MBUS ngandak dilo di mbebi ni mbéñ, kel i bisu i sôñ Dipôs i ñwii 1919 i bé lék, ni hiañgaa hi bayak. I mbus kosi, yom kiki bo 1 000 di bôt bi bi kodba ikété Ndap likoda li ndôn li li bé yoñ 2 500 biyééne inyu majubul ma likoda li ndôn i Sédar Point i tison i Ôhiô i loñ Amérika. Bikôkôa, 2 000 bôt bape ba bi kôndba. Ba lôlak i sitima, ni matôwa, yak ni mashin ma tôbôtôbô. Hilo hi bé noñ ha, hala wee ngwa um, limut li bi hôl kayéle bôt ba bé lama emble minkwel i si bie bikeñi.

Mapubi ma hiañgaa ma tagbege ipôla tjai di bie inyu béyés bikôti bi bilôk bikéé bi bôlôm. Man mbebi i bé pebek biléé bi dikôtô bi bisista. Mankéé wada, nu a ngi hoñlak jam li a nkal le: “Ikété loñge wom u mbônji u u bé kéña bés, haa ni liyôgbe li nkoñ isi u u bé ha ngéda i, i homa nunu a bé toi Paradis.”

Bilama bi homa nu, bi bé bé to jam i bisu bi maséé ma bé nene i masu ma bôt ba béé ha. Nlegel mañwin wada ha libôga li a nkal le: “Mam momasôna ma bé nene ndik, hémle ni hémle, ni le bôt ba bé minyaô kiyaga.” Inyu Banigil Bibel, i ba ipôla bilôk bikéé i mbus ndék ñwii u ndééñga u bé ngéda i tôbôtôbô: Ngolba i ngéda gwét, béba lisanda ikété makoda; mayib ma Bétel i Brooklyn; ngandak ikété bilôk bikéé i bi ke i mok inyu yéñe i Ane, ibabé i hôya le, bilôk bikéé (ba bé 8) bi bé éga ntôñ ha ngéda i, ba bi kokse bo i lôôs 20 ñwii i mok. *

Ntombok ni nyômôk mu minledek mi ñwii mi, ngim Banigil Bibel ba bi tjôô bôlô yap i likalô. Ndi to hala, libim ipôla yap li bi ke ni bisu i téé likalô ikété lisol. Kiki hihéga, kel yada, tolakii sônda i i nwan mam a bi béhe bo ni ngui, Banigil Bibel ba bi nai le “ba ga ke ndik ni bisu i añal bañga i Djob i pam lisuk.”

Mu i ntandaa ngéda i ndééñga i yosôna, Banigil Bibel ba ba bé ba tiñi ni Djob ba bi “tehe Nwet a ñéga mam, . . . ba soohege hiki ngéda inyu boñ le Tata a éga bo.” Hanano, ba bé nkodbak ikété maséé i likoda likeñi hana i Sédar Point. Sista yada a bi tiimba mahoñol ma ngandak bôt, ba ba bé badba lelaa ba bé lama “ba ntjegek inyu kéñbaha nson wap u likalô.” Iloo mam momasôna, ba bé yamnda ni ngôñ i jôp i bôlô i likalô!

Ngim sonde yosô, i bôt ba bi lo i likoda ba bé nhelek ngéda ba bé tehe bibuk bini le: “GA” ntilga ngii lipep li minkwel, i mabam ma malo malam, ni gwom bipe bi bi bé kéña homa likoda li ndôn. I ngwa koo, mankéé Joseph F. Rutherford a bi sôk yelel ndoñi i bibañga biba bini le: “GA” i bisu bi 6 000 di baemble. Bi bé kobla ni hop pulasi le L’Âge d’Or​—mbamble u mondo inyu likalô. *

Mankéé Rutherford a kal ngéda a bé podok inyu bet ba bé nhoog kiki nye le: “Tolakii ba niñil i ngéda mandutu ini, ba ntehe Kék i Gôl i Ane i lipém li Mésia. . . . Ba nyoñ mbegee i legel i Ane i Kék i Gôl ini i i ga loo, kiki ngim nson ba nlama boñ ni kiki bisai. Inyu yap, hala a bé pes u nson Djob a bi ti bo.”

L’Âge d’Or, “mbamble u mam ma mbôña, i botñem, ni mam di nhémle,” i bé lama gwéélana inyu bôdôl njel i mondo i tjam maliga​—hônd i mandap ni mandap inyu léba i bet ba bé le ba neebe le ba lona bo mbamble u mondo unu hiki sôñ. Ngéda ba bi bat bôt bañen ba bé bebee i nit nson u, baemble bobasôna ba bi telep kunda yada. Jon, “nyonok ni maséé ma ma tina ngôñ, ni makénd ba mbéna tehe yak i bet ba ñodop mabal ma Yésu,” ba bi tôp hiémbi hi bééna ño nkwel le: “A Nwet, ep mapubi moñ ni maliga.” Nkéés Milton Nôris a mbigda le: “Ba bé loñge hiémbi hi ni ngui kayéle i bé pôna wee yak bie bi bé nyiñgha.”

Mbus nkwel u, bôt ba bi telep minlôñ ntandaa ngéda, inyu ba bôt ba bisu i tilba jôl i nsoñgi u bet ba bé lama kôs L’Âge d’Or (Kék i Gôl) hiki sôñ. Ngandak i bi nôgda nlélém jam kiki sista Mabel Filbrik, nu a kal le: “Kinjee maséé i yi le di bé kôs ki bôlô i mondo i sal!”

Bebee le 7 000 Banigil Bibel ba bé nkôôbaga inyu nson. I man lipep nu hônd ni hop ngisi le Organization Method ni man kaat ni hop pulasi le À qui l’œuvre est confiée (I bet ba bi ti nson) i bé tinak ndoñi yosôna le: Juu li mondo hi bi yibla i hikuu hikeñi hiés, hi hi bé lama éga nson. Ni le ikété hiki likoda, ngim juu li bilôk bikéé biaa bi bé lama tééba. Ntôñ u bé téé ki ñéga wada inyu ti biniigana. Ba bé lama ki kap libôga li likoda jolisôna kayéle hiki libôga jada mu, li bana ipôla 150 ni 200 ma mandap. Likoda li likalô jada li bé lama bôña hiki ngwa mbok bikôkôa inyu boñ le bilôk bikéé bi héñha biyi bi mam ba mboñ ni ñañga u nson wap.

Mankéé Herman Filbrik a kal le: “Ngéda di bi témb i mandap més, bés bobasôna di bé di pégi i hônd i boma bôt ba ba bé le ba neebe i kôs mbamble u mondo unu hiki sôñ.” Ba bi léba bôt ba bééna ngôñ i emble bo homa nyensô. Beula Kôvéi a kal le: “I nene le i mbus gwét ni njôô, bôt bobasôna ba bi leege ni maséé ñwin u kék i gôl.” Artur Klaus a tila le: “Likoda jolisô li bi hel ngandak inyu nsoñgi nkeñi u bôt ba bi neebe i kôs u mbamble u.” Mbus sôñ iba le mbamble u bisu u bi pam, bebee le pes hidun di mimbamble mi mondo le L’Âge d’Or (Kék i Gôl) mi bi kéba, ni le 50 000 di bôt di bé di ma bat i kôs mbamble u hiki sôñ.

Yigil i Nkum Ntat nu 1 Njéba, 1920 ni ño nkwel ni hop u ngisi le “Gospel of the Kingdom (Miñañ minlam mi Ane),” i bé inoñnaga ni mankéé Aléxander H. Macmillan “ngélé bisu le ntôñ u ti bilôk bikéé bi nkoñ isi woñsôna makénd i añal ñañ nlam u Ane.” I yigil i, i bi ti minhoog mi bikristen nwominsôna makénd i “bok mbôgi ni nkoñ isi le Ane i Djob i yé bebee.” I len ini, didun di bôt di ñadba ni bilôk bikéé bi Kristô ba ba bi “ti nson unu” inyu añal ñañ nlam ikété nkoñ isi wonsô ni makénd, mu kiki ba mbem kék i gôl i Mésia.