôt bape, téntén bilôk bikéé gwés i pes mbuu.​—1 Yôhanes 4:12, 20.

15. (a) Bimbe bisai di nkôs nano bi nlôl ni yéhôva? (b) Bimbe bisai di mbem?

¹⁵ Nwemel inyu nwéhél yés yosôna i yiblana ngéda di bii hémle yés i ngii binoñ. Bañga i Djob i nkwés bés nkaa le bibéba gwés bi nla “séha.” (Añ Minson mi baôma 3:19-21.) Kiki di mbôk di tehe, ni njel binoñ nyen Yéhôva a nyoñ bagwélél bé ba ba yé minhook kiki bon bé. (Rôma 8:15-17) Inyu ba ba yé kiki “mintômba mimpe,” a yé wengoñle Yéhôva a bi boñ kaat ligwéé ni jôl jap mukété inyu yoñ bo kii bon bé. Mbus di ga pam libak li peles, ni le di ma tégbaha manoodana ma nsôk, Yéhôva a ga ba maséé i sane i kaat ligwéé i, kiki di yé le di kal, le a neebe bés kiki bon bé a ngwés hana isi. (Rôma 8:20, 21; Masoola 20:7-9) Gwéha i Yéhôva inyu tik yé bon i nom i mba ni mba. Bisai bi binoñ bi ga nom i mba ni mba. (Lôk Héber 9:12) Likébla li, li ga nimis bé mahee mé kekikel. To mut, to ngui yo ki yo i ta bé le i kadal bés jo.

16. Lelaa binoñ bi nla boñ bés le di nyila toi ngwélés?

¹⁶ Satan a nla bé boñ yom yo ki yo inyu kéñ i bet ba ntam béba yap ni ñem wap wonsôna i yila bijô bi lihaa li Yéhôva. Yésu a bi lo i nkoñ isi, a wo ki “ngélé yada i lisugul li tjai tjodisôna.” Jon binoñ bi bi sééyana ngélé yada inyu ngélé yosô. (Lôk Héber 9:24-26) Bi nsas kokse i Adam a bi lôôs bés le fet. Di nti mayéga inyu sesema i Kristô, i i nkobol bés i minkôm mi nkoñ isi unu u yé i si énél i Satan, di nkon bé ki to nyemb woñi.​—Lôk Héber 2:14, 15.

17. Kii gwéha Nyambe i nkobla inyu yoñ?

¹⁷ Mimbônga mi Djob mi kôli toi le di bôdôl nwo ñem. Kiki mambén mé mu mam a bi hek ma nset bé, to nyemede a ga wéha bé bés nyuu kekikel. A nhéñha bé. (Malaki 3:6) Yéhôva a nti bés iloo likébla li niñ. A nti bés gwéha yé. “Ndi bés di nyi, di mal ki hémle gwéha Nyambe a gwé inyu yés. Nyambe a yé gwéha.” (1 Yôhanes 4:16) Hisi hiosôna hi ga yila paradis biloñge bi gwom, ni le hiki mut hana isi a ga béyés gwéha Nyambe. Di pôdna makiñ més ni ma bihégél bi Djob bi bi tiñi ni nye nyoo ngii inyu kal le: “Amen. Masoda, ni lipém, ni pék, ni mayéga, ni bibégés, ni lipémba, ni ngui, ba ba ni Nyambe wés i boga ni boga, Amen.”​—Masoola 7:12.