1. Kii Yéhôva a ngwés le bôt bobasôna ba mboñ?

 YÉHÔVA a bi hek mut binam ni ngap i pohol. U ngwélél likébla li i ngéda u nyoñ makidik. Makidik ma nlôôha nseñ mut a nla yoñ, ma yé le a ti nyemede nkikip yak Yéhôva, a jôp ki ikété lihaa li bagwélél bé. Yéhôva a gwé ngôñ le hiki mut a boñ hala. Inyuki? Inyule a ngwés bôt ba binam, a ngwés ki le mam map ma kee loñge. A ngwés le ba ba mawanda mé, ba niñ ki i boga ni boga.​—Ndiimba Mbén 30:​19, 20; Galatia 6:​7, 8. 

2. Lelaa Yéhôva a ntehe baboñbéba ba ba ntop bé hiel ñem? (1 Yôhanes 2:1)

² Ndi Yéhôva a nyégsa bé mut nye ki nye i gwélél nye. A nwas le hiki mut nyen a yoñ makidik mé. Ndi kii i ga bôña ibale nsôblege u kristen u mbôk mbén Nyambe, u mboñ béba ikeñi? Ibale a nhiel bé ñem ba nlama pémés nye i likoda. (1 Korintô 5:13) Ndi, to hala, Yéhôva a ngwés le mboñbéba a témb i nyeni. I maliga inyu  i njom i yaga nyen a bi ti binoñ, le baboñbéba ba ba ntam béba yap ba kôhna nwéhél. (Añ 1 Yôhanes 2:1.) Nyambe wés nu gwéha a nti baboñbéba makénd le ba hiel miñem.​—Sakaria 1:3; Rôma 2:4; Yakôbô 4:8.

3. Kii di ga tehe munu i yigil ini?

³ Yéhôva a ngwés le di tehe béba ni baboñbéba kiki nyemede a ntehe bo. I yigil ini i ga unda bés lelaa di nla boñ hala. Kiki di mba di nigil yo, mbéñge (1) kiki i bi bôña i likoda li Korintô i hiai hi bisu i ngéda mankéé wada a bi boñ béba ikeñi, (2) bimbe biniigana ñôma Paul a bi ti i ngéda mboñbéba a bi tam béba yé, ni (3) lelaa ñañ unu u nhôla bés i tehe bikristen bi bi mboñ béba ikeñi kiki Yéhôva a ntehe bo.

I JAM LIKODA LI BI BOÑ I HIAI HI BISU I NGÉDA MANKÉÉ WADA A BI BOÑ BÉBA IKEÑI

4. I hiai hi bisu, kii i bi bôña i likoda li Korintô? (1 Korintô 5:​1, 2)

⁴ Añ 1 Korintô 5:​1, 2. Mu liké jé li nyônôs iaa, ñôma Paul a bi nok nwin umbe u nlôl i likoda li Korintô li li bi tip gwéé. Mankéé wada mu likoda li a bi lal ni nwaa isañ. Liboñok li, li bé yaga nyega ‘yak inyu bôt ba matén!’ Ndi lôk kéé i bi neebe i jam li, i tehe bé ki to le hala a yé béba le i mankéé nu a yén ikété likoda. Bebek lôk kéé ihogi i bé hoñol le ibale i mboñ hala, wee ba nkôna konangoo i Yéhôva inyu bikwéha bi bôt. Ndi Yéhôva a neebe bé liboñok libe ikété bagwélél bé. I mut a bi boñ i béba ikeñi ini a bi hoo jôl li likoda mahindi. A bé ki le a tinde lôk kéé ipe i boñ kiki nye. Ndi kii Paul a bi kal likoda le li boñ?

5. Kii Paul a bi kal likoda le li boñ, hala a bé sômblak kal kii? (1 Korintô 5:13) (Béñge yak titii.)

⁵ Añ 1 Korintô 5:13. Yéhôva a bi tinde ñôma Paul i tila le ba héya mboñbéba nu a ntjél tam béba yé i likoda. Kii lôk kéé i bé lama boñ ni mut nu? Paul a bi kal bo le ba “kiha ha bañ lôñni” nye. Kii a bé sômbôl kal? Paul a bi toñol le i mbén i i nkobla le ba “je bañ to lôñni i nya mut i.” (1 Korintô 5:11) I ngéda u nyén i je ni mut, u ntégbaha ngéda ni nye u kwelek ni nye. Jon, Paul a bi yigye le lôk kéé i nlama bé tégbaha ngéda ni mut nu. Hala a bé sôñ likoda ni maboñok mabe. (1 Korintô 5:​5-7) Handugi  hala, kiki ba bééna ha bé maada ni mut nu, hala a bé hôla nye i tehe ikepam limbe likala a bi ke haa ni Yéhôva, kayéle hala a wéha nye nyuu, a tinde ki nye i hiel ñem.

6. Lelaa likoda li bi leege i kaat Paul a bi ep, kii mboñbéba a bi sôk a boñ?

⁶ I ngéda Paul a bi ep léta yé yak bikristen bi Korintô, a bôdôl badba lelaa likoda li ga leege yo. Ndi, i mbus ngéda Titô a témbna Paul nwin nlam. Likoda li bi leege kaat i Paul loñge. (2 Korintô 7:​6, 7) Li noñ ki biniigana a bi ti, li pémés mboñbéba i likoda. Ndék ngéda i mbus le Paul a bi ep kaat, mboñbéba a bi tam béba yé! A bi héñha maboñok mé mabe, a tiimba bôdôl noñ matiñ ma téé sép ma Yéhôva. (2 Korintô 7:​8-11) Kii ipe Paul a bi kal likoda le li boñ?

 KII LIKODA LI BI BOÑ NI MBOÑBÉBA NU A BI HIEL ÑEM

7. Kiki ba bi héya mboñbéba ikété likoda hala a bi num mambe matam malam? (2 Korintô 2:​5-8)

⁷ Añ 2 Korintô 2:​5-8. Paul a bi kal le, i “kogse libim li bôt ikété nan li nti i mut nunu [i bé] i kôli.” Hala a nkobla le bikodlene bi bi yônôs njômbi yé inyu i mut nu. Imbe njômbi? Bikodlene bi bi hôla i mut nu i hiel ñem.​—Lôk Héber 12:11.

8. Kii ipe Paul a bi kal likoda le li boñ?

⁸ Jon Paul a bi kal likoda le: I mut a mbaage “ni nlama nwéhél nye, ni ti ki nye hogbe,” “ni unda toi nye gwéha nan.” Yimbe le Paul a bi kal ndigi bé le, lôk kéé i bé lama timbis i mut nu ikété likoda, ndi Paul a bé gwés le bibuk gwap, bilem gwap ni maboñok map bi unda toi le ba nwéhél nye ni le ba ngwés nye. Hala a ga unda yaga le ba yé maséé i tiimba leege mboñbéba nu a ntam béba yé ikété likoda.

9. Inyuki i bé ndutu inyu bôt bahogi i nwéhél mboñbéba nu a bi hiel ñem?

⁹ Baa i bé ndutu inyu bahogi ikété likoda i leege mboñbéba nu a bi tam béba yé? Ñañ u nkal bé bés, ndi bebek le ñ. Di hôya bañ le maboñok mé ma bi tééñga likoda jolisôna, bebek le hala a bi wéha lôk kéé ipe nyuu. Jon bape ba bé tehe le hala a téé bé sép le ba leege mut nu a bi boñ i nya béba ikeñi i, ki le bo ba bé boñ biliya bi ngui i téñbe ni Yéhôva. (Hégha ni Lukas 15:​28-30.) Ndi, inyuki i bé nseñ le likoda li unda i mankéé a bi hiel ñem le li ngwés toi nye?

10-11. Kii i bé le i bôña ibale mimañ mi tjél nwéhél mboñbéba nu a ntam béba yé?

¹⁰ Hégda ki, kii i bé le i bôña ibale mimañ mi bé le mi tjél timbis i mut nu ikété likoda, ki le a nhiel toi ñem, tole i mbus le ba ntimbis nye ikété likoda lôk kéé i likoda i tjél unda le i ngwés nye. Hala a bé le a ti nye ‘ndutu ñem iloo hihéga.’ A bé ki le a nôgda le botñem i ta ha bé inyu yé. A bé yak le a waa boñ biliya inyu témbna maada malam ni Yéhôva.

¹¹ Iloo ki hala, ibale lôk kéé i bôlôm ni i bôda i ntjél nwéhél mboñbéba nu a ntam béba yé, ki yak bo ba ñôbôs maada map malam ni Yéhôva. Inyuki di nkal hala? Inyule ibale ba mboñ hala wee ba ta bé i kôna Yéhôva nu a yé bebee i nwéhél baboñbéba ba ba ntam bibéba gwap, ndi wee ba yé i kôna Satan nu a gwé ñem mbe, a nkônôl bé to bôt bape ngoo. I maliga ba ga ba bôt Nsohop a nla gwélél inyu ôbôs maada i mut nu a yé le a bana ni Yéhôva.​—2 Korintô 2:​10, 11; Éfésô 4:27.

12. Lelaa lôk kéé i likoda i bé le i kôna Yéhôva?

¹² Lelaa lôk kéé i likoda li Korintô i bé le i kôna Yéhôva, he Satan bé? I bé béda le kiki Yéhôva, ba nwéhél mboñbéba nu a ntam béba yé. Béñge i yom batila Bibel bahogi ba nkal inyu Yéhôva. David a kal le: “U yé loñge, u bak bebee i nwéhél.” (Tjémbi 86:5) Mika a tila le: “Njee a yé Nyambe kiki we, nu a nwéhél béba ni liboñok libe?” (Mika 7:18) Yak Yésaya a kal le: “Béba mut i nwas maboñok mé mabe, mut mam mabe a nwas bipék gwé bibe; a témb yak Yéhôva nu a ga kônôl nye  ngoo, a témb yak Nyambe wés, inyule a nwéhlana ngandak.”​—Yésaya 55:7.

13. Inyuki i bé loñge le ba timbis mboñbéba nu a nhiel ñem i likoda? (Béñge minkéñék mi matila le: “ Imbe ngéda ba bi timbis mut Korintô i likoda?”)

¹³ Inyu kôna Yéhôva, lôk kéé i likoda li Korintô i bé lama leege i mut a ntam béba yé, i unda ki nye le i ngwés nye. Kiki ba bi noñ maéba ma Paul le ba leege mboñbéba nu a nhiel ñem, likoda li bi unda le li yé “manôgla ikété mam momasôna.” (2 Korintô 2:9) I yé maliga le, ndék sôñ ndigi yon i bi tagbe, i mbus le ba bi pémés i mut nu ikété likoda, ndi bikodlene bi bi tinde toi nye i hiel ñem. Jon njom yo ki yo i bé bé le ba tiñha timbis nye ikété likoda.

LELAA DI NLA KÔNA TELEPSÉP NI KONANGOO I YÉHÔVA

14-15. Bimbe biniigana di ñôt mu jam li bi bôña i likoda li Korintô? (2 Pétrô 3:9) (Béñge yak titii.)

¹⁴ Ñañ unu u ntoñol i jam li bi tagbe i nlômbi tison i Korintô, u bi tilba ikété Bibel “inyu niiga bés.” (Rôma 15:4) Ñañ unu u niiga bés le Yéhôva a neebe bé le mut nu a mboñ béba ikeñi ndi a tjél tam béba yé a yégle ikété likoda. A neebe bé to mana mahoñol le mut a mboñ béba ikeñi ndi a tjél hiel ñem ba nlama “kônôl nye ngoo” ba nwas le a kee ni bisu i ba ntôñ ni bagwélél ba Yéhôva ba ba tiñi ni nye. Yéhôva a yé konangoo, ndi a neebe bé tokii tokii,  matiñ mé inyu loñge ni béba ma nhéñha bé kekikel. (Yuda 4) I maliga, ibale a bak hala, ki a ta bé konangoo, ki a nsôñ bé to likoda jé le jam libe li pémél bañ jo.​—Bingéngén 13:20; 1 Korintô 15:33.

¹⁵ Ndi, di nigil le Yéhôva a ngwés bé le mut nye ki nye a tjiba. A ngwés le bôt ba kôhna tohi ntel wonsôna hala a nla bôña. I bôt ba nhiel ñem ba yéñék ki témbna maada malam ni nye a nkônôl bo ngoo. (Ézékiel 33:11; añ 2 Pétrô 3:9.) Jon, i ngéda mut Korintô a bi hiel ñem a nwas ki béba yé, Yéhôva a bi gwélél Paul inyu toñle lôk kéé i likoda le ba nlama nwéhél i mut nu ba témb ba leege nye ikété likoda.

16. Kii u nôgda i ngéda u nhoñol lelaa ba bi kena mam i likoda li Korintô?

¹⁶ I jam li bi bôña i likoda li Korintô li ñunda bés le Yéhôva a yé toi gwéha, a yé maliga, a téé ki sép. (Tjémbi 33:5) Baa hala a ntinde bé we i kônde bégés Nyambe? I maliga, bésbobasôna di yé baboñbéba, hala a nkobla le, bésbobasôna di gwé ngôñ le a nwéhél bés. Hiki wada wés a nlama ti Yéhôva mayéga inyu binoñ bi bi mboñ le a kôhna nwéhél. Kinje hogbe di nôgda i yi le Yéhôva a ngwés toi litén jé, a nsômbôl ki le li ba loñge!

17. Kii di ga wan i gwigil bi noñ?

¹⁷ Nano i ngéda mut a mboñ béba ikeñi kii i mbôña? Kiki Yéhôva lelaa mimañ mi nla unda le mi nyéñ hôla mboñbéba le a hiel ñem? Lelaa lôk kéé i likoda i nlama boñ i ngéda mimañ mi nkit le mi mpémés tole mi ntimbis ngim mut ikété likoda? Di ga wan mambadga mana i gwigil bi noñ.