YÉHÔVA DJOB a nti bikristen makénd le bi diihe nsañ, le u ba jam li nlôôha nseñ i niñ yés. Lisuk li mut nsañ li yé le, a niñ ikété ngandak maséé. Hala a mboñ le likoda li bikristen li nyoña bôt ba ngwés bé mindañ.

Kiki hihéga, mut makañ wada nu a bé yiba ngandak i loñ i Madagaskar a bi tehe maada malam ma yé ipôla Mbôgi Yéhôva. A kalba le: ‘Ibale me nlama pohol ngim base, ini yon m’a pohol.’ Kii ngéda i bé tagbe, a bi tjôô makañ, mbus ngandak sôñ, a bii muda a bé niñ ni nye, ndi a yila ngwélél Yéhôva, Djob li nsañ.

Kiki mut nunu, dikôô di bôt hiki nwii ba nléba nsañ ba bé yéñ behee, ngéda ba nyila bikristen. Ndi, Bibel i nkal loñge le bilem kiki “béba njôñ ni libak li mut mindañ” bi nla mélés maada malam ipôla lôk kéé i likoda, ni lona lisanda. (Yakôbô 3:14-16, MN) Kinje maséé i yi le, Bibel i nti bés maéba malam inyu yi lelaa di nla keñgle mindañ mi, ni tééda nsañ. Inyu yi lelaa di nla pam i boñ hala, di wan ngim mam ma mbéna pémél bés.

“Me bééna ndutu i nôgla ni mankéé wada nu me ni nye di bé sal ntôñ. Lisañ jada, ngéda di bé nomol, bôt iba ba bi ba mbôgi njomol jés.”​—CHRIS.

“Sita yada i me ni nye di bééna lem i pam likalô, a bi kit kunda yada le di mpam ha bé ntôñ. Mbus, a tjél pôdôs me. Me bé yi bé inyuki.”​—JANET.

“Di bé bôt baa i kwel i téléfôn. Wada a kal bés le nye a nke, me bé hoñol le a ta ha bé i emble bés. Ha nyen me bi bôdôl sok nye i téléfôn, ndi mankéé nu, a bé ngi lém téléfôn.”​—MICHAEL.

“Basañal iba ba likoda jés ba bi bôdôl bana mindañ. Wada a bi bôdôl nôôma nuu numpe. Jomol jap li bi yila ngok baagene inyu lôk kéé ipe.”​—GARY.

U nla hoñol le i mam di nsima hana ma yé disii. To hala, hiki jada mu li nla boñ le bet ba bi kwo mu ba nimis maada malam map ni Djob, li nla ki tééñga bo mahoñol. Ni ga ba maséé i yi le, nsañ u bi kuba ipôla bilôk bikéé bi bôda ni bi bôlôm bini, ba ba bi gwélél Bibel inyu kôs mahôla. Mambe maéba ma Bibel ni nhoñol le ba bi bii bisélél?

“Ni ndañap bañ mu njel.” (Bibôdle 45:24) Yôsep a bi ti lôkisañ maéba ma ngéda ba bé témb yak isañ wap. Kinje bibañga bi pék! Ngéda mut a ngwel bé nyemede,  ndi a bak mut a hoo unup, a nla yak unbaha bôt bape. Chris a bi pam i tehe le bibomb gwé bi bé ngôk, ni le a bé hoo bé noñ oda ba bé ti nye. Kiki a bé sômbôl héñha, a bi bat mankéé nu bo nye ba bi nomol nwéhél, a sal ki ni ngui inyu gwel nyemede. Ngéda a bi yimbe mahéñha ma Chris, yak liwanda jé li bôlô li bi lona ndék mahéñha. Nano ba yé maséé i gwélél Yéhôva ntôñ.

“Homa likoda li ta bé, mahoñol ma nkwo tua.” (Bingéngén 15:22) Janet a bi sugus le a bé lama noode bii maliga ma bisélél. A yoñ makidik i ke boma, tole i pôdôs nu bo na nye ba bi kôs mindañ. Mu kii ba bé kwel, ibabé i babaa nye, Janet a bi ti nye makénd i pahal yom i bé tééñga nye. Ni nla hégda le nkwel u, u bé bé bun. I bibôdle, u bé lék toi, ndi mam ma bi héñha mu kii ba bé kwel ikété nwee nyensôna. I sita i, i bi léba le a bi bep nok ngim jam i bi tinde nye i ôm Janet nsohi, ki le Janet a bé bé mu. A bi bat nye nwéhél, kayéle ba ke ni bisu i gwélél Yéhôva ntôñ kii ngéda bisu.

“Ibale u nlona likébla joñ i juu li bisesema, ndi u hoñol ha le maasoñ a gwéne we nsohi, yék likébla joñ i mbombom juu, u nya ke ndugi sangla ni maasoñ, ndi to le u ntémp, u nti likébla joñ.” (Matéô 5:23, 24) Bebeg ni nhoñol maéba ma Yésu a bi ti mu nkwel wé i ngii hikôa. Michael a bi wo nyuu ngéda a bi pam i nok le a bi babaa mankéé nu, ni bibuk bibe. Jon a bi yoñ makidik ma ngui i kôp nsañ ipôla nye ni mankéé nu. A bi ke i boma mankéé nu a bi hindha ñem, ni suhulnyu, a bat nye nwéhél. Ni lisuk limbe? Mikael a nkal le:“Mankéé a bi pala nwéhél me ni ñem wé wonsôna.” Ba bi témb ba yila mawanda.

“Ni hônbanaga bé ni bé, ni nwéhlaga ki bé ni bé, to ibale mut a ntogha inyu maasañ.” (Kôlôsé 3:12-14) Inyu basañal iba, ba di mpôdôl, ba ba bé ba ma nom mu nson u, mañ wada u bi hôla bo i badba mambadga mana le: ‘Baa bé boba ni kôli unbaha bôt bape inyule di nôgla bé? Baa ni gwé toi bañga njom i tjél hônba wada ni nuu, ni ke ni bisu i gwélél Yéhôva ikété nsañ?’ Ba bi neebe maéba ma mañ u, ba bii yak mo bisélél. I len ini, ba nke ni bisu i sal ntôñ mu nson u añal ñañ nlam.

I bii biniigana bi Bibel bi di nsima i bisélél, i kaat Kôlôsé 3:12-14, i nla ba bibôdle bilam ibale mut a ñunbaha we. Ngandak i bi léba le, ni suhulnyu, bi nla nwéhél ni hôya.  Ibale u noode boñ hala, ndi u nôgda le u nlama boñ iloo ha inyu kôp nsañ, baa kaat Matéô 18:15 i yé le i hôla bé? Hana Yésu a bé pôdôl ngéda ngim mut i mboñ nuu numpe béba keñi. Ndi i pot maliga, hala a yé le a ba litiñ u nlama noñ. Ni loñgeñem, ni suhulnyu, kôôge ndigi bebee ni manyuñ nu muda tole nu munlôm, u noode kwélél mu inyu téé mam.

I yé ntiik le, Bibel i nti bés maéba ma mahee mape. Di ga témb di wan ngandak maéba mu ibale di mboñ biliya i numus ‘litam li mbuu . . . gwéha, maséé, nsañ, wongut, loñgeñem, liyômba, hémle, ñemlima, ni hôtnyu.’ (Galatia 5:22, 23) Kiki môô inyu bikei bi mashin, bilem bi mbuu bi nhôla bés i ke ni bisu i niñ ikété nsañ.

Libak li mut​—bilem bi, hiki wada wés a gwé, bi bi mboñ le di ba mahéñha​—li nla lémés mawanda. Maselna ma ma nla ki lona mindañ. Nhôôlak mañ wada u nti hihéga hini le: “Mut nu a yé nsut a nla bana ndutu i niñ ni nwet a yé liyômba, ni nu a nyoña bôt. I nla nene wee maselna ma ma gwé bé nseñ; ndi ma nla lona mindañ.” Ndi baa u nhoñol le, bôt ba mpôna bé bilem ba nlama ndik bana ngimanôgla ipôla yap? Nano di béñge ndémbél i baôma iba. Umbe ntén mut Pétrô a bé? Ni nla hoñol le a bé bahal maliga, a bak ki bôs mut. Njee Yôhanes a bé? Di nla hégda nye kiki mut nyonok ni gwéha nu a bé béna yoñ ngéda i hek pék ilole a mpot tole a mboñ jam. Di nla bana ngim manjom i bana i nya mahoñol inyu baôma bana boba. I mpôna le ba bééna bé nlélém libak. Ndi to hala, ba bi sal loñge ntôñ. (Minson mi baôma 8:14; Galatia 2:9) Nlélém i len ini, bikristen bi bi yé nya ndi nya ikété libak jap bi nla sal ntôñ.

 Bebeg le bipôdôl ni maboñog ma ngim mankéé nu munlôm i likoda joñ ma mbébél we. Ndi, u nyi le Kristô a bi wo inyu mankéé nu, ni le u nlama gwés nye. (Yôhanes 13:34, 35; Rôma 5:6-8) Jon, ilole di mélés liwanda jés ni mankéé nu, tole di noode keñgle nye, di nlama badba le: ‘Baa mankéé nu munlôm nu, a mboñ toi ngim jam Bitilna bi nsôñga? Baa a nkôôba tééñga me ni mahoñol mabe? Tole di yé ndik mahéñha?’ Mbadga ipe i nlôôha ba nseñ i yé le: ‘Imbe lem lam ikété gwobisôna a gwé i nla bane me nseñ?’

Mbadga i nsôk i, i yé nseñ ngandak. Ibale mankéé a yé mut a mpot ngandak, ndi we u bak nwee, bigda lelaa i yéne nye ntombok jam i bôdôl minkwel likalô. U nla yoñ bitelbene i pam ni mut nu likalô inyu tehe kii u nla nigil i nyeni. Ibale a yé mut a gwé lem i kap ni bôt bape, ki le we u gwé lem i boñ minsoñgi ilole u nti mut yom, inyuki u nla bé noode maséé ma nlôl i hôla mimañ mi bôt, bakokon, tole i bet ba gwé ngôñ ni mahôla? Jam di nlama tééda, jo lini le, to hala kii ni yé mahéñha ikété libak linan, we ni manyuñ nu muda tole nu munlôm ni nla nôgla ibale ni mbok mis manan i bilem bilam bi wada ni nuu. I boñ hala i nsômbôl bé kal le ni ga ba ndik mawanda, ndi hala a ga hôla bé i ba lôñ ni boñ le nsañ ipôla nan i ke ni bisu i keñep​—ipôla bé boba, ni ikété likoda jolisôna.

Ewôdia bo Syntiké ba bé lama bana maboñog ni bilem bi bi bé maselna. Ndi, ñôma Paul a bi ti bo makénd i ‘bana hoñol yada i Nwet.’ (Filipi 4:2) Baa yak we u mboñ minlélém mi biliya, téntén biliya i niñ ikété nsañ ni bôt?

Kiki kai be i ño ikété mbônji, i bana mahoñol mabe i pañ bôt bape i nla kônde ôbôs mam, he mah le di nup mo. Ngéda lôlha ôa  i nyon i ñem mut, i nla yak tééñga likoda jolisôna. Ibale di ngwés Yéhôva ni lôk kéé yés, di ga boñ kii yosôna di nla le maselna ma bilem di gwé ma tééñga bañ, tole ma hôyôs bañ nsañ u litén li Djob.

Ngéda di sañgal mindañ tole maselna di gwé ni mahoñol le nsañ u ba, matam malam kiyaga di nla bumbul ma ga hélés bés. Di yoñ hihéga hi Mbôgi Yéhôva yada: “Me bé nôgda wengoñle sita yada i bé yoñ me kiki bo isii mañge. Hala a bé tééñga me ngandak. Kii hiun hiem hi bé bet, me bôdôl timbhe nye béba. Me kalba le: ‘A nti bé me lipém me kôli bana, jon to me m’a ti bé nye lipém.’”

Mbus, Mbôgi Yéhôva ini i bi bôdôl wanba. “Me bi bôdôl tehe bibomb gwem, hala a bi wéha me nyuu. Me bi nôgda le me bé lama héñha mahoñol mem. Ngéda me bi mal soohe Yéhôva mu jam li, me bi sômbôl sita i man likébla, me tilna ki nye man kaat inyu bat nye nwéhél inyu libak jem libe i pañ yé. Di bi nwéhlana wada ni nuu di neebe i hôya jam li. Di mah bana ha bé mindañ.”

Bôt ba nyamnda ni ngôñ inyu bana nsañ. Ndi, ngéda ba nyéñ yoñ tel yap, tole ngéda ba nyan bo, ba yé ba kahal bana maboñog ma nkiha bé ni nsañ. Hala a yé mbale inyu ngandak i i mbégés bé Yéhôva, ndi mu nsoñgi u bagwélél bé ba ba bééga jôl jé, nsañ ni adna bi nlama ba yom i bisu. Djob a bi tinde Paul i tila le: “Me . . . Nsoohe bé le ni hiôm kiki i kôli ni nsébla ni bi séblana, lôñni suhulnyu yosôna ni ñemlima, yak ni wongut. Ni hônbanaga bé ni bé ikété gwéha; ni nyamndaga yaga ki i tééda adna mbuu, le nsañ u at bé ni bé.” (Efésô 4:1-3) ‘Nsañ u ñat bés ni bés’ u nlôôha ba mahee. Jon di lédés wo, di yoñ ki makidik ma ngui i sañgal ngimanôgla i i nla ba ipôla yés.