1-2. (a) Inyuki ñôma Paul a bi kal le gwéha i “nloo” mam momasôna? (b) Mambe mambadga di ga wan munu yigil ini?

 I NGÉDA ñôma Paul a bé kwélél bini bilem le hémle, botñem ni gwéha, a bi sôk ni bini bibuk le: “Jam li nloo i mam mana momasôna li yé gwéha.” (1 Korintô 13:13) Inyuki Paul a bi kal hala? I dilo di nlo, di ga bana ha bé ngôñ i hémle mimbônga mi Djob inyu mbok yondo tole i bana botñem le mimbônga mi mi ga yon, inyule mi ga mal yon. Ndi i ga béda le di kee ni bisu i gwés Yéhôva ni lôk kéé yés. Gwéha yés inyu yap i ga ke ni bisu i keñep.

² Kiki di nlama ke ni bisu i bana gwéha, di wan mambadga maa mana. I bisu, inyuki di nlama gwéhna bés ni bés? Iba, lelaa di nla unda le di ngwéhna bés ni bés? Aa, lelaa di nla ke ni bisu i gwéhna bés ni bés?

3. Mambe manjom di gwé i gwéhna bés ni bés?

³ Inyuki hala a nlôôha ba nseñ le di gwéhna bés ni bés? Mu manjom di gwé, yada i i nlôôha ba nseñ i yé le, gwéha i yé yimbne i bañga bikristen. Yésu a bi kal baôma bé le: “Hala nyen bôt bobasôna b’a yi le ni yé banigil bem​—ibale ni ngwéhna bé ni bé.” (Yôhanes 13:35) Jam lipe li yé le ibale di ngwéhna, di ntééda adna yés. Paul a kal le: “Gwéha i ñat toi bôt bobasôna i nya  i yôni.” (Kôlôsé 3:14) Ndi di gwé njom ipe i gwéhna bés ni bés. Ñôma Yôhanes a bi tilna lôk kéé yé le: “Nu ni nu a ngwés Nyambe a nlama yak gwés maasañ.” (1 Yôhanes 4:21) I ngéda di ngwéhna bés ni bés, di ñunda le di ngwés yak Nyambe.

4-5. Ti hihéga hi hi ñunda maada ma yé ipôla i gwés Nyambe ni i gwés lôk kéé yés?

⁴ Mambe maada ma yé ipôla gwéha di ngwés Nyambe ni gwéha di ñunda lôk kéé yés i bôda ni i bôlôm? Kiki hihéga, di béñge maada ma yé ipôla ñem wés ni bini bijô bi nyuu bipe. Ibale dokta i ngwel woo woñ, i nla pam i yi too ñem woñ u mbép loñge tole u mbép bé loñge, hala a nhôla nye i yi too ñem woñ u yé mbôô tole u ta bé mbôô. Lelaa di nla gwélél hihéga hini inyu pôdôl gwéha?

⁵ Nlélém kiki dokta i nla nyi ibale ñem wés u yé mbôô i ngéda i ngwel woo wés inyu tehe lelaa ñem wés u mbép, yak bés di nla yi ibale gwéha yés inyu Yéhôva i nkeñep ibale di nwan gwéha di gwé inyu lôk kéé yés. Ibale di nyimbe le gwéha yés inyu lôk kéé yés i nsôs ngui, hala a nla hôla bés i nok le yak gwéha yés inyu Yéhôva yak yo i nkahal sôs. Ndi i ngéda di mbéna unda lôk kéé yés gwéha, hala a ñunda le yak gwéha yés inyu Nyambe i nañ.

6. Inyuki hala a yé béba jam ibale gwéha yés inyu lôk kéé yés i bôda ni i bôlôm i nsôs ngui? (1 Yôhanes 4:​7-9, 11)

⁶ Hala a yé béba jam ibale gwéha yés inyu lôk kéé yés i bôda ni i bôlôm i nsôs ngui. Inyuki? Inyule hala a ñunda le maada més ni Yéhôva ma gwé ha bé ngui. Ñôma Yôhanes a bi tibil yigye i jam li i ngéda a kal le: “I mut a ngwés bé maasañ nu a ntehe, a ta bé le a gwés Nyambe nu a ntehe bé.” (1 Yôhanes 4:20) Bimbe biniigana di nla ôt? Yéhôva a yé maséé i ngéda di “ngwéhna bés ni bés.”​—Añ 1 Yôhanes 4:​7-9, 11.

7-8. Lelaa di nla unda le di ngwéhna bés ni bés?

⁷ Ngandak ngélé ikété bañga i Nyambe, di nléba i mbén ini le “ni gwéhna bé ni bé kiki me bi gwés bé.” (Yôhanes 15:​12, 17; Rôma 13:8; 1 Tésalônika 4:9; 1 Pétrô 1:22; 1 Yôhanes 4:11) Gwéha i yé lem i i nlôl i ñem, tole i mut wés ikété kété, ndi mut binam nye ki nye a nla bé yi i yom i yé bés ikété ñem. Jon, lelaa bôt bape ba ga yi le di ngwés bo? Hala a nla ndigi bôña ni njel bibuk gwés ni maboñok més.

⁸ Ngandak manjel i yé inyu unda lôk kéé yés i bôda ni i bôlôm le di ngwés bo. Ndék dihéga ini: “Ni kalna maliga bé ni bé.” (Sakaria 8:16) “Ni téédaga ki nsañ ipôla nan.” (Markô 9:50) “Ni ba bôt ba bisu i tina lipém bé ni bé.” (Rôma 12:10) “Leegana bé ni bé.” (Rôma 15:7) ‘Kena ni bisu . . . i nwéhlana bé ni bé.’ (Kôlôsé 3:13) “Kena ni bisu i beglana mambegee ma ñét bé ni bé.” (Galatia 6:2) “Kena ni bisu i tina bé ni bé hogbe.” (1 Tésalônika 4:18) “Kena ni bisu . . . i lédhana bé ni bé.” (1 Tésalônika 5:11) “Ni soohege wada inyu numpe.”​—Yakôbô 5:16.

9. Inyuki i hôgbaha bôt bape i yé loñge njel i unda le di ngwés bo? (Béñge yak titii.)

⁹ Di pôdôl le njel yada ikété manjel di nsima hanano i het di nla unda le di ngwés bôt bape. Paul a nkal le: “Kena  ni bisu i tina bé ni bé hogbe.” Inyuki i hôgbaha bôt bape i yé loñge njel inyu unda bo gwéha? Inoñnaga ni ndoñi i bibuk i Bibel, i buk Paul a bi gwélél le “hôgbaha” i nkobla le “i yén ipañ mut inyu lédés nye i ngéda a ntégbaha mandutu.” I ngéda di nhôgbaha lôk kéé yés i i mboma mandutu, di nhôla bo i ke ni bisu i gwélél Yéhôva. Hiki ngéda di nhôgbaha lôk kéé yés i bôda ni i bôlôm di ñunda bo le di ngwés bo.​—2 Korintô 7:​6, 7, 13.

10. Mambe maada ma yé ipôla i unda konangoo ni i hôgbaha bôt?

¹⁰ Maada ma yé ipôla i kônôl mut ngoo ni i hôgbaha mut. Lelaa hala? I mut a gwé ñem konangoo a yé bebee i hôgbaha bôt bape, a nyéñ ki manjel i lôl bo mahôla i ngéda ba ntégbaha mangéda mabe. I kônôl bôt bape ngoo, i ntinde bés i hôgbaha bo. Paul a ñunda le konangoo i Yéhôva i ntinde nye i hôgbaha bôt ba binam. A nkal le Yéhôva a yé “Tata nu a yôni ni konangoo, ni Nyambe nu hogbe yosôna.” (2 Korintô 1:3) Buk isi lipe mu nlôñ Bibel u, i ntoñol le, Paul a ngwélél i bibuk bini le “a yôni ni konangoo” inyu pôdôl libak li mut a nkon bôt bape ngoo. Bibel i “nsébél Nyambe le Tata nu a yôni tole Lingen li konangoo, inyule nyen a nlôôha unda bôt konangoo.” I konangoo i yon i ntinde nye i hôgbaha bés “ikété manoodana més momasôna.” (2 Korintô 1:4) Ndigi kiki malép ma nsune ma lingen ma mélés nyus i bôt ba nyo mo, hala nyen Yéhôva a nhôgbaha i bôt ba mboma mandutu. Lelaa yak bés di nla kôna konangoo i Yéhôva, di hôgbahaga ki bôt bape? Njel yada i yé le di hôlôs bilem bi bi ga hôla bés i kônôl bôt bape ngoo ni i hôgbaha bo. Bimbe bi bilem?

11. Inoñnaga ni Kôlôsé 3:12 ni 1 Pétrô 3:​8, bimbe bilem bipe di nlama bana inyu ke ni bisu i gwés ni i hôgbaha bôt bape?

¹¹ Kii i ga hôla bés i gwéhna ni i ‘ke ni bisu i tina hogbe bés ni bés’? Di nlama hôlôs bilem bilam kiki bo, ñem ngôô, gwéha lisañ li bôt, ni loñgeñem. (Añ Kôlôsé 3:12; 1 Pétrô 3:8.) Lelaa bilem bi, bi nhôla bés? I ngéda di nkônôl lôk kéé yés ngoo, di undga ki bo loñgeñem, di ga hôla ndik bé bo, ndi di ga hôgbaha bo i ngéda ba mboma mandutu. Kiki Yésu a kal le, “i mam ma yôni mut ikété ñem mon nyo u mpot. Loñge mut i mpémhene mam malam mu loñge yé nkus.” (Matéô 12:​34, 35) I hôgbaha lôk kéé yés i bôda ni i bôlôm i i gwé ngôñ ni mahôla, i nlôôha ba njel ilam i unda bo gwéha.

12. (a) Inyuki di nlama yoñ yihe le gwéha yés inyu bôt bape i sôs bañ? (b) Imbe mbadga di ga wan nano?

¹² Di gwé ngôñ i ke ni bisu “i gwéhna bés ni bés.” (1 Yôhanes 4:7) Ndi di hôya bañ le Yésu a bi béhe bés le: “Gwéha i libim li bôt y’a sune.” (Matéô 24:12) Yésu a bé sômbôl bé kal le ngandak yé banigil i ga waa gwés lôk kéé yap. Ndi le di yoñ yihe le di kôna bañ bôt ba nkoñ ’isi unu ba ba ngwés bé bôt bape. Ni i jam li i mahoñol, di wan ini mbadga i i nlôôha bana mahee: Lelaa di nla yi too di ngwés toi lôk kéé yés?

13. Lelaa di nla yi too di ngwés toi lôk kéé yés?

 ¹³ Njel yada i i nla hôla bés i yi too di ngwés toi lôk kéé i yé i ngéda di nwan lelaa di yé di boñ i ngéda ngim mam i mpémél bés. (2 Korintô 8:8) Ñôma Pétrô a mpôdôl jam jada mu, a nkal le: “Iloo mam momasôna, ni bana bañga bañga gwéha bé ni bé, inyule gwéha i nhô ngandak bibéba.” (1 Pétrô 4:8) Jon i jam di mboñ i ngéda mankéé wés a nkal tole a mboñ bés jam li li ntééñga bés, li nyeleene bés ibale gwéha yés inyu lôk kéé i nkeñep tole i nsôs.

14. Inoñnaga ni 1Pétrô 4:​8, imbe gwéha di nlama bana? Ti hihéga.

¹⁴ Di ôt le pék mu bibañga bi Pétrô. Pes i bisu i nlôñ 8 i mpôdôl ntén gwéha di nlama bana: “bañga bañga gwéha.” I buk Pétrô a ngwélél hana le “bañga bañga” i nla ki kobla le “sambal.” Liboñ li nyônôs iba munu nlôñ unu li ntoñol kii bañga bañga gwéha i ntinde bés i boñ. I nhô bibéba bi lôk kéé yés. Kiki hihéga, di hégda le di gwé téblé i i nene ha bé ilam, di nla yoñ libadô di sambal jo i ngii téblé yosôna; libadô li nhô ndik bé pes yada i téblé, ndi li nhô téblé  yosôna. Nlélém jam, ibale di gwé bañga bañga gwéha inyu bilôk bikéé gwés, di ga ‘hô’ ndik bé béba yada tole bibéba biba ba mboñ bés, ndi di ga hô bibéba gwobisôna ba mboñ bés.

15. Kii di ga pam i boñ ibale gwéha yés inyu lôk kéé yés i bôda ni i bôlôm i gwé ngui? (Kôlôsé 3:13)

¹⁵ Gwéha yés inyu lôk kéé yés i ga kônde keñep ibale di nwéhél bo to i ngéda hala a ta bé bun. (Añ Kôlôsé 3:13.) I ngéda di mpam i nwéhél bôt bape, di ñunda le gwéha yés inyu yap i gwé ngui, di ñunda ki le di nsômbôl lémél Yéhôva. Kii ipe i nla hôla bés i nwéhél lôk kéé yés ni i boñ le i mam ba mboñ bés ma lôôha bañ tééñga bés?

16-17. Kii ipe i ga hôla bés i hôya dihôha di lôk kéé yés? Ti hihéga. (Béñge yak titii.)

¹⁶ Bok mis mu bilem bilam bi lôk kéé, u béñge bañ bilem gwap bibe. Di yoñ le hihéga hini: hégda le u yé ni lôk kéé i bôda ni i bôlôm inyu tégbaha loñge ngéda. I mamélél, ni yoñ fôtô. Ndi mu kiki u yoñok i fôtô i, u nkônde biba bipe, inyule i nla pam le i bisu u nyoñ i ba bé ilam. Nano u gwé bifôtô biaa, ndi ikété fôtô i bisu, u nyimbe le mankéé wada a nwemla bé. Kii u ga boñ ni i fôtô i? U ga sas yo inyule u gwé bifôtô biba bipe i het bôt bobasôna yak i mankéé nu ba nwemla.

¹⁷ Di hégda bifôtô bi ni i mam di ntééda  i mahoñol més. Di mbéna tééda mangéda malam di ntégbaha ni lôk kéé yés. Ndi bebek le mu mangéda ma, kel yada mankéé nu muda tole nu munlôm a bi kal tole a bi boñ ngim jam i i bi lémél bé bés. Kii di ga boñ ni i jam li? Inyuki di ta bé le di hôya i jam li kiki bo le di nsas i fôtô i i ta bé ilam? (Bingéngén 19:11; Éfésô 4:32) Di nla boñ biliya i sas dihôha lôk kéé i bôda ni i bôlôm i ma boñ bés, inyule di gwé ngandak mangéda malam di ma tégbaha ni bo. I nya mangéda i yon di gwé ngôñ i tééda i mahoñol més.

18. Kii di ntehe munu yigil ini inyu jam li mbéñge gwéha?

¹⁸ Inyuki di nlama ke ni bisu i gwéhna bés ni bés? Kiki di ntehe munu yigil ini, i ngéda di ñunda lôk kéé yés gwéha, di ñunda le di ngwés Yéhôva. Lelaa di nla unda le di ngwés lôk kéé yés? Njel yada i yé i ngéda di nhôgbaha bo. Di nla “ke ni bisu i tina bés ni bés hogbe” i ngéda di nkon bôt bape ngoo. Lelaa di nla ke ni bisu i gwéhna bés ni bés? Di nlama boñ biliya bi ngui i nwéhél lôk kéé inyu dihôha ba bi boñ bés to ibale hala a ntomb bé.

19. Inyuki i nlôôha ba nseñ i gwéhna bés ni bés i len ini?

¹⁹ Inyuki hala a nlôôha ba nseñ i gwéhna bés ni bés i len ini? Di béñge i njom Pétrô a nti bés: “Lisuk li mam momasôna li nkôôge bebee. Jon, . . . ni bana bañga bañga gwéha bé ni bé.” (1 Pétrô 4:​7, 8) Kiki lisuk li béba nkoñ ’isi ini li nkôôge bebee, kii di mbem? Yésu a bi kal banigil bé le: “Biloñ gwobisôna gw’a oo bé inyule ni yé banigil bem.” (Matéô 24:9) Inyu hônba i nya ôa i, di nlama tééda adna yés. Ibale di ngwés lôk kéé yés i bôda ni i bôlôm, biliya Satan a mboñ inyu bagal bés bi ga kwo i lép inyule “gwéha yon i ñat toi bôt bobasôna i nya i yôni.”​—Kôlôsé 3:14; Filipi 2:​1, 2.